6 حاجات لو بتحصلك وأنت نايم فأنت محتاج تشوف دكتور 

فيه حاجات كتير أوي ممكن تخلينا مش عارفين ننام مستريحين أو بنقلق كتير وإحنا نايمين منهم مثلا الضغط اليومي اللي من الشغل والحياة الشخصية والقلق ودوشة الجيران أو دوشة أهلنا وإحنا نايمين أو حرانين أو سقعانين وأسباب كتير ماتتعدش يعني.

وبالتالي لما بنبقى نايمين نوم مقطع أو صاحين عارفين إننا مانمناش كويس بنقول أي سبب من الحاجات اللي قولناها فوق دي مع إن فيه اضطراب معروف اسمه اضطراب النوم وبيكون أوقات بسبب حالات صحية أو حالات نفسية.. والرئيس التنفيذي والمسؤول الطبي في خطة الرعاية الصحية الأمريكية دكتورة “جانيس جونستون”  قالت لموقع “yahoo” إن معظم الناس بيدركوا إن نوهم كان متقطع لما بيحسوا بتعب شديد في تاني يوم لكن غالبًا بيقولوا إن ده بسبب مشاكل زي الاحتقان أو مشاكل الجهاز الهضمي أو نقص الكافيين أو الإجهاد الجسدي.. وحذرت من بعض المشاكل اللي ممكن يحسوا بيها الناس وبيقلقوا عليها أو حد بيقولهم إنهم بيعملوها وهما نايمين عشان لو الأعراض دي بتحصلهم أثناء النوم لازم يزوروا دكتور.. والأعراض دي هي: 

1- لما تبقى مش عارف تاخد نفسك: 

ودي بتبقى علامة على انقطاع النفس أثناء النوم وهو اضطراب في النوم بحيث التنفس بيتوقف بشكل متكرر.. ومدير معهد طب النوم في مركز ديبورا للقلب والرئة الدكتور “زيشان خان” قال إن أثناء النوم العضلات بتسترخي والحلق بيضيق وبيتقفل وانقطاع التنفس وقت النوم مرتبط كمان بالشخير والخنقة وقت النوم والصحيان بجفاف في الفم وصداع.. وقال كمان إن الحالة دي بيتم علاجها بجهاز اسمه “CPAP” وهو جهاز بيفتح مجرى الهواء.

وقالت دكتورة “جانيس جونستون” كمان إن فيه سبب تاني وممكن يبقى وهو “التنقيط الأنفي الخلفي” لإن لما المخاط بيوصل للجزء الخلفي من الحلق فممكن يسد المسالك الهوائية وده بيتسبب في التوقف المؤقت عن التنفس أثناء النوم وده اللي بيخليهم يلاقوا صعوبة في التنفس 

وده ممكن  يكون سببه الحساسية أو التغيرات في الطقس أو نزلات البرد. 

وعلاجه بيكون الحفاظ على رطوبة الجسم ومرطبات الأنف ومزيل الاحتقان.

ومن ضمن الأسباب كمان اللي ممكن تسبب في انقطاع التنفس أثناء النوم هي الارتجاع وده بسبب الإفرازات الحمضية من المعدة للمرئ.. وفي الأوقات دي المرضى بيحسوا بطعم حمضي في بوقهم وعلاجه بيكون إنهم يناموا على جنبهم الشمال أو يرفعوا نصهم العلوي على المخدة وهما نايمين أو ياخدوا مضادات حموضة.

2- المشي أثناء النوم: 

وهو واحد من أعراض الباراسومنيا.. وقال دكتور “زيشان خان” إنه عبارة عن اضطراب بيحصل في أعمق مرحلة أثناء النوم وسببه هو الحرمان من النوم أو التوتر أو القلق أو الحمى.

وإن الشخص ياخد أدوية زي المنومات أو المهدئات أو الأدوية المستخدمة لعلاج الاضطرابات النفسية وتناول الكحول دي كلها عوامل ممكن تساهم إن الشخص يحصله الاضطرابات دي  والدكتور المعالج ممكن يشخص ده عن طريق إنه بياخد التاريخ الطبي للمريض وعيلته وبيتأكد من الأدوية اللي المريض بياخدها ويتأكد إن المريض بينام كويس.

