8 أسباب تخليك تختار تقول الحقيقة دايمًا
بما إننا كل يوم بنشوف ناس بتكذب سواء في حياتنا اليومية أو الشغل وبيتقفشوا وبيكون شكلهم وحش أوي.. فلو تعرف حد منهم ابعتله المقال ده عشان يوفر على نفسه قصص ومشاكل كتير هيتعرضلها.. وعملًا بمقولة “طريق الصدق قصير” …ومش بس كده.. هنقولك كمان على 8 فوايد للصدق وقول الحقيقة :
عشان الصدق طريقه قصير .. وعشان توفر على نفسك قصص ومشاكل كتير هتتعرضلها لو ماقولتش الحقيقة
الحقيقة هتوفر طاقتك ومش بتطلب مجهود
الكذب بيحتاج طاقة.. لأنك في معظم الأوقات هتضطر تكذب كذبة تانية عشان تغطي على الأولانية وواحدة تالتة عشان تغطي على التانية وهكذا إلى ما لا نهاية… وهتكون تحت ضغط إنك تفتكر كل كلمة وكل تفصيلة قولتها عشان لو حد سألك ماتغلطش وتقول كلام مختلف وتتقف.
الشخص اللي بيقول الحقيقة قريب للناس
الناس عادة بتدور على اللي يصارحها ويكون -بقدر الامكان – شخص سالك مش بيلاوع.. وبيقول الحقيقة وده طبعًا من غير ما يتخطى حدود الذوق والأدب.. وبالتالي بيتحط في إطار الأمانة والثقة والناس هتحترمك وتحب تتعامل معاه سواء في الحياة اليومية أو الشغل.
قول الحقيقة بيعبر عن شخصيتك الشجاعة
الشخص اللي بيختار أنه يكذب دايمًا بيكون متردد وخايف من المواجهة وده عكس الشخص الصادق اللي بيقول الحقيقة بيواجه وشجاع لأنه واثق في اللي بيقوله.
قول الحقيقة هيزود ثقتك في نفسك
الشخص اللي بيكذب زي ماقولنا بيكون قلقان في أي وقت يتقفش .. فبيكون متوتر وحاسس أنه بيعمل حاجة غلط .. وبيكون في حالة من عدم السلام الداخلي ومش بيحس أنه متقبل نفسه.. عكس الشخص الصادق اللي مافيش حاجة يخاف منها لأانه كده كده في السليم وراضي عن نفسه.
قول الحقيقة هيبعدك عن الإحراج
حابين نفكرك أن الحقيقة كده كده هتظهر وساعتها هيبقى حظك وحش أوي وشكلك وحش برضه وهتتحط في موقع محرج لا تتمناه لألد أعدائك.
الحقيقة هتحسن صحتك النفسية
وده أكدته أبحاث نشرتها الجمعية الأمريكية لعلم النفس وتبقول فيها أن الأشخاص اللي بيقولوا الحقيقة شهدوا تحسن صحي ونفسي كبير.. ودايمًا عنده شعور بالبهجة وأقل عرضة للاكتئاب لأنه مش حاسس بالذنب.
الحقيقة هتبعدك عن المشاكل الجسدية
التوتر الناتج عن قول الكذب والخيانة ممكن يعرضك لتدهور صحتك الجسدية وده بحسب مقال نشره المعهد الوطني للصحة العقلية وحذره فيه من الإجهاد المزمن اللي بيؤدي لمشاكل في القلب وارتفاع ضغط الدم والسكتة الدماغية.
الحقيقة تجذب الحقيقة
طبعًا حابين نفكرك أن الشخص السالك في العموم واللي بيقول الحقيقة خاصة بتكون دايرته شبهه وبيبعد عنه المنافقين والمزيفين ودي دايرة ربنا يكتبها علينا كلنا.
