إزاي تعرفي إن الشخص اللي معاكي مش أمان وممكن يأذيكي؟  

سواء اختلافنا أو اتفقنا فهنلاقي إن العلاقات واخدة جزء كبير من حياتنا سواء بالإيجاب أو بالسلب.. ومهما هزرنا على مقولة إن فيه راجل ممكن ينور الست وراجل يطفيها إلا إننا بنرجع في الأخر وبنكتشف إن المقولة حقيقية بنسبة معينة.. العلاقات بتأثر على حياة الشخص بشكل ما فلما بيكون مرتاح ومبسوط بيقدر يظهر وينور والعكس طبعا صحيح.

وللأسف الشديد مش كل الناس بتبان على صورتها الحقيقية في أول العلاقات أو قبل ما العلاقة تبدأ فبنلاقي إن الطرف التاني وخصوصا الستات بتتعلق بالراجل اللي معاها بعد كده بتظهر عيوبه في العلاقة واحدة واحدة.. وزي ما كل شخص فيه عيوب والست نفسها ممكن يكون فيها عيوب تظهر مع الوقت بس فيه مقولة دايما للأمهات إن فيه عيوب تعديها وعيوب ماينفعش تعيشي وتبني بيت معاها.. ومن أصعب العيوب دي الشخص العصبي أو اللي مابيعرفش يتمالك أعصابه وقت انفعاله واللي ممكن يأذي الست اللي معاه 

وبعد ما كلنا شوفنا حادثة رجل الأعمال “معتز سامي” اللي خنق مراته وشوفنا صورهم مع بعض قبل الحادثة وإزاي “مرام” كانت بتقول عليه كلام جميل في كابشن صورهم على الأكاونت بتاعها على فيسبوك.. فخلينا نقولك إزاي تعرفي من الأول إن الشخص ده مؤذي ليكي قبل تتعلقي بيه وتحبيه.. حسب ما قال موقع “betterup” وموقع “psychcentral” موقع “relationshipsnsw”

1- عصبي على طول وبيفقد أعصابه بسرعة: 

لو الشخص اللي معاكي بيفقد أعصابه على أتفه الأسباب، وخصوصًا لو العصبية دي بتتحول لصوت عالي وتكسير حاجات أو حتى تهديدات دي علامة خطيرة بتدل إن الشخص اللي مش بيعرف يتحكم في غضبه ممكن في يوم يعمل تصرفات أكبر وأخطر

2- بيحسسك دايمًا إنك السبب:  

لو كل ما يحصل مشكلة يقولك: “إنتي السبب”، أو يحاول يقلب الترابيزة عليكي ويطلعك الغلطانة، ده معناه إنه بيحاول يسيطر عليكي نفسيًا ويخليكي دايمًا في وضع الدفاع عن نفسك.. وده نوع من أنواع التلاعب النفسي اللي بيبأذي جدًا

3- عنده تاريخ في التعامل العنيف:

لو عرفتي إنه قبل كده كان عنيف مع الإكس بتاعته أو حتى مع أسرته أو مع الناس اللي في الشغل حتى فخلي بالك عشان الشخص اللي عنده تاريخ في التصرفات دي غالبًا بيكررها

4- بيحاول يتحكم فيكي زيادة عن اللزوم:

لو دايمًا عايز يعرف كل حاجة بتعمليها زي بتكلمي مين وخارجة مع مين ولابسة إيه وبتأخدي قراراتك إزاي.. ده مش حب ده تحكم، الشخص اللي بيحاول يسيطر عليكي بالطريقة دي بيخليكي تفقدي إحساسك بالحرية وبتحسي كأنك محبوسة

5- بيحبطك دايمًا وما بيدعمكيش:  

لو كل مرة بتحاولي تطوري نفسك أو تعملي حاجة جديدة تلاقيه بيحبطك وبيقولك: “إنتي مش قدها”، أو “إنتي فاشلة”.. ده معناه إنه مش عايزك تكبري أو تكوني سعيدة، وده نوع من الإساءة النفسية اللي ممكن يهدم ثقتك في نفسك

6- بيهددك بالكلام أو بالفعل:

التهديدات سواء كانت كلام زي: “هسيبك” أو “مش هتشوفي خير غير معايا”، أو تهديدات ضمنية زي نظرات تخوف كل دي ريد فلاجز كبيرة أوي، عتشان لو التهديدات دي بدأت تتحول لأفعال لازم تفكري جديًا في إن العلاقة دي ممكن تكون خطر عليكي  

7- بيعتذر ويرجع يعمل نفس الغلط:  

لو كل مرة بيتعصب فيها عليكي أو يزعق وبعدها يعتذر ويقولك: “أنا متغيرتش عشانك”، ويرجع يعمل نفس الحاجة، ده معناه إنه مش حقيقي في اعتذاراته، وده جزء من دائرة الإساءة اللي ما بتخلصش

فتعملي إيه لو لاحظتي العلامات دي؟  

1- واجهيه بهدوء:  

جربي تتكلمي معاه عن تصرفاته وتأثيرها عليكي، لو لقيتيه مش بيتقبل كلامك أو بيتعامل معاكي باستهتار دي علامة إنه مش هيتغير 

2- اطلبي مساعدة حد تثقي فيه:  

حاولي تحكي لمامتك أو أختك أو صاحبتك المقربة وشاركيهم مخاوفك. ومشاعرك ممكن يدعموكي ويوجهوكي تعمل إيه

3- لو حسيتي بخطر، ابعدي على طول:

ما تستنيش لحد ما الموقف يبقى خطير واسمعي كلام نفسك وحدسك.. سلامتك النفسية والجسدية أهم من أي علاقة

4- فكري في نفسك ومستقبلك:  

أهم حاجة تفكري فيها وتسألي نفسك عليها هي “هل عايزة تكملي حياتك مع شخص ممكن يدمرك أو يأذيكي؟” أكيد لا.. فاختاري دايمًا اللي يخليكي مرتاحة وسعيدة

وفي النهاية لو حسيتي إن العلاقة اللي إنتي فيها مليانة توتر خوف وتحكم يبقى لازم تعيدي التفكير فيها.. وخليكي دايمًا عارفة إن سلامتك أهم من أي حاجة وإن  من حقك إنك تعيشي حياة سعيدة وفيها أمان.