خضراوات وفواكه تطرد من جسمك السموم

بنقضي وقت طويل في الشارع فبنقعد نرمرم وناكل من بره ومانعرفش هو نضيف ولا لا وهل إيدهم متعقمة وهما بيطبخوا الأكل ده ولا إيه النظام.. وأخرة الرمرمة بتلاقي جسمك بيحوش السموم دي فيه.. عشان كده هقولك على 9 خضراوات وفواكه تساعدك في طرد السموم من جسمك

1- اللفت 

أكتر خضرة فيها مضادات أكسدة قوية ودي بتقوي مناعتك وكمان بيحميك من السرطانات والالتهابات.. وفيه حمض الفوليك اللي ليه أهمية كبيرة للأعصاب ومليان بوتاسيوم اللي بيحميك من الجلطات والسكتات الدماغية ويقوي صحة قلبك 

2- الجزر

محدش فينا ماسمعش جملة مامته “الجزر بيقوي النظر” وهو فعلًا بيقويه.. وده عشان فيه فيتامين أ ومركبات نباتية معظمها بيتحول لفيتامين أ في الجسم.. كمان ده غير إنه بيحسن عملية الهضم وبيحمي من الإمساك فبتقدر تتخلص من سموم جسمك وبيحسن وظائف الكبد فقدرته على معالجة السموم بتزيد

3- البرتقال

كله فيتامين سي وده بيقوي قدرة الكبد في التخلص من السموم وكمان بيحسن جهازك المناعي.. وبيحافظ على حركة المعدة والأمعاء بسبب الألياف اللي فيه غير قابلة للذوبان.. وفوق كل ده فيه ألياف قابلة بقى للذوبان بتبطئ عملية الهضم عشان تدي وقت لجسمك يمتص العناصر الغذائية

4-  الجرجير

بينشط أنزيمات الكبد عشان يطهر الجسم من السموم وده عشان هو فيه مركب “الجلوكوسيد” اللي بيخلص الكبد من السموم وكمان بيضعف مجموعة من مكونات الجينات السرطانية 

5- الليمون

نقول إيه ولا إيه عنه غير جملته الشهيرة “كيف تمرضون وعندكم الليون!”.. وده عشان فيه فيتامين سي اللي الجسم بيحتاجه عشان يكون مادة الجلوتاثيون اللي بتساعد الكبد يطهر السموم اللي اتكونت نتيجة مواد كيميائية ضارة

6- الثوم

لو اخدت منه واحدة في اليوم هيطهر الدم والأمعاء من أي بكتيريا ضارة وأي طفيليات معوية وفيروسية.. وبيمنع تراكم السموم على الشرايين وبينشط أنزيمات الكبد

7- الكرفس

سواء عملته عصير وشربته او حتى أكلته فهو ليه دور كبير في إزالة السموم من الجسم عشان فيه مركبات مضادة للسرطان ده غير إن فيها أكتر من 20 مادة مضادة للالتهابات وكمان بيحمي من أي عدوى ويقوي مناعتك كده

8- التفاح

أهم فاكهة بتنضف الدم نفسه من السموم الفعالة وده عشان هي كلها ألياف قابلة للذوبان اللي اسمها “البكتين ” وبسبب الألياف دي مستوى السكر في الدم بيتظبط.. لأنه لو ماتظبطش الكلى هتُتلف

9-  البطيخ

داخلين بقلبنا في الحر وهو الوحيد اللي هيرطب عليك وكمان اعتبره دواء طبيعي.. وده لأنه فيه حمض “السيترولين” اللي بيساعد الكبد إنه يصفى الأمونيا فبيساعد الكلى إنها تخرج السموم من خلال البول من غير أي إجهاد للكلى

10- السبانخ

فيها مادة اسمها “الكلوروفيل” ودي اللي بتدي اللون الخضر ده ليها ومش بس كده هي كمان مضاد للالتهابات وشرب السبانخ كعصير بيخرج السموم علطول من الجسم

وفي الآخر بعد كل الخضراوات والفاكهة دي مالكش حجة ولا تقول أصل طعمها مش حلو.. لأنك محتاج من وقت للتاني تعمل تنقية لجسمك من السموم عشان جهازك المناعي يبقى قادر يهاجم أي بكتيريا أو فيرس