5 أسباب هيخلوك تحب نفسك زي ما أنت وتبطل تستنى تقبل الناس ليك 

ناس كتير مننا بيحسوا إنهم أغلب الوقت محتاجين موافقة من الناس على أفعالهم أو تقبل لكل أفعالهم، يعني لو لبسوا لبس معين هيفكروا هل كل الناس اللي هيشفوني هعجبهم، ولو سمعوا مزيكا معينة أو قروا كتاب معين أو نوع الأفلام اللي بيحبوا بيفضلوا يفكروا كل الحاجات اللي في طباعهم ومظهرهم أكيد هيعجبوا الناس ولا هيعترضوا عليها أو ينتقدوها؟

في الحقيقة إن طفولتنا ومراهقتنا بيكونوا طباع كتير فينا بتخلينا نفكر هل إحنا مقبولين ولا لا، لكن بعد فترة من لما بنكبر وننضج بقى بنبقى عايزين نتخلص من شوية حاجات شايفينها غلط زي إننا نبقى تحت رحمة أراء الناس طول الوقت وإننا نتقبل نفسنا ورغبتنا واحتياجاتنا وعواطفنا زي ما هي من غير ما نرضي حد، ونبقى عارفين إننا نستاهل نتحب كده كده من غير محاولات في لتقبل كل فعل مننا.. وعموما لما بنبقى أشخاص بتحب وتقبل نفسها هنلاقي الناس بتتقبلنا وتحبنا زي ما إحنا.

فلو بتفكر فعلا بالشكل ده أو شايف إنك بتحاول ترضى الناس وعايز تتخلص من ده فخلينا نقولك على 5 أسباب تخليك تعمل كده زي ما ذكر موقع “fractalenlightenment”:

1- عمرك ما هتوصل لتوقعات الناس:

في بعض الأوقات هتبقي الأبن البار والزوج المثالي والصديق الوفي والأب الرائع والموظف المجتهد، بس أوقات تانية مش هتبقى كده وهتبقى مش مطابق لفكرة شخص تاني عن “الصح” وده بتبقى ظروف ممتازة عشان تنضج فعلا، وغالبًا بتبقي هي دي الظروف اللي الحياة بتوفرهالنا عشان نبدأ يا نتعاطف مع الناس ونحط نفسنا مكانهم أو نشرح وجهة نظرنا ليهم.

وخليك فاكر إن استحالة تلاقي أي شخص في الحياة بتتفق معاه بنسبة 100% وده سبب كفاية إنك تتوقف عن ضغط نفسك بضغوط مالهاش داعي عشان توصل لصورة معينة عند شخص معين.

2- هيبقى عندك تواصل حقيقي مع الناس:

لو بتغيير كل شوية حقيقتك وشخصيتك عشان تعجب الناس فأنت أصلا مش مدي الناس فرصة إنهم يتعرفوا على حقيقتك، ده غير إن أصلا مش دايما الناس بتاخد بالها بسرعة من فكرة إنك بتغير حاجة في سلوكك أو وجهة نظرك أو رأيك عشان تبقى مقبول أكتر بالنسبة لهم وشبههم.

وبالرغم إن الموضوع في الأول يبقى ممتع بالنسبة للأشخاص التانية إن حد بيسعى إنه ياخد موافقتهم وعلى استعداد يغير نفسه عشانهم إلا إن المتعة الإنبهار دول هيتلاشوا، وهيحترموا الشخص اللي عنده هوية وواثق فيها وفي نفسه أكتر حتى لو مختلفين معاه.

3- هتتعرف على نفسك بشكل أحسن:

من النضج إنك تتعرف على نفسك وعلى هويتك والأسباب كمان اللي بتخليك كده وليه بتعمل أفعالك دي، وغالبًأ الاكتشافات دي بتبان طول ما فيه رفض من الناس، فكر في الموضوع لما هتلاقي الناس مابيقبلوش هوايتنا ده بيدينا فرصة للتفكير في نفسنا وسلوكنا وعواطفنا وبنشكل علاقة مع نفسنا بتسمحلنا نبقى واثقين في نفسنا أكتر بغض النظر لو كان الناس موافقة ولا لا

4- هتحس إنك حر أكتر:

القلق المستمر عن اللي الناس بيفكروا فيه عنك وإنك تحاول توصل لمعاييرهم هو خوف دايما خصوصا من فكرة “هو أنا كويس كفاية؟”.

لما تدرك إن الناس مش بيشوفك زي ما أنت بس بيشوفوك زي ما هما وعلى معاييرهم، هتبطل تبذل المجهود المرهق اللي بيخلي الناس تشوفك بشكل معين ودي بيديك حرية ماتتقدرش بتمن، لإن القوة الحقيقية بتكون في ايدك أنت عشان أنت اللي بتسعي تكون حقيقي بغض النظر عن اللي الناس مدركاه.

5- هتبقى النسخة الأولى منك:

وزي ما الفنان أحمد مكي قال ماتحولش تبقى أي حد تاني غير نفسك دور بنفسك جوه نفسك متكسلش و قوم قلب هتلاقي ميزتك، كل واحد منا شخصية فريد تمامًا وعشان كده فيه سبب لوجودنا ولما بنتخلى عن حقيقتنا عشان نلبي توقعات الناس فإحنا بنحرم نفسنا والعالم من حاجة خاصة ومختلفة جدا واللي هو إحنا.

فلو ضيعت وقت كتير عشان تبقى زي فلان أو فلانة هتدرك إن مفيش حد هنا موجود عشان يبقى زي الناس أو زي المجتمع، وعن طريق إنك تقبل نفسك هتبقى أحسن نسخة ممكن تبقى عليها وده أفضل حاجة ممكن أي حد يبقى بيتمناها.

ومن أحسن الحاجات اللي بتحصل لما بنقبل نفسنا هو إن بنلاقي الناس اللي بتحبنا على طبيعتنا دي قربوا مننا وبنتحرك بشكل طبيعي ناحية العلاقات اللي بنبقى كويسين فيها.

وده هيساعدنا نكون علاقات صحية مع الناس واللي بيبقى فيها حب غير مشروط.