لأول مرة.. اكتشاف فلكي لميلاد مجموعة شمسية جديدة
كل يوم ممكن يظهر قدامنا بحث أو ورقة علمية بتتكلم عن الكون والفضاء من حوالينا.. بس يوم الأربعاء 16 يوليو العلماء اكتشفوا إننا ممكن نشوف حاجة عمرنا ما شوفناها قبل كده..
في بحث جديد اتنشر في مجلة “Nature” بيوثق فيه فريق من العلماء اكتشافهم للحظة ميلاد نظام شمسي جديد
إيه هو الاكتشاف؟
رصدت الدراسة بداية ظهور نجم سموه “HOPS-315” واللي شبهوه بالشمس بتاعتنا وبيبعد عننا مسافة “1300” سنة ضوئية.. لاحظوا كمان إن حواليه قرص من الغاز والغبار اللي بيتعرف بـ “الغبار الكوكبي الأولي” وده المكان اللي بتتكون فيه الكواكب فيما بعد وتدور حوالين النجم ده
الرصد ده تم بتليسكوب “جيمس ويب الفضائي”.. وقدروا يلاحظوا وجود معادن بلورية تحتوي على “أول أكسيد السيليكون” (SiO).. دي بقى لما بتتعرض للحرارة بتبدأ تتكثف وتتجمع بمرور الزمن وتكون فيما بعد “الكواكب المصغرة” ودي اللي بتكون بداية تكوين “الكواكب الصلبة”
وفي البحث قالت “ميليسا ماكلور” المعدة الرئيسية للدراسة.. إن وجود البلورات في الحالة الغازية دي ومع درجات الحرارة المرتفعة دليل على بداية تكون الكواكب الصلبة.. لأن ده نفس اللي حصل في بداية تكوين نيازك قديمة موجودة في نظامنا الشمسي
إيه أهميته؟
الاكتشاف ده مهم حسب ما قال “ميريل فانت هوف” لإن دي أول مرة يتم فيها رصد بداية تكوين مجموعة شمسية.. وده اللي ممكن من خلال متابعته يعرفنا على حاجات حصلت في تاريخ مجموعتنا الشمسية وكمان نشوف إيه هي مراحل الأولى لتكوين الكواكب والمجموعات الشمسية عامة
وده فيديو بيوضح شكل المجرة الجديدة وبعدها عننا:
