إزاي زياد الرحباني عمل نقلة فنية في مسيرة فيروز؟

صوت فيروز الهادي والخجول وصل لمجده مع ارتباطها بعيلة الرحابنة سواء على المستوى الفني أو العاطفي.. وتيجي سنة  1979 تقرر جارة القمر تفاجئ جمهورها بانفصالها عن عاصي الرحباني بعد سنين طويلة من الخلافات العائلية.. وزي ما جمهورها ربط مجدها بارتباطها الفني بعاصي الرحباني فكروا إن نهايته برضه هتكون مع نهاية الارتباط ده.. بس عشان فيروز مليئة بالمفاجأت كان نهاية ارتباط أغانيها مع عاصي وبداية ارتباطها بزياد الرحباني نقلة كبيرة فرقت في مسيرة فيروز

سألوني الناس

ده كان أول لحن لحنه زياد الرحباني لفيروز وهو عنده 14 سنة بس.. عاصي الرحباني كان كاتب أغنية لمروان محفوظ بس لما توفى قرر منصور الرحباني إن زياد يلحنها.. فلما لعب زياد اللحن انبهر منصور الرحباني باللحن وقال إنه هيغير كلمات الأغنية وهيكتب كلمات مخصوصة للحن المبهر اللي لعبه زياد واللي بقى في الأخر “سألوني الناس”

ع هدير البوسطة

الأغنية في الأصل ماكتبهاش ولا لحنها زياد الرحباني لجارة القمر.. لكنه كتبها لمسرحية “بالنسبة لبكرا شو” اللي كانت من ضمن المسرحيات اللي عملها في مسرحه الخاص في محاولة منه للاستقلال عن والده ووالدته.. ولما غنى جوزيف صقر الأغنية وقت عرض المسرحية عجبت عاصي الرحباني أوي وطلب منه إن جارة القمر والدته تغنيها في حفلتها الجاية في باريس واتفقوا فعلًا وغنتها والأغنية عجبت جمهورها

معرفتي فيك

ده كان أول ألبوم مشترك بين زياد الرحباني وفيروز سنة 1984.. ووصفته الصحافة اللبنانية بـ “نهاية فيروز” بس الوصف ده محدود وفيه قصر نظر للنجاح الجبار اللي حققه الألبوم اللي كانت ولا زالت كل أغانيه لحد دلوقتي بتتسمع سواء الصبح مع فنجان قهوة أو بالليل مع نسمات الصيف أو حتى في مطر الشتا.. زي “خليك بالبيت” و”رح نبقى سوا” و”ما قدرت نسيت” و”عودك رنان” اللي كانت على لسان كل لبناني وقت الحرب الأهلية اللبنانية

كيفك انت

فترة تعاون زياد الرحباني مع فيروز كانت تعتبر مرحلة نضوج الموهبة الخجولة ونقلة كبيرة في شخصيتها الفنية.. وده لأن “زياد” قرر يحول تجربة “سفيرة لبنان إلى النجوم” الفنية لتجربة قصصية.. فتبقى أغنية بتحكي قصة كلماتها بسيطة تقدر تسمعها في يومك العادي.. واللي عمله زياد الرحباني ده قدم فيروز بشكل جديد لفئة أصغر في السن وشعبيتها زادت

وهيفضل زياد الرحباني هو الوحيد اللي بص لصوت جارة القمر بعدسة مختلفة قادرة مش بس تخلي الجمهور يتمزج بصوتها في الأغنية لكن كمان عمل توليفة مميزة ونادرة بين صوتها واللحن والكلمات فضلت مخلية الأغاني دي لحد النهاردة تريندنج رغم إنها معمولة من سنين كتيرة