5 حاجات بتخلينا ننطفي فجأة على المدى البعيد

أوقات كتير بنلاقي نفسنا انطفينا فجأة واحنا في الشغل.. واحنا في خروجة.. واحنا حتى قاعدين مابنعملش حاجة.. وبنحس إننا محتاجين نرتاح ونبعد عن كل حاجة ومش عارفين إيه السبب.. كل اللي بنبقى عارفينه إننا ماعندناش طاقة نعمل حاجة ونفسنا نريح حبتين عشان كده في الموضوع ده هنقولك السر وراء الإنطفاء وفقا لموقع lifehack


1- الإحتراق الوظيفي – Burn Out

وهو الإرهاق اللي بيحصلنا بسبب الشغل فترة طويلة تحت ضغط وتوتر وده ساعات كتيرة بيأثر على حياتنا كمان النفسية والجسدية خارج الشغل وبيأثر على علاقاتنا.. ووفقًا لدراسة استقصائية أمريكية اتعملت سنة 2021 لقوا إن العمال عندهم معدلات مرتفعة من الإرهاق وفي استطلاع العمل والرفاهية لجمعية علم النفس الأمريكية لعام 2021 وأتعمل على 1501 عامل لقوا أن 79% منهم أتعرضوا لضغوط عمل و3 من كل 5 موظفين عندهم آثار سلبية بسبب ضغوط الشغل زي الإرهاق العاطفي والانطفاء والتعب الجسدي والنفسي..
عشان كده مهم تفصل شوية عن الشغل وتعمل حاجات لنفسك عشان تعيد شحن طاقتك من جديد والحاجات دي ممكن تكون بسيطة جدا زي إنك تبعد عن السوشيال ميديا وتريح بعد الشغل أو تاكل أكلة بتحبها أو تخرج مع صحابك وتعمل حاجة جديدة.

2- الراحة الزيادة عن اللزوم

لما بنبطل ندفع نفسنا إننا نعمل حاجات في حياتنا ونقعد في الكومفورت زون فترة كبيرة ده بيخلينا نقف ومانتطورش فبالتالي اهتمامنا بالحياة بيقل ونبدأ ننطفي منها ونفقد الشغف فيها.. والحل إننا نحاول نخرج برة منطقة الراحة ونعمل حاجات جديدة ونقبل بتحديات تساعد في تطويرنا وتطوير شخصيتنا بس ده هيحتاج منك إنك تدفع نفسك وتشجعها لأن الخطوة لازم تيجي من عندك

3- النوم غير المستقر

عدم النوم فترات كافية بيخلينا نبقى مش مركزين ومنطفيين طول اليوم.. والنوم عامل مهم جدا بيحافظ على صحتنا النفسية وبيخلينا نبقى مركزين أو مرهقين طول اليوم مش بس كده ده بيأثر كمان على ردود أفعالنا وهدوء أعصابنا وكمان بيساعد على موازنة السيروتونين وتجديد مستويات الدوبامين في الجسم اللي بيحسن صحتنا..

4-لما بنفضل في نفس الدايرة

لما بنلاقي نفسنا كل يوم بنعمل نفس الحاجة وبنكررها ده بيخلينا نفقد الشغف زي إننا كل يوم نصحى ونروح الشغل وناكل وننام ونستخدم السوشيال ميديا وبس من غير مايبقى عندنا أي أنشطة اجتماعية تانية
فبالتالي محتاج تعمل أنشطة جديدة زي إنك تمارس رياضة أو تتعلم حاجة جديدة تكسر دايرة الروتين.

5-لما بنبطل نحط أهداف لحياتنا

أوقات بنكون مش مخططين لحياتنا ولا عندنا أهداف توصلنا لأحلامنا وده بيخلينا عايشين وخلاص مفيش حاجة نسعى عشانها وواقفين في مكاننا واحنا مش فاهمين ليه عشان كده مهم يكون عندنا حاجة عايزين نحققها في حياتنا لأن ده اللي هيوصلنا للشعور بالانجاز اللي هيخلينا متحمسين للحياة وهيخلينا مننطفيش.

ولازم تكون عارف إن في ناس كتير بتحس بكده مش لوحدك وواجبنا تجاه نفسنا إننا نساعدها تخرج من أي انطفاء لأنها تستحق ده.. وخد وقتك لأن عادي تحس بالانطفاء.. لأنك مش طول الوقت هتبقى كويس وده عادي وطبيعي جدا.