6 أسباب بتخليك تحس بتحسن لما تخبز 

ساعات كده بتبقى قاعد زهقان أو متضايق أو ممكن جايلك ضيوف فتقوم تخبز وتعمل حاجة تخلي ريحة البيت كله زي ريحة بيت تيتا وريحة بيوت الناس الطيبين فتحس إنك كويس وساعات تانية بتحس إن بقالك كتير ماكلتش أكلة أنت اللي عاملها من الأول للأخر فتنزل تجيب دقيق وخميرة وبيكينج باودر وتعمل أكله حلوة من غير أي تأنيب ضمير.

وقت الكورونا لما العالم كله كان قاعد في البيت أغلب الناس كانت بتخبز وتتفنن في عمل الكيكات بطرق وأطعم وإضافات مختلفة ووقتها اتعملت دراسات على الموضوع ده ولقوا إن فعلا الخبز بيخفف التوتر والقلق والاكتئاب.. فأكيد الموضوع كله مش فكرة إنك بتأكل حاجة طعمها حلو ومن عمايل إيديك بس وممكن يبقى فيه أسباب ورا إن الخبيز بيساعد الشخص يبقى مبسوط ومستريح أكتر والأسباب دي اللي موقع “little bakery” قالها في أحد مقالاته وهما:

1- الخبز بيساعدك تعبر عن نفسك:

زي أي عمل إبداعي الخبز هو شكل من أشكال التعبير عن النفس فبيساعد على تخفيف التوتر، والوصفة هي عبارة عن وصفة بتقرا عادي لحد ما الطباخ ينفذها وبيعملها بإبداع أو زي ما بنقول بالبلدي نفسه حلو في الأكل فلو بتحب الشخص اللي بتعمله الأكل هتلاقي تلقائيا الأكل طالع حلو وبينقل الحب والشكر والتقدير اللي عايز تقوله للشخص على الأقل بطعم الأكل الحلو ده.

2-  الخبز هو شكل من أشكال التركيز:

الخبز هو حاجة من أشكال اليقظة الذهنية أو ما يطلق عليه الـ “Mindfulness” وهي إنك تكون مركز ومدرك لمشاعرك واللي بتعمله، وبتتعمل كتمارين لتقليل التوتر وزيادة السعادة، وغالبا الخبز بيبقى طريقة مثالية للـ “Mindfulness” عشان الموضوع ببيحتاج تبقى مركز جدا في قياس العجينة مثلا وإنك تتبع الوصفة زي ما هي وتدوقها وتشمها وتركز في المطلوب منك وده بيساعد على تقليل مشاعر القلق والاكتئاب والتوتر، فبدل ما تركز في حاجة ممكن تضايقك فأنت بتركز في اللي قدامك.

3- من الكرم إنك تخبز لحد:

مفيش إحساس حلو زي إنك تطبخ أو تخبز حاجة لحد ولما تشوف وشهم والكيكة اللي بيحبوها لسه خارجة من الفرن طازة وهما شمين ريحتها ومدركين إنك وقفت وتعبت عشان تعملهم الأكله اللي بيحبوها.. فالخبز للناس دي طريقة تعبير عن حبك للشخص، ده غير إنه مشاركة الأكل كمان مع الناس اللي بتحبهم طريقة من طرق التعبير عن الحب خصوصا لما ده بيحصل بإيثار.

4- الخبز عمل إبداعي: 

الدراسات بتقول إن ممارسة الأعمال الإبداعية الصغيرة ممكن يساعد الشخص إنه بيحس باسترخاء وسعادة وحماس تجاه الحياة، ده غير إن ممكن تساهم الأعمال الإبداعية دي في إنك تحس بالنمو الشخصي.

5- الخبز تجربة حسية:

الخبز غير مقتصر بس على إنك تمشي ورا خطوات الوصفة الموضوع بيتعلق بالـ 5 حواس، زي اللمس وأنت بتعجن أو بتتأكد من نعومة الزبدة أو وأنت بتشكل المعجنات أو بتزينها.

وزي حاسة البصر لما تشوف بعينك وتتأكد إذا كانت العجينة كده خمرت كفاية واترفعت أو استوت كفاية في الفرن أو وهي بتستوى برضه بتعرف من لونها في الفرن

وزي التذوق وهي أحسن طريقة عشان تتأكد من الطعم وإن كل حاجة مظبوطة وطبعا وأنت بتاخد أول قطمة منها قبل أي حد تاني.

وزي الشم اللي بيساعد تعرف لو كان الكراميل تمام ولا قرب يتحرق، أو وأنت قاعد مستني الحاجات تطلع من الفرن وبتشم ريحيتها ومتحمس تدوق وتأكل منها.

يمكن السمع من أقل الحواس اللي ممكن نستخدمها لكن عادي ممكن نستخدمها وأنت بتعرف هل كده الحاجة اللي بتخبزها بطلت تطلع صوت طقطقة أو الفرن وهو بيفصل برضه.

وبعض الحواس بترتبط ارتباط جامد بالذاكرة زي مثلا لو شميت ريحة كيكة هتفتكر ريحة الكيكة اللي كانت تيتا بتعملهالك كل مرة كنت بتروحلها وأنت صغير، أو لما كانت مامتك بتعمل كحك وبسكوت في البيت وأنت صغير في العيد، والذكريات ومشاعرها الإيجابية اللي بتيجي معاها ممكن تيجي من حاجة زي الخبز.

6- الخبز بيساعدك تمشى على إيقاع معين وتكرره:

كل وصفة ليها شكل من أشكال التكرار زي العجن والخلط والقياس والتسوية والتشكيل والتزين وكلها ليها إيقاع معين ودي ممكن تبقى طريقة صحية لتقليل التوتر لإن لما بتركز طاقتك العقلية على الحركات الجسدية البسيطة دي بيساعدك تتخلص من كل عوامل التشتيت والضغوطات وبيساعدك ترتبط بنفسك أكتر.

لو حسيت قبل كده إن الخبز بيساعدك تبقى أحسن خليك فاكر إنك مش لازم تقوم تخبز وتعمل حاجة كبيرة ولا فطير مشلتت يعني ممكن تعمل كوكيز عادي هياخد منك ربع ساعة في التحضير وممكن يفيدك أكتر من الوصفة اللي هتاخد منك طول اليوم.. لكن خليك فاكر إن أهم حاجة تتبسط وأنت بتخبز.