9 خطوات لتخزين اللبس الشتوي الجلد بطريقــة صح عشــان يعيش معاك!
ماحسيناش بالشتاء خالص السنة دي غير وهو بيودعنا.. واللبس الشتوي اللي اشترناه مالحقناش نلبسه.. فنعمل إيه بقى؟ صح هنشيله للشتاء الجاي خاصة إن اللبس الشتوي بالذات بيغلى مع كل سنة.. خاصة الجواكيت والبناطيل الجلد.. فهنقولك تخزنه صح إزاي ومايقشرش في 9 خطوات!
- تنضيف الجاكيت: من التراب أو بقايا الزيوت أو الميك أب أو البقع.. باستخدام قماشة ناعمة جافة مافيهاش مياه.. أو باستخدام منتج مصمم لتنضيف الجلد.. ومشيها على شكل حركات دائرية.. وسيبه ينشف في درجة حرارة الأوضة.. وابعد عن مجفف الشعر وأشعة الشمس بدل ما تشقق الجلد
- الترطيب: استخدم مرطب خاص بالجلد بحركات دائرية على الجاكيت أو البنطلون.. إنك تدفع شوية في مرطب الجلد أحسن من إنك تدفع ألوفات في جاكيت جديد.. حط المرطب ده بقماشة على الكتاف والسوست والأماكن المعرضة أكتر إنها تتشقق.. سيبه 30 دقيقة قبل ما تخزنه وكرر ده كل 3 شهور
- استخدم الورق: حطه في الجيوب والإيدين.. عشان مايحصلش ثنيات في الجلد
- اقفل كل الزراير والسوست.. ولف الجاكيت/ البنطلون بورق من بره
- حطه في الأكياس القطن أو القماش.. لأن الأكياس البلاستيك بتزود الرطوبة وبتعمل فطريات
- بلاش تخزنه في شنط الشتوي وتتنيه.. حطه في دولاب بعيد عن الشمس وأشعتها.. لأنها بتأثر على لون الجلد وبيبهت.. ويكون الدولاب فيه تهوية كويسة
- اختار الشماعة المناسبة: زي الشماعات العريضة عشان تشيل الجاكيت كله والكتاف فماتتشققش
- خزن الجاكيت/ البنطلون الجلد بعيد عن اللبس الجينز أو الجواكيت الملونة عشان ألونها ماتأثرش على الجلد ويبوظ
- طلع الجاكيت/ البنطلون الجلد كل كام أسبوع من التخزين وهويه بس من غير ما تخرج منه الورق
وبعـد النصايـح دي ماينفعش الجاكيت يقشر منك أو يبوظ.. لأن الحالة تعبانة ومش هتقدر تجيب غيره فخلي بالك!
