إزاي تعرف أنت بتتطور في الاتجاه الصح.. ولا بتتطور في الاتجاه الغلط

ساعات واحنا قاعدين بليل بنأوفرثينك احنا شخصيتنا بتتطور ولالا وهل بقينا أنضج ولا لسه بنكرر غلطات زمان اللي كنا بنعملها.. بس الأهم من التطوير إننا نعرف هل أتطورنا للأفضل ولا فقدنا صفاتنا الكويسة في النص.. عشان كده هنقولكوا في الموضوع ده تعرفوا إزاي إنكوا اتطورتوا وفقا لموقع verywellmind و موقع psychologytoday وموقع healthline


تطور الشخصية من الحاجات اللي مابتجيش مرة واحدة وبتحتاج وقت وتمرين.. والتطور بيحصلنا بشكل طبيعي من خلال دروس الحياة اللي بناخدها من حيث لا نعلم أو من خلال مجهودنا الشخصي إننا نتطور عن طريق تثقيف نفسنا ومحاولتنا إننا نتعلم حاجات جديدة.. بس في حاجات معينة بتأثر علينا زي البيئة اللي أتربينا فيها والمجتمع اللي عيشنا فيه والحاجات دي هي اللي بتشكل شخصيتنا في الأساس من واحنا صغيرين

وعشان تعرف أنت صفاتك الإيجابية اتطورت ولا لا.. الدراسات بتقول إن في شوية صفات لو موجود فينا بتبقى دليل إن شخصيتنا بقت مرنة أكتر لما كبرنا وأكثر نضج من قبل كده زي:

1-إننا نكون إجتماعيين أكتر وبنعرف نتعامل مع الناس المختلفة
2-إن ضميرك يكون صاحي ومابتحبش تظلم حد
3-إنك تكون بتتقبل الناس زي ماهما  ومابتحكمش عليهم
4-إن تكون مستقر أكتر عاطفيا وبتعرف تتعامل مع مشاعر الحزن والغضب اللي عندك

ودي حاجات بتاخد مننا وقت ومجهود عشان نعرف نوصلها بتحصل بشكل تدريجي كل ما بنكبر ونتعامل مع مواقف مختلفة

أما بقى لو عايزين نعرف شخصينا أتغيرت في الإتجاه السلبي ففي شوية حاجات ممكن تخلينا ناخد بالنا من ده زي:

1- لما نلاقي سلوكنا مابقاش بيتوافق مع المواقف اللي بنمر بيها زي إننا نبقى أشخاص عدوانيين فجأة أو متقلبين المزاج
2-إننا يكون عندنا لامبالاة خاصة في المواقف الصعية
3-أو إننا نلاقي نفسنا بطلنا نتأثر بالأحداث الحزينة اللي بتحصل أو يكون عندنا تعاطف

وده غالبا بيكون بسبب تعرضنا لمواقف صعبة كتير ماقدرناش نتعامل معاها فده أثر على صحتنا النفسية وخلى ردود أفعالنا تتغير للأسوأ واحنا مش حاسين


ودي 5 نصايح تساعدك تطور شخصيتك:

1-تحاول تكون عندك عادات إيجابية: ودي حاجة بتيجي بالتمرين زي إنك تحاول تكون لطيف مع الناس أو صبور اكتر وده مش بيجي من مرة واحدة ده بيجي بالتكرار وإنك تخليها عادة عندك

2-غير المعتقدات الغلط اللي عندك: دايما بنقول لنفسنا إننا عمرنا ماهنعرف نتغير او هنبقى أحسن وطول ما بنقول لنفسنا كلام غلط كل ما بنصدقه ومابنتغيرش فالمرة الجاية قول لنفسك إنك تقدر تطور شخصيتك

3-ركز على إنجازاتك: حاول تمدح المجهود اللي بتعمله لحد ما تقدر تاخد خطوة تحقق فيها الفعل نفسه لأن ده هيخليك تبقى أنضج وتقدر الخطوات اللي بتعملها عشان تتطور

4-خد خطوات بسيطة: يعني من الأخر كده fake it till you make it
عالم النفس الإيجابي “كريستوفر بيترسون” بيقول إن شخصيته الانطوائية كان ليها تأثير  على حياته المهنية وعشان يقدر يتغلب على الموضوع ده قرر إنه يبدأ يتصرف بشكل منفتح في المواقف اللي محتاجة ده منه وده خلاه يبقى إجتماعي في الأوقات اللي محتاجة منه ده.