5 حاجات ممكن تساعدك لو بتفكر تبطل تدخين

فاكر باباك لما كان بيقولك أوعى تشرب سجاير.. هتضر صحتك ومش هتعرف تبطلها؟ وانت ساعتها عملت فيها جامد وقولت “لا.. دي تفاريحي ويوم ما أحب أبطل هبطل أكيد”

كلنا عندنا شوية عادات عارفين إنها مضرة بس برضه مش عارفين نبطلها.. والسجاير دي من أسوأ العادات اللي بتمسك في الواحد ومش بتسيبه بسهولة.. فقولنا نقولك شوية حاجات ممكن تساعدك لو بتفكر تبطل -ويا ريت تكون بتفكر-

مراكز السيطرة على الأمراض والوقاية منها الأمريكي CDC بيقول في موقعه شوية نصايح تساعدك على تبطيل السجاير زي:

تخلي البيئة اللي حواليك بيئة مساعدة للإقلاع عن التدخين

زي إنك تتخلص من كل الأشياء المتعلقة بالسجاير من أول ما تقرر تبطيل.. زي الولاعات والطفايات والسجاير طبعاً
وكمان تغسل هدومك علشان تروح منها ريحة السجاير.

قول لأصحابك

من الحاجات اللي بيتنصح بيها برضه إنك تقول للناس اللي حواليك وأصحابك إنك قررت تبطل تدخين.. وده لأنك هتكون عايز تشرب في أغلب المواقف الاجتماعية.. فياريت تعرف الناس إنك بتحاول تبطل.. بالذات للناس اللي بتشرب عشان يقللوا تدخين قدامك.

دور على حاجات تعملها

اعمل ليست بالحاجات اللي بتحبها -غير السجاير- واللي ممكن تشتتك عن رغبتك في شرب سيجارة.. موسيقى.. تمشية.. كلام مع حد يشجعك وأي حاجة تانية.
وكل ما تفكر تشرب سيجارة.. جرب حاجة من الحاجات دي وحاول تبعد عن التفكير في السجاير

استخدم حاجات بديلة 

ساعات كتير بنشرب سجاير عشان بنكون زهقانين أو متوترين.. فممكن تخلي معاك بدايل لده زي اللب وخلة السنان واللبان أو قلم حتى.. أي حاجة تكون في إيدك بدل السيجارة.

فكر نفسك ليه بطلت

أوقات كتير هيبقى نفسك في سيجارة.. بس فكر نفسك دايمًا انت ليه بطلت.. علشان صحتك.. فلوسك.. الناس اللي حواليك.

في النهاية.. التبطيل ممكن يكون صعب.. بس مش مستحيل بدليل إن فيه ناس قدرت تبطل.. فانت قدها وقدود