في عيد ميلادها.. محطات مهمة في حياة المخرجة إنعام محمد علي

النهاردة 15 مايو هو عيد ميلاد المخرجة إنعام محمد علي، اللي تعاونت مع نجوم وفنانين كبار، وأخرجت أفلام ومسلسلات مهمة.

إنعام محمد علي اللي صنعت اسمها في ظروف استثنائية ودخلت عالم التلفزيون والسينما، في وقت ماكنش فيه مخرجات سيدات كتير، وقدمت أعمال كتير مهمة.

نشأة إنعام محمد علي.. ورحلتها في التلفزيون 

إنعام اتولدت في القاهرة 1942، وقضت فترة طفولتها في المنيا، وحصلت على ليسانس الآداب في جامعة عين شمس سنة 1960، وأخرجت أول مسلسل سنة 1964، وبعد كده حصلت على درجة الماجستير في كلية الإعلام جامعة القاهرة سنة 1973، واتدربت بعد التخرج علطول في مكتب BBC في لندن، وبعد ما رجعت مصر، اتعينت في التلفزيون المصري واشتغلت فيه لأكتر من 30 سنة، لحد ما وصلت لمنصب مدير إدارة برامج المرأة وبعد كده نائب رئيس قطاع الإنتاج باتحاد الإذاعة والتلفزيون.

دخول إنعام محمد علي مجال الإخراج

إنعام قالت خلال ندوة تكريمها في مهرجان أسوان، إنه قبل دخول جيلها مجال الإخراج التلفزيوني، ماكنش فيه سيدات في المجال، وإنها قرأت إعلان في الصحف بيطلب مساعدين إخراج ومساعدات، ودي كانت المرة الأولى اللي ينزل فيها إعلان يطلب مخرجين من الجنسين للشغل في التلفزيون المصري، وبالصدفة دخلت إنعام محمد علي مجال الإخراج الدرامي للمسلسلات.

إنعام محمد علي.. والمرأة.

إنعام كانت منحازة للمرأة في شغلها وأعمالها، كانت مديرة إدارة برامج المرأة في اتحاد الإذاعة والتلفزيون من 1974 لـ 1985، وقدمت أعمال مهمة ناقشت قضايا المرأة وكانت بطلتها المرأة زي مسلسلات “أم مثالية ونونة الشعنونة” و”قاسم أمين” و”أم كلثوم” و”ضمير أبلة حكمت” و”دولت فهمي التي لم يعرفها أحد” و”يوميات امرأة عصرية” و”هي والمستحيل” وفيلم “آسفة أرفض الطلاق”.

وأخرجت أعمال مهمة زي الحب وأشياء أخري، مباراة زوجية، حتى لا يختنق الحب، قصة الأمس، حكايات الغريب.

إنعام محمد علي.. والطريق إلى إيلات

من أكتر الأفلام اللي شهرت إسم المخرجة إنعام محمد علي هو فيلم “الطريق إلى إيلات” واللي فضل علامة مهمة في تاريخ السينما المصرية الحربية، ودي كانت من المرات النادرة اللي نشوف فيها مخرجة ست بتقدم عمل سينمائي حربي، ودي كانت واحدة من أجرأ تجاربها، وعملت مقابلات مع منفذى العملية الحقيقية “الضفادع البشرية” وناقشتهم في تفاصيل كتير ضمن بحثها الإنساني عن التضحية الكبيرة للضفادع البشرية.

كل سنة و”مخرجة الروائع” إنعام محمد علي بخير!