6 نصائح تعملها مع صاحبك أو قريبك لو محشور في علاقة مؤذية

قابلتك كام مشكلة في عيلتك أو دايرة صحابك بين اتنين مرتبطين أو مخطوبين أو حتى متجوزين؟ كتير صح؟ وصحابك وقرايبك بيكونوا في مرحلة مش حاسين إنهم في علاقة مؤذية ولا المفروض يقبلوا باللي يتقالهم ويتعمل فيهم أو خايفين من رد الفعل.. لو ده بيحصلك فانت مش لوحدك.. معظمنا عايش ده.. فازاي بقى نحاول نساعدهم اللي نعرفهم أنهم يتخلصوا من العلاقة دي عشان ننقذهم من الأذى أو ننقذ اللي باقي من كرامتهم.. تعالى نقولك:

1- ماتسيبهوش لوحده وأسأل عليه

اطمن عليه كل فترة وأسأله تقدر تساعده إزاي.. كل موقف بيتعرضله الإنسان بتختلف طرق دعمه.. عايز يتكلم.. عايز يتناقش.. أو مش عايز أصلا يتكلم ويغير الموضوع ويضحك ويفك.. ماينفعش الشخص يتساب لوحده

2- اسمعه من غير أحكام

معظم الوقت الشخص اللي بيتعرض لمشكلة خاصة لو كانت في علاقته وقرر يفضفض.. بيكون عايزك تسمعه وبس.. ماتفضلش تلومه ولا تقوله لو كنت عملت.. لأنه مخنوق ومصدوم عشان ماتوقعش أي حاجة وحشة من الطرف التاني.. فهو محتاجك تسمعه وبس

3- عبر عن مشاعرك:

لو قابل أنه يسمع نصيحتك خليك لين.. عرفه أنك حاسس إن فيه حاجة 

مش مظبوطة في العلاقة دي وقوله أسباب منطقية.. لأنه في 

الوقت ده تفكيره مشتت ومحتاج دماغ تانية تفكر معاه

4 – طمنه إنه مش غلطان

غالبا الشخص المؤذي في العلاقة نرجسي ومش بيعترف بغلطه.. بالعكس هو موهوب في قلب الترابيزة عليك وهيطلعك انت غلطان وهيقنعك

لدرجة أنك هتكره نفسك الشريرة اللي زعلت الملاك الحنين.. فلازم تعرف صاحبك/صاحبتك إن الطرف التاني هو اللي غلط ويتخلى عن اللي الفكرة الغلط اللي في دماغه دي

5- فكره بصفاته الحلوة

استكمالا على النقطة اللي فاتت لازم الشخص المجني عليه في العلاقة نفكره بالحاجات الحلوة اللي فيه.. لأنه هيفقد الثقة في نفسه نتيجة أفعال الطرف المؤذي.. يعني ممكن توصل إن الطرف التاني يوصلك أنك تفقد الثقة في شكلك حتى لو كنت جميل.. أو يقول عليك شيطان مع إن كل الناس بتشهد بأخلاقك. فلازم نساعد أصحابنا أو قرايبنا يرجعوا الثقة في نفسهم تاني ونقولهم إننا فخورين إننا نعرفهم.. وممكن ده يحصل بشكل عشوائي عشان مايحسش إنك قاصد ده عشان هو متضايق

6- عالج مشاعره

لو ربنا كرمه وبدأ يشغل عقله ويدرك إنه في علاقة مؤذية.. خليك جنبه ماتسيبهوش.. انصحه عرفه الصح والغلط إيه.. ولو قرر نهاية العلاقة.. مش سهل على الشخص نهاية علاقة حتى لو مؤذية لأنه بيكون حاطط كل مشاعره فيها وكمان لو فيه مسؤوليات زي أولاد.. استحمله وحسسه إنك دايما موجود.. هو محتاج حد معاه في رحلته دي لأن الاستشفاء من علاقة ممكن يحصل في شهور أو حتى أطول .. فا ماتجبرهوش على حاجة وخليه ياخد القرار اللي يناسبه.. ولو الموضوع خرج عن السيطرة انصحه يروح لثيرابيست