6 حاجات لو عملتها هتساعدك تتسامح مع اللي أذوك

بما إن رمضان قرب بنلاقي ناس كتير بتسعى إنها تسامح بعضها لو متخانقين.. لكن  بعض الناس مابيقدروش يتسامحوا مع حد أذاهم وبيحاولوا لكن بيلاقوا إنها حاجة صعبة عليهم لإنهم في الأغلب بيبقوا فاهمين التسامح بشكل غلط.. التسامح مش معناه إنك لازم ترجع مقرب من الشخص اللي أذاك.. التسامح معناه إنك تتخلى عن غضبك تجاهه والرغبة في الانتقام منه وتتقبل إن اللي حصل حصل خلاص وتتخطى لأن الغضب اللي جوانا تجاه الشخص هيأذينا احنا مع الوقت..

عشان كده في الموضوع ده هنقولك شوية حاجات لو عملتها هتساعدك تتسامح مع اللي أذوك وفقا لموقع Healthline و verywellmind


سامح نفسك الأول

قبل ماتبدأ تسامح الناس وتديها مبررات سامح نفسك واغفر لها أخطائها وكفاية جلد ذات.. لأن اللوم جايز يزود من صعوبة التسامح لأنك دايما بتحسس نفسك إنك السبب وأنت مش السبب ولا حاجة.

ابدأ بالحاجات الصغيرة

لو عايز تتعود تسامح لازم تبدأ تسامح على الحاجات الصغيرة اللي حصلت معاك واحدة واحدة لحد ماتوصل ليفل الوحش وتقابل الحاجات الكبيرة الصعبة فهتكون عودت نفسك عالتسامح.


حاول تبص على الجانب الإيجابي

لما حد بيأذينا في حاجة مش بناخد بالنا في وقتها من النفع اللي هيعود علينا من اللي حصل لأننا بنبقى غضبانين منه لكن مع الوقت بنعرف إن الشخص ده ماكانش مناسب لينا ومايستحقش يكون في دايرتنا أو هو اللي عنده مشاكل وحتى لو مالقتش سبب كفاية إنك قدرت تعدي بالموقف ونجحت في ده


تقبل مشاعرك وافهمها كويس

عشان تقدر تتسامح مع حد لازم تفهم مشاعرك كويس وسببها إيه وجاية منين عشان ده هيخليك تقدر تتكلم عنها كويس وتعبر عنها للشخص اللي أذاك وده هيساعدك على التعافي بشكل أحسن

حاول تعبر عن نفسك

من المفيد إنك تقول للي قدامك شعورك عشان تعرف تسامحه ولكن في أوقات تانية مابيكونش أصح حاجة.. فأنت تقدر تقيس ده على حسب أهمية العلاقة بالنسبالك لو كانت علاقة مهمة تقدر تتكلم مع الشخص لكن لو كانت علاقة انتهت تقدر تكتب مشاعرك في ورقة وتقطعها أو تتكلم مع حد عن الموضوع وتكمل حياتك.

حاول تكون متعاطف

حاول تحط نفسك مكان الشخص التاني عشان تقدر تفهم هو عمل كده ليه وإيه العوامل اللي وصلته لكده.. هل كان بيمر بفترة صعبة وقتها مثلا؟
وده طبعا لو هم كانوا شخصيات كويسة في الأساس ومش العادي إنهم بيزعلوك أو يؤذوك.

في الأخر لازم تكون عارف إن التسامح مش ضعف ولا شيء سلبي بالعكس الشخص المتسامح بيكون قوي حتى لو اللي قدامه مايستحقش ده بس على الأقل بتكون أنت مرتاح وعارف إن مفيش حاجة ممكن تضايقك بعد كده لأنك خلاص هتنساها وتفكر في الجانب الإيجابي في حياتك والخبرات اللي اكتسبتها وبس.. ولو عايز تقتنع أكتر وتعرف أهمية التسامح بالنسبالك تقدر تقرأ المقالة دي