7 حاجات هتساعدك تهدي نفسك في موسم الإمتحانات

مع قرب موسم الإمتحانات بنبتدي نقلق ونتوتر ونفكر في أسوأ السيناريوهات اللي ممكن تحصل.. أنا حاسس إن كل الناس خلصت المنهج وراجعته خمس مرات وأنا لسه ببدأ.. طيب ماذا لو مجبتش المجموع اللي عايزه ووقفت معايا على ربع درجة.. ماذا لو دخلت كلية ما بحبهاش أو عيدت السنة.. ماذا لو أتأخرت عن الإمتحان ووصلت في أخر دقيقة ومالحقتش أحل.. وبنبتدي يجيلنا كوابيس بتعطلنا أكتر.. عشان كده في الموضوع ده هنقولك إزاي تكون هادي وقت الإمتحانات وفقا لموقع BBC وموقع lutherwood

1-ماتراجعش كتير:

قسم الحاجات اللي عايز تراجعها لأجزاء صغيرة تقدر فعلا تخلصها وراجعها واحدة واحدة بهدوء خالص.. ولو أنت من محبي الجداول حاول تعمل جدول يومي تقسم فيه وقتك هيساعدك كتير

2-نام كويس وكل كويس:

زي ما أنت عارف العقل السليم في الجسم السليم.. فكل أكل صحي ومفيد عشان جسمك يعرف يبقى نشيط ويكمل معاك وفي نفس الوقت حاول تنام ساعات نوم كافية عشان تبقى مصحصح كده وأنت بتذاكر وتعرف تفتكر اللي ذاكرته

3- ركز أكتر على المواد اللي قلقان منها:

أسأل مدرسينك في الحاجات الصعبة اللي خايف منها وخليهم يساعدوك في فهمها تاني من غير ماتوتر نفسك وممكن كمان تسأل صحابك يساعدوك فيها وده هيخليك أهدا لما تحس إنك ابتديت تلم المادة اللي قالقاك

4-حاول تعمل شوية تمارين أو تتمشى:

عشان الرياضة من أكتر الحاجات اللي بتقلل الـ stress وبتساعد صحتك تكون أحسن
وكمان بتزود هرمون الإندورفين اللي هيساعدك تقلل مستويات التوتر عندك وكمان تبقى خرجت الطاقة السلبية في المشي

5- ممكن تذاكر مع صحابك:

ده في حالة إنهم أصدقاء صالحة وهايشجعوك مش هيضيعوا وقتك ويخلوك تنكد على نفسك أكتر.. هتكون وقتها المراجعة مفيدة ليك وكمان هتحسن حالتك المزاجية وتحس إنك مش لوحدك وإن في كتير زيك

6- أتكلم مع شخص يطمنك:

لو حاسس إنك قلقان أوي ومش عارف تهدأ شوف شخص بتثق فيه وبتعتبره مثل أعلى ليك واتكلم معاه يطمنك ويقولك ممكن تعمل إيه وساعتها كلامه هيهون عليك ويدعمك

7-حاوط نفسك بالأفكار الإيجابية:

يعني حاول كده تبقى طيب مع نفسك وشجعها كده وهاتلها حاجات حلوة.. وماتفكرش في كل السيناريوهات اللي تخوفك وتخليق قلقان وبص للإمتحانات إنها حاجة زي أي حاجة في الدنيا محتاجة شوية مجهود وهتخلص.. وطول ما أنت بتقول لنفسك إنك هاتقدر تنجح فيها وإنك عملت اللي عليك أكيد هتوصل