ليه أوقات بتحس إن الناس كلها بتراقبك؟وإزاي تتعامل مع الأزمة دي!
تخيل إنك صحيت متأخر على شغلك أو جامعتك ومكنتش محضر هتلبس إيه، فقررت تلبس أي حاجة جات قدامك ونزلت الشارع، وبقيت حاسس إن كل الناس بتبص عليك وعلى شكلك وممكن تكون حاسس إنهم بيتريقوا عليك في سرهم.. ولكن كل ده في عقلك أنت بس، لو بصيت من منظور الناس، أنت واحد عادي ولابس لبس عادي والدنيا عادية تماما، ولكن اللي حصلك ده، بيطلق Spotlight Effect.
تأثير الضوء أو Spotlight Effect هو إنك بتبالغ في إحساس إن الناس شايفاك ومتابعة كل تصرفاتك.. يعني كأن في ضوء محطوط علينا، والعالم بيشوف عيوبنا وأخطائنا اللي بنعملها.
وحسب موقع very well mind، الموضوع بيكون بزيادة عند الناس اللي بتعاني من القلق الاجتماعي أو ما يعرف بالـ Social Anxiety “لو حابب تعرف أكتر عنه ممكن تشوف الموضوع ده”.
طيب ده ليه بيحصل؟ حسب موقع Healthline ده بيرجع لحاجة اسمها التحيز المعرفي أو الخطأ في التفكير.. طيب ده معناه إيه؟ باختصار شديد ده بيكون عيب في تفكيرك بيخليك تسيء تفسير أو فهم المعلومات اللي بتاخدها من الناس وبيوصلك لنتيجة مش صحيحة أو غير دقيقة.
الشخص بيفسر تجاربه في سياق المعلومات اللي عنده أو اللي هو بيفكر فيها بس، فده بيخليك تستنتج حاجات مش صحيحة ومش دقيقة، وبتلاحظ الحاجات اللي أنت شايفها مهمة وبتعتقد إن الناس شايفنها مهمة برضه لإن أنت اللي بتعتقده ده.
طيب إزاي تتعامل مع تأثير الضوء لو أنت بتمر بالتجربة دي؟
لازم تبقى عارف إن التفكير كتير والقلق بخصوص الناس شايفاك إزاي ده له تأثير سلبي على ثقتك بنفسك وهيزود من مشاعر القلق الاجتماعي عندك.
ركز وقول لنفسك إن إحساسك ده هو عندك أنت وبس، يعني الضوء اللي أنت حاسس إنه في حد حاطه عليك، في الحقيقة أنت اللي حطيته على نفسك، وكل اللي حواليك عندهم حاجاتهم ومشاكلهم اللي مركزين فيها، فماحدش باصص على قصة شعرك أو إن الناس خبراء في النضارات فهيعرفوا إنها نضارة مضروبة مش أصلية.. ويا سيدي حتى لو ده حصل.. مش هيقعدوا يفكروا فيه العمر كله يعني.
يعني أنت مثلا آخر مرة لاحظت حاجة على شخص إمتى؟ أنا لما فكرت وأنا بسأل السؤال ده دلوقتي مافتكرتش حاجة، وغالبا أنت والأستاذ اللي ورا والأستاذة اللي هناك ماحدش فيكم هيفتكر إمتى آخر مرة لاحظ حاجة على شخص.
لو في وقت من الأوقات اتعرضت لموقف إن حد لاحظ حاجة، خد الموضوع بهزار، زي لو حد علق على قصة شعرك أو حاجة لابسها، ممكن تقوله أنت عارف إيه الفرق بين البيتزا ورأيك، إني طلبت البيتزا.. وهزر واضحك وتخطى الموضوع.. أو قوله إن تعليقه يحترم وكل حاجة بس الحاجة اللي علق عليها عجباك وبس
موقف Healthline بيقول في النقطة دي، إن روح الدعابة أو الهزار ده اللي الناس هتفتكره أكتر من الموضوع نفسه، فخد المواضيع دي بهزار وضحك.
