6 عادات غريبة بتعملها البنات عشان تتجوز

أكيد وانتي قاعدة من فترة وبتتجولي في أرجاء التيكتوك كالعادة قابلتك فيديوهات لبنات في خطوبة صاحبتهم وهي بتلف الدبلة على إيدهم 7 مرات عشان يتجوزوا بعدها… باعتباره “فال حلو”.

في ناس بتقول إن ده هيجبلهم الحظ الكويس في الجواز.. وناس تانية بتقول لازم 7 مرات.. كأن لو العريس عرف إنها لفتها 8 مرات مش هيجي يعني.

فلو عايزة تديها واحدة “يا دبلة الخطوبة” انتي كمان.. ممكن تجربي حاجة من دول:

• الأشهر “رمي البوكية”

هو مابقاش يحصل أوي الفترة دي بما إن الورد بقى غالي.. بس لا شك إنها طريقة فعالة وماكنش فيه فرح بيخلو منها.

• “قرص الركبة”

تعتبر أقدم عادة منهم في أم الدنيا.. ودايمًا مصحوبة بمقولة “أقرصي العروسة في ركبتها عشان تحصليها في جمعتها”.. أينعم مش حلوة مننا في حق العروسة بس أهو جربي.. انتي خسرانة حاجة.

• “كتابة الأسامي على الجزم”

مش بس مصر اللي فيها عادات غريبة.. العروسة في تركيا بتكتب أسامي صحابها وقرايبها اللي لسة ماتجوزوش على الجزمة من تحت.. ولو بعد فرهدة الفرح الاسم اتمسح يبقى هتتجوز السنة دي.. ولو ماتمسحش يبقى هتقابلي عريس قريب وممكن كمان في نفس يوم الفرح.. أصل هتتجوزي يعني هتتجوزي مافيهاش بقى!

• “رمي الجزمة في الكريسماس”

في التشيك يوم الكريسماس.. البنات اللي بتكون عايزة تتجوز بتقف وتدي ضهرها للباب.. وترمي الجزمة لورا زي ما بيعملوا في البوكيه كده.. لو طرف الجزمة بيشاور ناحية الباب يبقى ألف مبروك هتتجوز السنة دي.. لو لأ يبقى حظ أوفر المرة القادمة.

• “رمي البرتقان”

في ماليزيا وأحيانًا سنغافورة.. يوم 15 في السنة الصينية البنات بتكتب اسمها ورقمها وعنوانها على برتقانة وترميها في أقرب بحر أو نهر موجود.. عشان العريس المنتظر يصطاد البرتقانة ويكلمها.. بس مانصحكيش أوي لأن وارد جدًا يقشرها وياكلها وينسى يتصل.

رأيي تجربي واحدة من دول يمكن نفرح بيكي قريب و سمعينا زغروطة بقى!