6 حاجات بنحب الشباشب عشانهم

كلنا بنحب الشباشب وبنستخدمها بشكل يومي تقريبًا.. بس عمرك فكرت إحنا بنحب الشباشب ليه؟
تعالى هقولك..

1- الرحرحة:

رجلك هتبقى واخدة راحتها كده من غير تكتيف الرباط أو اللزق والضيقة اللي بتجيبلك صداع من أول رجلك لحد دماغك

2- الطراوة: 

في أجواء زي اللي إحنا فيها دي آخر حاجة هتكون محتاجها هي كتمة رجلك في كوتشي مع درجة حرارة 40.. طب وليه؟ لما ممكن تحس بالهواء داخل خارج من كل حتة وتريحنا من مشاكل تانية كتير 

3- بيساعد على التفكير:

جربت تبقى لابس شبشب وانت بتفكر في حاجة؟ تلقائي هتلاقي نفسك عمال تحرك رجلك كده وتلاعب الشبشب والأفكار كلها بتيجي لوحدها

4- شياكة:

جرب تلبسه على أي حاجة ومش هيقول لأ عامة وهتلاقيه ماشي وقمة الشياكة والجمال مفيش أي مشاكل 

5- سهل وبسيط: 

حط رجلك فيه هوب انت في الشارع.. لا ربط رباط ولا لبيسة.. الحياة مع الشبشب أسهل من الحياة مع بشر كتير عامة

6- سلاح خطير:

في أي وقت هتلاقيه طاير لابس في حد.. هو السلاح المفضل للأمهات في البيت.. والستات عامة عشان لو نزلته على دماغ شخص ما فا هو كده انتهى خلاص

دي شوية مميزات للشبشب.. فا لو انت بتمر بيوم صعب والدنيا كلها ضيقة عليك ومش طايق نفسك.. خليك فاكر دايمًا .إن الشبشب يقدر يخفف كتير