8 حاجات لو عملتها هتساعدك تكون شخص مبدع

أوقات بنحس إننا مش مبتكرين كفاية أو ماعندناش مواهب مع إن في حاجات كتير ممكن تكون عندنا واحنا مش واخدين بالنا زي إننا بنعرف نفكر بشكل منطقي أو نرتب أفكارنا أو حتى نعرف ننجز شغلنا.. وكل شخص يقدر بسهولة يبقى كريتيف لو التزم بشوية حاجات تساعده في التفكير بشكل صح .. وبما إن النهاردة اليوم العالمي للإبداع والإبتكار هنقولكوا شوية نصايح تساعدكم تبقوا مبدعين أكتر وفقا لموقع inc وموقع printivity

1-أسأل الأسئلة اللي عايز تعرف إجابتها بشكل صحيح:
لو نفسك تعمل مشروع مثلا بدل ما تسأل نفسك إزاي أعمل حاجة زي دي.. أسأل نفسك إزاي أعملها أصلا بشكل صح أو إيه اللي يخليها مختلفة عن غيرها وتنجح؟
وجرب بنفسك كذا مرة الحاجة لحد ما توصل لنتيجة مناسبة وحاول تفكر في استخدامات تانية للأفكار اللي بتجيلك جايز تنطلق فكرة الابتكار من هنا!

2-حاول تكون خبير في الحاجة اللي عايزها:
النجاح مش بس في الموهبة الطبيعية اللي عندنا النجاح كمان بيجي من الممارسة والتكرار.. ومش بس تعمل الحاجة لا كمان تحاول تتقنها وتتعلم كل حاجة فيها.. لو عايز تتعلم لغة معينة أو تسافر بلد معينة جايز يساعدك إنك تتفرج عليها أكتر من خلال الانترنت وتشوف أفلام عنها وتقرأ معلومات تساعدك تفهمها أكتر

3-خليك منفتح على كل حاجة حواليك:
حاول تكون  عندك فضول للمعرفة وبتبحث عن كل حاجة بتفكر فيها ماتوقفهاش عن مجرد فكرة في دماغك.. لأن الأفكار دي هى هتساعدك تكون مبدع وجايز تكتشف حاجة فكرت فيها صدفة!

4-حاول تطلع أفكار مختلفة:
يعني مثلا فكر في الحاجات اللي حواليك ممكن تستخدمها في إيه تاني غير الاستخدام المعتاد؟.. وخلي عندك وقت مثبت بتفكر فيه وبتكتب فيه الحاجات المختلفة اللي بتيجي في دماغك وحاول بعد كده تدمج الأفكار مع بعض خاصة اللي مالهمش علاقة ببعض لأنه هيديك مساحة اكبر من الابداع وبعدها تقدر تختار منهم الأفكار الأحسن

5-غيّر وجهة نظرك عن نفسك:
الباحثين بيقولوا إن الناس اللي بتشوف نفسها محظوظة بيقدروا يلاحظوا كل حاجة أكتر من الناس اللي فاكرين نفسهم مش محظوظين وده بيخليهم ياخدوا فرص ويستغلوها كويس من غير ما يحسوا بقلق وتوتر يخليهم يفوتوا حاجة على نفسهم

6-جرب حاجات جديدة:
زي إنك تروح أماكن جديدة أو تسافر حتى لو يوم صدر رد!.. لإن عقلك هيتأثر بالمشاهد المختلفة اللي بيشوفها والأصوات وهيتعرف على حاجات جديدة وثقافات وأذواق مختلفة هتخليه يعرف حاجة جديدة ويتأثر بيها وجايز يترجمها لحاجة مبدعة

7-ماتخليش المرات اللي مانجحتش فيها تعوقك:
ساعات بنفتكر إننا طالما ماعرفناش نوصل من أول مرة نعمل اللي عايزينه نبقى كده فشلنا بس الحقيقة هى العكس تماما المحاولات الصغيرة اللي بنفشل فيها هي اللي بتوصلنا لاكتشاف جديد وبسبب أخطاء كتير بسبب دراسة حوادث حصلت!

8-حاول تكتشف مواهبك زي زمان:
واحنا صغيرين كنا نجيب ورقة وقلم ونكتب حاجات كتير بنفكر فيها وقصص وروايات وساعات بيكاسو اللي جوانا يخرج ونقرر نرسم كل حاجة حوالينا.. ارجع أعمل الحاجات دي من تاني عشان فعلا دي اللي هتساعدك تعرف حاجات عن نفسك وتعرف أنت موهوب في إيه…

ومن الأخر كل واحد عنده موهبته وأفكاره المختلفة وعلى رأي ألبرت أينشتاين Creativity is seeing what others see and thinking what no one else ever thought
يعني كل واحد بيشوف الحاجة بطريقته بس اللي هيميزك فعلا إنك تشوفها باختلاف وتاخد بالك من التفاصيل اللي ماحدش هيلاحظها غيرك أنت!