3- الكلام أثناء النوم:

وده واحد من أكتر أنواع الباراسومنيا انتشارًا.. وقال دكتور “زيشان خان” إنه منتشر أكتر عند الأشخاص اللي يعانوا من أمراض عقلية وممكن يبقى مرتبط بالمشي أثناء النوم والكوابيس.. ومن ضمن الأسباب التانية الإجهاد العاطفي والحمى وتعاطي المخدرات. 

وقالت دكتورة جونستون إن الظروف الصحية ساعات بتسبب انخفاض القدرة على التركيز والتلقبات المزاجية الشديدة والهلوسة وده برضه بيتم علاجه عن طريق إن الدكتور المعالج بياخد التاريخ المرضي للمريض ولعيلته وتجنب مسببات التوتر والحرمان من النوم والكحول وأدوية الاكتئاب وبعض الأدوية اللي بتخلي الشخص يتكلم وهو نايم. 

4- الكوابيس المستمرة: 

ودي أوقات بيكون سببها المحفزات النفسية المختلفة وأكترها انتشرًا هو القلق والاكتئاب والتغييرات في الجدول الزمني للنوم اللي بيكون فيها زيادة أو قلة لكمية النوم وممكن تكون بسبب اضطراب ما بعد الصدمة.

وأوقات بيكون علاج الكوابيس المزمنة ضروري خصوصًأ لو كانت بتسبب للشخص ضيق وبتصحيه وتقلقه كتير وقالت دكتورة جونستون إن الكوابيس المزمنة ممكن تسبب آثار صحية خطيرة زي زيادة خطر الانتخار وأمراض القلب والسمنة.. واحتمال تكون من الآثار الجانبية لتناول دوا معين وفي الحالة دي محتاج تراجع دكتورك عشان يقللك الجرعة أو يوصفلك دوا تاني وحاول تقلل من التوتر تراجع دكتور عشان لو الكوابيس دي بسبب القلق أو الاكتئاب.

5- لو بتقلق كتير عشان تدخل الحمام:

كل ما الشخص بيكبر أكتر كل ما بيصحى بليل كتير عشان يقوم يدخل الحمام لكن ساعات دي بتبقي علامة إن فيه مشكلة صحية تانية زي عملية الشيخوخة الطبيعية للمثانة.. وطبعا السبب الأكتر انتشارًأ هو شرب كميات من المياه كتير في وقت قريب من وقت النوم.

لكن فيه حالات صحية تانية بتسبب إن الشخص يقلق كتير ويدخل الحمام وهي زي التهاب المثانة أو المسالك البولية، أو مرض السكري، أو تضخم غدة البروستاتا، أو الفشل الكلوي المزمن.

وقالت دكتورة جونستون إن عشان تراقب المشكلة دي لازم الأول تقلل كمية المياه والسوايل اللي بتشربها قبل النوم وحاول تراقب أنت هتقلق من نومك كام مرة، وافتكر إيه نوع الأدوية اللي خدتها ولو فيه أي عدوى في المسالك البولية أو أي أعراض تانية مرتبطة بيها عشان لما تقول الكلام ده لدكتورك يقدر يقولك إيه الأسباب المحتملة لده.

والعلاج بيكون عبارة عن أدوية مضادات الكولين اللي بتقلل من أعراض مضادات الكولين اللي بتقلل من أعراض فرط نشاط المثانة، أو علاج الحالة أو العدوى، زي مرض السكري أو التهاب المسالك البولية.

6- الجز على الاسنان: 

تقدر تلاحظ بقى أنت بتعمل كده ولا لا وأنت نايم عن طريق لو حد قالك طبعا وإنك لما بتصحى من النوم بتلاقى صداع خفيف وألم في الفك.ز وده بيعتبر اضطراب حركي متعلق بالنوم 

ووفقًا لمايو كلينك فالأشخاص اللي بيجزوا على سنانهم وهم نايمين أكتر عرضة للإصابة باضطرابات النوم التانية زي الشخير وانقطاع التنفس أثناء النوم.. وقالت دكتورة جونستون إن ده ممكن يبقى بسبب القلق والتوتر لكن ممكن يبقى بسبب مشكلة في الفك.. ولازم تراجع دكتور سنان عشان يفحص الفم والفك ويشوف العلامات والأعراض زي هل فيه تأكل في السنان أو هل السنان اتلخلخت.. وبعد كده ممكن الدكتور يديك واقي للفم تلبسه أثناء النوم عشان يحميك من الحركة دي.