6 معلومات هتفاجئك عن تاريخ الشاي

الشاي هو المشروب الرسمي في كل بيت مصري.. وهتلاقيه دايمًا ساندك سواء عندك شغل أو مصدع أو حتى في قعدة عصاري رايقة في البلكونة وحطيت عليه شوية نعناع مش هيقولك لا وهيروق عليك.. ده غير إن في منه الأخضر للي عامل دايت وفي منه فليفرز كمان للي بيحب ينوع.. يعني ماقصرش معانا في حاجة.. عشان كده احنا كمان مش هنقصر معاه وفي الموضوع ده هنقولك شوية معلومات تاريخية عنه هتبهرك وفقًا لموقع the collector


1-اكتشاف الشاي كان بالصدفة:

وفقًا للعربية.. الشاي أول مرة تم اكتشافه كان من حوالي 5000 سنة على إيد واحد من الأباطرة الصينيين القدام اسمه “شينونج الأسطوري” وفي رحلة من رحلاته في الأراضي الصينية قعد تحت شجرة يريحله شوية.. وكان بيشرب كوباية ماية سخنة وهو بيشربها ورق شجر وقع فيها بالصدفة واتغير لونها.. وبعد ما شربها “شينونج” حس بالنشاط والانتعاش فأمر إن المشروب ده يتوزع على كل المرافقين اللي معاه.. ومن هنا بدأ انتشار الشاي لحد ماوصل للعالم كله بسبب صدفة!.

2-الشاي كان بيستخدم كعملة زمان:

سنة 1368 م  كانت أوراق الشاي بيتم ضغطها في قوالب وبيتم التعامل معاها كعملة في الصين. .وانتشرت العملة دي كمان في بلاد التبت ومنغوليا وأجزاء من روسيا وده قبل ما يتم استخدام العملة المعدنية.

3- الشاي كان منتج غالي في إنجلترا:

أول لما وصل الشاي لإنجلترا في نص القرن الـ 17 كان غالي جدًا وماكانش حد بيقدر يشتريه غير الطبقة الغنية والنخبة.. فكان التجار بيصنعوا برادات شاي صغيرة ممكن ياخدوها لأي مكان عشان يقدر المشتري يدوق قبل ما يشتريه.. ده غير إن في القرن الـ 18 حدائق الشاي كانت مكان للناس يتقابلوا فيه خاصة للطبقة العليا وكان بيتم تقديم المشروبات فيها.

4-الصينيين والإنجليز عملوا حرب بسبب الشاي!

في تلاتينيات القرن الـ 19 كان الطلب على الشاي في بريطانيا كبير جدًا وكان المصدر الوحيد للشاي وقتها هو الصين.. ووقتها الصين طلبت دفع تمن الصادرات بالفضة.. وده خلى احتياطي الفضة البريطاني يقل.. فحاولت بريطانيا ترجع الفضة تاني فعملت خطة إنها تزرع أفيون في البنغال وتبيعه للصين مقابل إنها تاخد الفضة.. وده خلى فيه مدمنين كتير ونقص للفضة في الصين.. فالصين طبعًا ماسكتتش وحظرت الأفيون.. وبريطانيا بدأت وقتها الحرب على الصين من سنة 1839 لـ 1842.. وعلى الرغم من إن الحرب خلصت بينهم لكن البريطانيين خدوا موقف كبير وعملوا مزارع شاي خاصة بيهم في الهند  وقتها.

5-أوراق الشاي بتحمي من الحشرات:

ورق الشاي  خاصة أوراق الشاي الأخضر  ممكن يتم استخدامه  إنه يطرد الحشرات زي البعوض وبيعتبر وسيلة طبيعية بعيدة عن الكيماويات والمواد المضرة.

6-الـ Iced Tea اختراع من القرن الـ 19!:

يعتبر أقدم شاي ساقع اتكلمت عنه الروائية والصحفية الأيرلندية “مارغريت كونتيسة بليسينجتون” لما كتبت سنة 1823م عن شرب الشاي المتلج في نابولي.. لكن انطلاقته الأولى الكبيرة كانت في القرن الـ  في أمريكا 19.. في المعرض العالمي في سانت لويس سنة 1904، كان الجو حر  فباع الإنجليزي “ريتشارد بليتشيندن” شاي متلج وعجب الناس وبقى المشروب الشعبي وقتها .

شوفت بقى إن الشاي وراه تاريخ وحواديت كتير ده غير إنهم من أهم المشروبات في العالم كله وكل بلد بيشربه بطريقته الخاصة على حسب ثقافته؟