6 حقايق عن الأحلام محتاج تعرفها
إحنا بنقضي تلت حياتنا نايمين، وطبعا خلال النوم ده إحنا بنحلم، فلو أنت بتحب تدور ورا تفسيرات الأحلام ومهتم بالموضوع في المجمل، فهتحب المقال ده، اللي هنقولك فيه على 6 حاجات محتاج تعرفها عن الأحلام، حسب موقع Very Will Mind:
1- كله بيحلم:
لا ومش بس كده، الأطفال والبالغين ممكن يحلموا لمدة بتوصل لساعتين، حتى لو مافتكرتهاش لما بيصحوا، ولكن الباحثين لقوا إن الناس بتحلم كذا حلم يوميا، وكل واحد فيهم بيستمر من 5 دقائق لـ20 دقيقة، ولو هنحسبها بالعمر كله، فإحنا بنقضي 6 سنوات في الأحلام.
2- الأحلام بتتنسي:
إحنا بننسى 95% من كل الأحلام بعد ما بنصحى بوقت قصير، وحسب النظريات، إحنا بننسى الأحلام بسبب إن في تغييرات في الدماغ بتحصل خلال النوم، وقتها مش بتكون قادر على معالجة المعلومات وتخزينها في الذاكرة.
ولما اتعمل مسح لدماغ ناس نايمة، لقوا إن الفصوص الأمامية ودي المنطقة اللي بيكون ليها دور في تكوين الذاكرة.. مش بتكون نشطة خلال الأحلام.
وفي دراسة اتنشرت في مجلة “Behavioral and Brain Sciences” سنة 2016، قالت إن نسيان الأحلام بيكون سببه تغيرات في مستويات النواقل العصبية خلال نوم حركة العين السريعة أو ما يعرف بالـ “REM”
3- الأحلام مش كلها ملونة:
أغلبنا ممكن يشوف الحلم بالألوان “ده لو صحي فاكره أساسا” ولكن في 12% من الناس مش بيشوفوا الحلم إلا أبيض وأسود بس.
25% من الأشخاص اللي بيزيد عمرهم عن 55 سنة بيشوفوا الحلم بالأبيض والأسود ونادرا لو شخص أقل من 25 سنة شاف حلمه بالأبيض والأسود.
الباحثين بيعتقدوا إن ده سببه هو إن الأجيال دي كانت بتشوف دايما التلفزيون بالأبيض والأسود، واللي دعم الفكرة دي، دراسة قديمة تانية لقت إن الأشخاص اللي في سن الأربعينيات كانوا من النادر إنهم يشوفوا الحلم بالأبيض والأسود.
4- أحلام الرجالة والستات بتختلف:
أحلام الرجالة غالبا بيكون فيها أسلحة ومحتوى عنيف ونشاط بدني وفرهدة، ولكن أحلام الستات محادثات وهدوم.
5- الأحلام السلبية هي اللي منتشرة أكتر:
القلق هو أكتر شعور منتشر في الأحلام، والمشاعر السلبية منتشرة أكتر من الإيجابية، ولكن في عوامل بتأثر في الحلم زي التوتر وبعض الأدوية، والدراسات بتقول إن العوامل الخارجية زي الروايح ممكن تلعب دور في شكل الحلم هل هيطلع إيجابي ولا سلبي!
6- الأحلام مش تجارب شخصية بس:
بعض الباحثين لقوا إن الأحلام ممكن تكون موجودة بين عدد من الناس وفي ثقافات مختلفة، يعني حلم إن حد بيجري وراك أو بيهجم عليك أو بتقع أو إنك مش قادر تتحرك أو وصلت متأخر لمكان معين.. كل الأحلام دي بيحلم بيها ناس كتير في العالم.
