6 نصائح بتعرفك تعمل إيه عشان تعدي فترة التشتت اللي بعد الجامعة؟

لو اتخرجت من الجامعة ومحدش بقى عارف يكلمك.. والخريج راح والخريج جه.. ألف مبروك يا سيدي.

طبعًا انت أكتر جملتين بتسمعهم الفترة دي يا إما “ألف مبروك” يا إما “ها هتعمل إيه دلوقتي؟”

بس انت وإحنا وكلنا عارفين إنك مش عارف هتعمل إيه دلوقتي… أحب أقولك ماتقلقش.. اللي انت فيه ده طبيعي جدًا.

التوهان أو “تشتت ما بعد التخرج” دي حاجة بتحصل لناس كتير مش انت لوحدك يعني.. وناس كتير هنا مش قصدي على الـ5 6 صحابك ولا حتى الناس اللي في دفعتك.

فيه إحصائية عملها LinkedIn بتقول إن 75% من الشباب اللي أعمارهم بين 25 لـ 33 سنة حاسين بالتوهان ومش متأكدين من مسارهم المهني بعد التخرج.

طب ليه؟

لأن من وإحنا في ابتدائي بمجرد ما تطلع النتيجة بتبقى عارف انت رايح فين.. يإما مشرف معانا سنة كمان يإما هتدخل السنة اللي بعدها.. ده بمرور الوقت بيخلينا ماشيين في دايرة ثابتة بتتعاد كل سنة.. روتين ممل بس مُريح ومش بيخلينا نفكر كتير في اللي جاي.

لأن بطبيعتنا كبني آدمين بنخاف من اللي جاي.. بالذات لو مش عارفين هو إيه أصلا.

فعادي جدًا إن بعد سنين التعليم دي كلها تحس إنك مش عارف تعمل إيه أو تبدأ منين.. تاخد كورسات؟ ولا تشتغل على طول؟ طب مش هتتدرب الأول؟ ولا تسمع كلام صاحبك وتريحولكوا سنة كده؟
دي شوية نصايح هتنفعك

1: خد نَفَسك

التخرج بيسيب جوانا أثر نفسي وعاطفي كبير.. هتسيب صحابك وجامعتك وروتينك اللي انت عارفه.. وهتبدأ مرحلة جديدة وهتدخل “حياة الكبار”

مرحلة مش هتعرف ترجع منها تاني طالب.. فالأول إهدي.. خد نفس.. واعمل أي حاجة بتحبها.

ممكن تخرج مع صحابك أو تسافروا… أو تقعد في البيت شوية مع أهلك.

نضف مكتبك من الورق الزيادة وإرمي حاجة الجامعة اللي مابقتش محتاجها.. من الأخر فضي دماغك عشان تعرف تفكر في اللي بعد كده.

2: اقعد مع نفسك وافهمها

بعد ما فضيت مكتبك من الورق وفضيت دماغك للي جاي.. هتحتاج تسأل نفسك انت فعلًا عايز إيه؟

نفسك تكمل في الكارير بتاعك؟ 

طب لو هتكمل ناقصك إيه عشان تبدأ شغل؟

ولو مش هتكمل طب إيه الكارير اللي بتحبه عشان تبدأ فيه؟

آين كانت المهنة أو المجال.. كده كده محتاج تشوف انت فين وسط الناس في المجال ده.

ومش معنى كده إنك تقارن نفسك وتضايق.. انت بس هتشوف انت فين عشان تعرف اللي ناقصك وترسم طريق واضح بأهداف واضحة تمشي عليه.

وماتنساش تسأل نفسك انت بتحب إيه وشاطر في إيه.. واسأل اللي حواليك برضه.. ممكن حد يكون شايف فيك حاجة مميزة وهي دي اللي تكمل فيها.. مين عارف؟!

3: حدد أهداف معقولة

مبروك عرفت عايز تشتغل إيه وعرفت اللي ناقصك.. وانت بتكتب الأهداف بقى خليها منطقية.

يعني ماتقوليش أنا هشتغل أي حاجة دلوقتي عشان اجيب فلوس أبدأ بيها 3 كورسات في نفس الوقت.

الصح في المثال ده تشتغل وتبدأ كورس واحد في أجازتك.. ولما تخلصه تاخد اللي بعده وهكذا.

إهدي على نفسك عشان ماتفقدش شغفك بسرعة.. محدش بيجري وراك.

4: الناس مهمين جدًا

ماتتكسفش تسأل أي حد على نصيحة في الفترة دي.. ناس كتير هتساعدك وهتفتحلك سكك في دماغك ماكنتش تعرفها.

بس خد بالك.. ساعات النصايح الكتير بتتوه أكتر.. فا حاول تفلتر النصايح دي وخد منها اللي مناسب ليك ولأهدافك اللي حاططها.

5: طب لو ماظبطتش؟

عادي جدًا إن اللي مخططين ليه مايحصلش زي ماحنا عايزين.. ساعات الخطة مابتمشيش زي ما في دماغنا.. وساعات حاجات بتتأخر أو مابتحصلش خالص!

خد كل حاجة ببساطة وفكر في خطط بديلة. 

6: ماتستعجلش

لو لقيت حد من صحابك بدأ في كورس الألماني.. والتاني بدأ شغل على طول.. والتالت سافر والرابع نايم.. ماتحسش أبدًا إنك متأخر.

طول مانت بتسعى وعندك خطة واضحة وحقيقية ماشي عليها.. فانت مش متأخر على حاجة ومحدش سابقك ماتقلقش.

وفي الأخر افتكر إن الكل كان أو هيكون في يوم من الايام زيك.. انت بتمر بحاجة طبيعية فاطمن.. فترة وهتعدي وهتلاقي كل حاجة بتوضحلك وهتعرف طريقك واحدة واحدة.

إحنا عارفين إنك لسة خريج جامعي “صغنون” على المرمطة دي بس هنعمل ايه بقى ياصاحبي.. هي الدنيا كده!