5 أسباب بتخلي أي شخص يواجه صعوبة في تخطي علاقة انتهت!
تخطي العلاقات عمرها ما كانت خطوة سهلة في حياة أي شخص، ومهما كان فيه كلام نظري عشان يسهل على الشخص تخطي العلاقة وإنه يخرج منها برضه الموضوع بيفضل صعب، وحتى لو كان الشخص شاف الويل مع الإكس بتاعه هتفضل برضه خطوة مرهقة جدا ومفيش أي مسكنات ممكن تهديها.
وده اللي لاحظناه اليومين اللي فاتوا خصوصا في قصة شيرين عبد الوهاب بعد انفصالها عن حسام حبيب، وبعد ما خرجت للناس وهي حالقة شعرها وبدأ الناس يتعاطفوا معاها ومع حكايتها، ولكن ناس كتير اتلخبطوا بالذات بعد ما قالت بكل صراحة وشجاعة إنها لسه بتحب حسام حبيب وده في مداخلة تليفونية مع عمرو أديب في برنامج “الحكاية” اللي بيتذاع على قناة MBC مصر، وكانت قبلها بتقول إنها عمرها ما هترجع تاني لحسام حبيب.
لكن خلينا نقولك إن تصريحات شيرين مابتتنافاش مع بعض ولا حاجة، وإن عادي إن الشخص يبقى شايف باب مقفول قدامه بس لسه متشبس بيه، وده زي ما قال موقع “globalnews” في واحد من مقالاته اللي كان بيتكلم فيها عن الانفصال، وقال كمان في المقال ده ليه صعب الشخص يتجاوز علاقة سابقة مهما كان اتعرض فيها لوجع وآذى.. والأسباب هي:
1- مابتكونش قادر تواجه حقيقة إن الموضوع انتهى:
فيه أشخاص كتير بيبقوا عندهم إنكار للحقيقة ومابيقدروش يدركوا إن الموضوع كده خلاص انتهي وبيبقى عندهم تمسك رهيب إنهم هيقدروا يصلحوا الأمور، وده غالبًا لإنهم بيركزوا على الجوانب الإيجابية اللي كانت في العلاقة وبينسوا خالص ليه العلاقة دي انتهت وبينسوا الغلطات اللي حصلت في العلاقة دي، وغالبا الأشخاص دول كانوا بيبقوا شايفين العلامات اللي بتدل على فشل العلاقة قدامهم لكن فضلوا يتجاهلوها كتير، وده لإنهم ممكن يبقوا بيخافوا من الفشل عموما، وفيه ناس بتخاف تبدأ حياتها من جديد لسه مع أشخاص تانية بعد الوقت اللي استثمروه وضيعوه في العلاقة دي.
2- لسه بتستوك عليه:
السوشيال ميديا دلوقتي بتسهل فكرة إن أي شخص معدي كده يشوف كل تفاصيل حياتك، خصوصا بقى لو شخص تعرفه وبتتابعه وتراقبه بقصد، فصعب جدا تقدر تتخطى علاقة وأنت لسه مهتم بتفاصيل الإكس، وأنت لسه ماشلتش صورك القديمة مع الإكس، فعشان كده حاول تتجنب إنك تستوك عليه.
3- ماكنش فيه نقطة نهاية:
من ضمن الأسباب اللي بتخلي الشخص مابيقدرش يتخطى علاقة انتهت هو إن الطرف التاني يقوله مرة واحدة إن خلاص الموضوع انتهي ومايقدملوش أي تفسيرات عشان يقدر ينهى العلاقة أو يتخطى اللي حصل.
فيه دكتورة نفسية اسمها “أبيجيل برينر” قالت إن مهم الشخص يوصله سبب نهاية أي شئ في الدنيا بينتهي سواء علاقة أو شغل أو مرحلة في الحياة وده لإن النهاية دي اللي طرف بيوصلها للطرف التاني بيبقى معناها قبول كامل للي حصل ومساعدة في الانتقال من شئ انتهي لشئ جديد.. وقالت كمان إن لازم الشخص يحزن على الفقد والخسارة ويتحمل مسؤولية أفعاله، ويركز على الإيجابيات ويعمل خطط لمستقبله القريب.
ونقطة النهاية والخاتمة اللي بيوصلها أي شريكين مع بعض في آخر العلاقة دي اللي بتساعد الشخص يتخطى العلاقة، ومن غيرها هيفضل فترة مش عارف يتخطاها.
4- قلة احترام النفس:
الخوف اللي بيجي لأي شخص بعد ما العلاقة تنتهي بتاع أنا خايف مالاقيش حد تاني يحبني أو أحبه ده بيكون موجود بنسبة كبيرة جدا، وبيكون فيه نوع خوف تاني لما الشخص يخاف يرجع مرة تاني لنفس الشخص خاصة لو كان في علاقة بقالها كتير والناس بترتاح للي تعرفه أكتر للي ماتعرفهوش، وده بيخلي التخلي والـ”موفينج أون” صعب أوي، ولو الشخص مابيحبش نفسه أو مش واثق في نفسه كفاية هيبقى متعلق بالعلاقة القديمة لإنه بيعتقد إنه مش هيحصل على علاقة زي اللي كان بيحصل عليه قبل كده، فبيبقى الأسهل بالنسبة له إنه يصلح اللي اتكسر أو يفضل عايش على الذكريات.
5- لما يبقى الشخص قدم كل اللي عنده في العلاقة:
فيه بعض الأشخاص ممكن يدوا حياتهم كلها لعلاقة، وسواء كان باختيارهم أو لا العلاقة بتبقى من طرف واحد بس، عشان كده لما بينفصل الطرفين عن بعض، الطرف المعطاء بيحس بالهجر والتخلي.
وبالتالي الشخص اللي كان مستعد يقدم حياته عشان العلاقة تفضل موجودة بيبقى خايف يرجع لحياته تاني لوحده لإنه كان في “كومفرت زون” مع الإكس بتاعه فأول ما العلاقة تنتهي بيبقى خايف وغضبان وحزين ومش عارف يتخطي العلاقة.
