3 مرشحين من مصر.. حكاية “ذا بيست” قبل الحفلة

جماهير الكرة في كل حتة في العالم مستنية حفل جوائز “ذا بيست” 2025 الحدث السنوي اللي بينظمه الاتحاد الدولي لكرة القدم “فيفا” علشان يكرّم أفضل ما قدمته اللعبة في الموسم اللي فات

النسخة العاشرة من الجائزة بتيجي وسط زحمة نجوم وأسماء تقيلة جدًا وكمان مواهب صغيرة فرضت نفسها بقوة وخطفت الأضواء من الكبار.. والحفل المرة دي هيبقى في العاصمة القطرية الدوحة بكرة الثلاثاء 17 ديسمبر واختيار التوقيت مش صدفة لأنه جاي قبل نهائي كأس القارات للأندية في محاولة من فيفا يربط الجوائز بأكبر المناسبات الكروية والجمهور هيقدر يتابع الحفل لايف هتبدأ الساعة 7 مساءً بتوقيت مصر عبر المنصات الرسمية لفيفا في ليلة متوقع يكون فيها مفاجآت كتير

حفل “ذا بيست” مش بس جائزة أفضل لاعب لكنه باقة جوائز كبيرة بتغطي كل جوانب اللعبة: أفضل لاعب وأفضل لاعبة في العالم وأفضل مدرب وأفضل مدربة وأفضل حارس مرمى وأفضل حارسة مرمى وجائزة اللعب النظيف وجائزة أفضل جمهور وغير طبعًا جايزتي بوشكاش ومارتا لأجمل هدف في السنة.. يعني إحنا قدّام ليلة مليانة كورة وأسماء كبيرة ومنافسة مش سهلة خالص

صلاح في قلب المعركة

كالعادة جائزة أفضل لاعب في العالم هي العنوان الأهم والسنة دي المنافسة شكلها نار.. والقائمة النهائية ضمّت مجموعة من نجوم الصف الأول وعلى رأسهم محمد صلاح نجم ليفربول اللي رغم السنين واللي حصل مؤخرًا مع مدربه سلوت في ليفربول لسه محافظ على مكانته بين كبار العالم وبيمثل الأمل الأكبر عربيًا وإفريقيًا في الجائزة

مع صلاح في أسماء تقيلة زي كيليان مبابي بعد موسمه الأول مع ريال مدريد وهاري كين اللي قدّم موسم قوي جدًا مع بايرن ميونخ  وبرشلونة حاضر بقوة من خلال بيدري ورافينيا وكمان موهبة الجيل الجديد لامين يامال اللي قلب الدنيا رغم صغر سنه وبقى حديث العالم

هل يعملها ديمبيلي ؟

باريس سان جيرمان كان له حضور واضح السنة دي خصوصًا مع عثمان ديمبيلي المتوّج بالكرة الذهبية ومعاه أشرف حكيمي وده بيعكس قوة موسم الفريق محليًا وقاريًا.. والترشيحات بطبيعتها بتميل لديمبيلي بعد الكرة الذهبية لكن تاريخ “ذا بيست” بيقول إن المفاجآت واردة

كتير شايفين إن الجائزة ممكن تروح لـ لامين يامال خاصة بعد ترتيبه المتقدم في الكرة الذهبية ويتكرر سيناريو الموسم اللي فات لما الكرة الذهبية راحت لرودري بينما “ذا بيست” كانت من نصيب فينيسيوس في نوع من توزيع الرضا بين أفضل اتنين

الحضور المصري

اللي يفرّح إن الحضور المصري السنة دي مش مقتصر على محمد صلاح بس في جائزة بوشكاش لأجمل هدف ويتواجد اسم عمرو ناصر مهاجم فاركو السابق والزمالك الحالي عن هدفه في شباك الأهلي بكأس عاصمة مصر هدف لفت الأنظار وقتها ودخل الترشيحات العالمية

كمان في تشكيل العام بيتواجد اسم محمد صلاح من جديد ومعاه حضور نسائي مصري من خلال حبيبة صبري حارسة مرمى نادي مسار اللي بتنافس على مركزها ضمن الأفضل عالميًا وده تطور مهم للكرة النسائية المصرية

جوائز السيدات والمدربين

في جائزة أفضل لاعبة في العالم المنافسة قوية بين أسماء زي أيتانا بونماتي ولورين جيمس بعد مواسم مميزة جدًا مع أنديتهم ومنتخباتهم
أما على مستوى المدربين فالصراع مفتوح بين مدارس مختلفة زي لويس إنريكي وميكيل أرتيتا في فئة الرجال وسارينا ويجمان في فئة السيدات

وفي جائزة أفضل حارس مرمى الأسماء المعتادة حاضرة: تيبو كورتوا ودافيد رايا ووجيانلويجي دوناروما وكل واحد فيهم كان ليه بصمة واضحة مع فريقه

في النهاية حفل “ذا بيست” 2025 مش مجرد توزيع جوائز لكنه مرآة لموسم كروي كامل بحكاياته ونجومه وصراعاته والحلو السنة دي إن اسم مصر حاضر بقوة في أكتر من فئة سواء من خلال محمد صلاح أو عمرو ناصر أو حبيبة صبري وده بيدي الحفل طعم خاص للجمهور المصري والعربي.