9 نصايح لو عايز تشجع حد 

الناس كلها بتعمل مجهود كبير طول الوقت ولكن فيه أوقات بتيجي مابيقدروش يكملوا وبيبقوا محتاجين بس كلمة تشجيع واحدة.. عشان كده إنك تشجع شخص بيخليك جزء مهم من أي مجتمع أو عيلة بتتحط فيها خصوصا إن أي كلمة تشجيع ليها في بعض الأوقات مفعول السحر وبتعبتر مساعدة معنوية لكل اللي بتحبهم.. لكن إنك تشجع شخص ساعات مابتبقاش بمجرد كلام بس وله طرق مختلفة.

موقع “whatsdannydoing” قال في مقال من مقالاته إزاي تقدر تشجع شخص على حاجة أو تخليه راضي عن نفسه وعن مجهوده:

1-  ابدأ بنفسك:

الموضوع يبان إنه بديهي بس الطبيعي إنك تبقى أناني شوية وقبل ما تساعد غيرك ساعد نفسك حتى لإن تشجيع الناس ورفع معنوياتهم بيبقي محتاج طاقة، فأنت محتاج تخلي بالك من نفسك الأول وتدي لرفاهيتك الأولوية عشان تعرف تشجع الناس بعد كده.

2- اتعلم إزاي تسمع:

الغرض من إنك تشجع حد هو إنك ترفع معنوياته أو تحفيزه أو إقناعه بقدراته وأساس النجاح هو إنك تسمع، وعشان تشجع شخص لازم تفهم المشكلة كويس الأول وتتعاطف وعشان تعمل ده لازم تسمع منه كويس عشان كده اديهم اهتمام كويس وهما بيتكلموا وبيشرحوا من غير ما تقاطعهم، فمثلا لو الشخص قالك أنا حاسس إني مش كويس كفاية فممكن تقوله تعيد نفس الجملة عشان تجبره يوضح اكتر، وخليك فضولي واسأل أكتر لإن ده هيخليهم يحسوا إن حد بيسمعهم وهيوصلهم لنفسهم لأساس المشكلة، وأصلا حقيقة إنك سمعت ممكن يبقى هو ده كل التشجيع اللي محتاجينه.

3- خليك معاهم: 

من أهم النصايح اللي محتاج تعرفها لو عايز تشجع أي حد هو إنك تسيب اللي في ايديك وتركز معاه لو فاتح التلفزيون أو بتفرج على فيديو وقفهم أو سيب الموبايل لو ماسكه خليك مركز معاه، واهتم بكل حاجة والشخص هيقدر ده.

4- خليك واعي بنفسك:

حاول على قد ما تقدر ماتكونش شخص أناني وتتكلم عن نفسك وسيب احتياجاتك وآرائك ومبادئك في حتة على جنب وأنت بتتكلم معاه خصوصا لما تبقى بتخصك ومش مفيدة ولا ضرورية له، وبكده هتتحسن قدرتك على تشجيع الناس بشكل كبير لو عرفت نفسك والحاجات اللي تخصك وتسيطر على نفسك وتسيب غرورك وحياتك برا الموضوع

5- اسأل نفسك لو كانوا عايزين تشجيع بجد:

اسأل نفسك لو كانوا فعلا محتاجينك تشجعهم وممكن تسألهم على طول عموما هما محتاجين إيه دلوقتي أو أنت تقدر تساعدهم إزاي.. فلو كانوا فعلا مش محتاجين إلا حد يسمعهم ممكن تسمعهم بس وأحسن حاجة هو إأنك تسمعهم وتأكدلهم مشاعرهم، وقولهم جمل زي “أه ده فعلا صعب” “حقك” “فاهمك” “مش عارف أنت إزاي مستحمل ده” “أنا أسف فعلا إنك عديت بكل ده” وخليهم يقولوا بنفسهم الحاجات اللي هما محتاجينها.

6- ابعد عن الكليشيهات والجمل المبتذلة وخليك حقيقي:

وقت ما الشخص بيبقى محبط بيبقى عايز يسمع أي حاجة إلا الكلام اللي كله كليشيهات أو جمل التنمية البشرية، تخيل أنت محبط وكل حاجة سودا في عينك فيجي واحد صاحبك يقولك “ماتقلقش كل حاجة هتبقى كويسة طول ما عندك إرادة، أكيد هتحترم مجهودهم بس مش هيأثر فيك خالص، فخليك حقيقي وصادق وخليك نفسك يعني وأنت بتقدم التشجيع ولو كنت مش قادر تفكر في أي حاجة المفروض تقولها عادي اعترفله بده وقوله “أنا مش عارف أقول إيه بس أنا أسف جدا لكل اللي أنت حاسه واتمني تعمل حاجة فعلا عشان تبقي أحسن”.. وهتتفاجئ من رد فعل الشخص اللي هيستقبل الكلام بشكل كويس عشان ردك عليه حقيقي فعلا وأنت شخص حقيقي مش مبتذل.

7- ماتوقفش دورك عند الكلام بس:

زي ما الكلام مش هو الطريقة الوحيدة للتشجيع والصمت كمان طريقة، فمن أحسن الطرق برضه هو إنك تتطبط على الشخص حرفيًا مش مجازيًا أو تحضنه أو تمسك إيده وفكر في إن فيه 5 طرق للتعبير عن الحب وهما إنك تخدم شخص أو تجيبله هدايا أو تقضي معاه وقت كويس أو تتكلم معاه أو إنك تسلمه، وتقريبًا الناس هتحب إن تبقى نفس الطريقة اللي يتحبوا بيها حد يشجعهم بيها برضه.

8- اعمل ده باستمرار:

بلاش تلوم نفسك لو ماكنتش بتعرف تشجع الناس الموضوع مش سهل كده، الموضوع محتاج إنك تعود نفسك تسمع وتتواصل وتتعاطف وتضحي ودي مش حاجات سهلة يعني دي مهارة ومحتاجة وقت، وبالتعود إنك تعمل ده أو المحاولات حتى هتعرف تعمله عشان كده حاول في كل فرصة يبقى شخص محتاج منك تشجيع تجرب، ومع مرور الوقت هتحس إنك عرفت تاخد الدور ده كويس.

9- خد بالك وأنت بتقدم النصايح:

عارفين إنك ساعات بتبقي عايز تساعد فساعات بتبقي عايز تقدم نصيحة من وجهة نظرك وتقولهم المفروض يعملوا إيه أو مايعملوش إيه، وللأسف مش دايما بتبقي دي الطريقة الصح لإن أي نصيحة هتقدمها هتبقى بتعتمد على نظرتك أنت للعالم وخلفيتك وطريقتك في الحياة، وبالتالي هتبقى بتعمل إسقاط عليه وبدل ما تعمل كده خليك واعي بنفسك واعرف حدودك واعرف إنه لو ماحدش طلب وجهة نظرك وطريقتك في حل الموضوع فالتشجيع مش بيتضمن إنك تقدم نصايح.