5 علامات و 6 نصايح.. هتحمي بيهم حيوانك الأليف من الحر
أكيد واخد بالك وحاسس بارتفاع درجات الحرارة في الكوكب كله.. وزي ما الحرارة دي بتأثر عليك فا هي برضه بتأثر على الحيوان الأليف اللي انت مربيه.. وعشان الحرارة هتفضل تزيد أكتر وأكتر فأنت مسؤوليتك تجاه حيوانك الأليف برضه هتزيد عشان تحافظ على صحته وطاقته
الحرارة هتأثر على الحيوانات الأليفة وهيبان عليها علامات زي:
1- بيتنفس بسرعة وبيطلع لسانه
الحيوانات بتتنفس بسرعة عشان تقلل درجة حراراتها.. وده بيبقى مؤشر خطر خاصة لو ده بيحصل وهو مش عامل مجهود
2- عنده خمول ومابيتحركش كتير
هتلاقيه مرة واحدة ريح ومش بيتفاعل معاك ولا عايز يتحرك.. ده معناه إنه مش قادر يظبط حرارة جسمه وده مخليه مجهد
3- رعشة وسخونة في الجسم
لو جسيت جسمه هتلاقيه سخن زيادة عن العادي وممكن كمان تلاقي الموضوع اتطور وجسمه بدأ يرتعش
4- ترجيع أو إسهال
درجة حرارة الحيوان لما بتعلى بتأثر على الجهاز الهضمي.. وده لأن ارتفاع درجة الحرارة بيأثر على توزيع الدم في الجسم وبيقل تدفقه للمعدة.. وده بيعمل خلل في عملية الهضم
طب لو لاحظت العلامات دي على حيوانك الأليف تعمل إيه وإزاي تحميه من البداية؟
1- وفرله مياه نضيفة وباردة باستمرار
الحر بيزود من فقدان السوائل من جسم الحيوان.. عشان كده لازم تعوضه بالمياه باستمرار وممكن كمان تزود فيها قطع تلج عشان تبرد عليه شوية
2- اختار وقت التمشية
لو حيوانك الأليف من النوع اللي بتمشيه زي الكلاب.. حاول تتجنب وقت الظهر.. يا إما الصبح بدري يا إما بعد المغرب.. وده عشان التمشية في الحرارة دي ممكن تحرق رجله
3- خليه في مكان ضِل
لو هتسيبه في مكان برة البيت حاول يبقى المكان ده في ضِل ومتهوي.. ولو جوه البيت فخليه في مكان داخله هوا كويس
4- ماتسيبوش في العربية
لو الحيوان معاك في مشوار بالعربية بلاش تنزل وتسيبه فيها.. لأن درجة الحرارة بتبقى جواها زيادة عن درجة حرارة الجو
5- بلاش تحلق فروه كله
الفرو بيحمي جسم الحيوان من أشعة الشمس المباشرة.. لأن التعرض المباشر للشمس ممكن يعرضه لضربة شمس
6- رش عليه مياه
بلاش تصدمه مرة واحدة بالمياه وبلاش تبقى المياه ساقعة.. خليها المياه تنزل على جسمه بشكل تدريجي وتكون فاترة
