5 حاجات لازم تخلي بالك منها لو بتفكر تربي حيوان أليف صغير

الحيوانات الأليفة الصغيرة شكلهم جميل أوي وأكيد جه عليك وقت فكرت وقولت طب ما أجيب حيوان صغير حلو كده أربيه.. حتى لو مش قطة أو كلب ممكن تكون اشتريت كتكوت وانت صغير.. وللأسف معرفتش تعتني بيه بالشكل الكافي

حصلت معانا كلنا والسبب إننا مش عارفين إزاي نتعامل بطريقة صح مع كائنات صغيرة محتاجة رعاية مختلفة تمامًا عن اللي ممكن يكون محتاجها الأكبر منها.. عشان كده دول 5 نصائح مهم تخلي بالك منهم..

1- خليك هادي واصبر عشان هو لسه بيفهم وبيتعود عليك وعلى المكان اللي هو فيه.. مش من أول يوم هيفهم تعليماتك ومش هيـ Sit لما تزعق له أكتر.. هو لسه مايعرفكش انت شخصيًا فاصبر عليه كده وهيفهم كل حاجة واحدة واحدة.

2- اتأكد إنه موجود في مكان آمن ومفيش حاجة حواليه ممكن تعرضه للأذى.. عشان هو في البداية هيفضل يتعرف على كل حاجة ويحاول يستكشف المكان الجديد اللي عايش فيه فياريت تبقى حاطه في مكان بعيد عن أي أدوات حادة أو شبابيك أو أدوات التنظيف زي الكلور مثلًا أو أي حاجة انت حاسسها ممكن تضره.

3- خليه تحت مراقبتك وملاحظتك على قد ما تقدر عشان ممكن تسرح شوية عنه ترجع تلاقيه هربان منك.. وماتستغربش هو مش شرير هو بس مش متعود وبيحاول يرجع لمكانه ولأهله حتى لو مايعرفش هما فين أصلًا.

4- حاول تدور على دكتور بيطري قريب من بيتك وصاحبه.. عشان ده اللي هتفضل رايح جاي عليه في الأول كده من تطعيمات بقى لاستشارات طبية من وقت للتاني ولو ظهر عليه أي أعراض لأي مشاكل فانت محتاجه يبقى جنبك أو على الأقل قادر تتواصل معاه بسهولة عشان لو حصل حاجة طارئة.

5- بواقي الأكل مش أكلهم.. هو بياكله عشان دي غريزة البقاء بس الصح إن يبقى ليهم نظام غذائي خاص بيهم وأكل مخصص لسنهم وده على حسب كلام الجمعية الأمريكية للأطباء البيطريين (AVMA) إن الحيوانات الصغيرة بتحتاجك تقدم لهم أكل من 3 لـ 4 مرات يوميًا وأكيد المياه تبقى نضيفة باستمرار.

في النهاية الأهم من ده كله إنك تبقى عارف من جواك إن دي روح بتحس وبتفرح وبتزعل وتتألم وقرار إنك تربيها مسئولية كبيرة لازم تبقى متأكد إنك قدها من قبل ما تاخد القرار.