اتقل تاخد الأحلى مش بس الحلو.. إيه هو تأجيل الإشباع/ Delayed Gratification وإزاي تطيق الانتظار؟

أوقات تبقى عامل دايت فتلاقي مامتك نازلة عليك بفتة ولحمة والحلو طاجن أم علي.. فتقوم منهار قدام كل المغريات دي وتفكس للدايت مع إنك هتموت وتعمل فورمة أو تخسي عشان المناسبات الجاية.. فـ بتاخد حلو دلوقتي وماتستناش مع إن لو تقلت شوية هتاخد الأحلى.. ده تأجيل الإشباع أو Delayed Gratification اللي هنتكلم عنه

• إيه هو الـ Delayed Gratification أو تأجيل الإشباع؟

إنك تدي الأولوية للأهداف الكبيرة اللي هتحصل في المستقبل قدام أي هدف صغير هيبسطك بشكل مؤقت بس هيبوظ رحلة الوصول لهدفك الكبير.. يعني تمسك نفسك قدام الفرحة المؤقتة عشان لما تتقل تاخد حاجة حلوة

• ليه بنستعجل ناخد الحلو اللي جنبنا ونسيب الأحلى اللي بعيد؟

حسب موقع Verywell mind فيه شوية حاجات علم النفس المعاصر شايفها السبب اللي بيخلي الانتظار صعب: 

1- الضمان والثقة: مكافآت المستقبل بنشوفها مش مضمونة وده بيخلينا نقول عصفور في الإيد أحسن من 10 على الشجرة فبتقرر تاخد اللي قدامي دلوقتي 

2- الدوبامين: المكافآت الفورية بتحصل بسبب جزء في الدماغ اسمه (النواة المتكئة أو Nucleus Accumbens) وده مسؤول عن تنظيم إفراز هرمون الدوبامين فكل ما تاخد مكافأة الجزء ده بيفرز دوبامين.. وجزء تاني وهي القشرة الجبهية الأمامية أو Prefrontal Cortex ودي مابتفهمش المكافآت المتأخرة ولا الحاجات اللي مش ممسوكة

3- عوامل فسيولوجية: زي الجوع والتعب والإجهاد وعلاقتهم بقوة الإرادة.. التعب بيزود إفراز هرمون الكورتيزول اللي بيعطل وظايف القشرة الأمامية اللي بتكون مسؤولة عن التحكم والانفعالات 

4- الظروف الشخصية: طبعًا أي ظروف اجتماعية بتعيشها بتأثر على قراراتك واختياراتك في الحياة وده اللي تهين شرف الدايت وتاكل عمال على بطال

• اختبار ستانفورد مارشميلو/ Stanford marshmallow experiment

فيه عالم النفس “والتر ميشيل” عمل اختبار في السبعينات بيشرح فكرة تأخير الإشباع دي ببساطة.. جاب مجموعة من الأطفال سنهم من 4 لـ 6 سنين وحطهم في أوضة مقفولة وحط على الترابيزة اللي قدامهم قطعة مارشميلو واحدة وطلب منهم يستنوا 15 دقيقة ولو قعدوا وماكلوهاش ساعتها هيديهم بدل الواحدة اتنين.. وردود فعل الأطفال اختلفت فمثلًا فيه اللي أكل المارشميلو على طول وماستناش واللي قاوم كتير ولهي نفسه بأي طريقة.. والنتيجة إن حوالي تلت الأطفال بس هم اللي قدروا يستنوا وماياكلوش عشان ياخدوا اتنين بدل واحدة

واستنتج إن الأطفال اللي صبرت عملوا ده بسبب إنهم تجنبوا الحاجة اللي بتغريهم وحفزوا نفسهم بالمفاجأة الأكبر اللي مستنياهم وإنهم كانوا واثقين في كلام الدكتور اللي عمل التجربة.. والاختبار ده كمان وضح إن الأطفال دي كانوا بيجيبوا درجات أكبر وقدراتهم الاجتماعية كمان كانت أحسن.. وده معناه إن حتى لو الصبر صعب قدام أي حاجة بتغريك تقدر تتعلم إزاي تماطل إنك تأجل التصرف الغلط اللي هيحرمك من مكافأة أحلى 

• إزاي تعرف تتقل عشان تاخد الحاجة الحلوة رغم المغريات؟

وده ينقلنا لنقطة إن “عارفين إن الحلال أجمل هننتظر” و”اتقل تاخد حاجة حلوة” بس صعب إنك تعمل ده فهنقولك على شوية حاجات ممكن تساعدك:

• حط هدف واقعي وحددله وقت: بسط الدنيا على نفسك وعلى قد لحافك مد رجليك.. شوف قدراتك وظروفك هيجيبوا إيه وعلى أساسهم حدد هدفك وكمان مدة تحقيقه عشان ده هيشجعك تصبر وتمسك نفسك الكام يوم دول لإنك عارف إن نهاية الانتظار ده كله عنب.. ولما هتعمل كده وتلاقي نتيجة هتحس إنك بتنجح فعلًا على العكس لو حطيت مدة كبيرة وماتحققش حاجة هتحس بالفشل وتغني ظلموه

• ثق في ربنا وفي نفسك: سلمها يا عم وابقى عارف إن رزقك والحاجة الحلوة هتجيلك يعني هتجيلك في المستقبل عشان دي حاجة مكتوبالك فمش لازم تستعجل رزقك وتاخد اللي قدامك دلوقتي وخلاص

• البعيد عن العين بعيد عن القلب: يعني لو عامل دايت مش لازم تقعد تشوف فيديوهات لطاجن أم علي ولا فرخة مشوية جنبها حلة محشي.. حاول تسكرول بسرعة من الفيديوهات دي.. ولو مامتك عاملاهم على الغدا ركز على طبق السلطة والبروتين وتخيل الفورمة اللي عاوز تعملها وفرحتك بيها يا جدع

• خليك مع الصحبة الكويسة: وابعد عن أصدقاء السوء.. فمثلًا مايكونش عندك امتحان بكرة وصديق السوء يقولك ننزل نلعب بلاي ستيشن وتنزل معاه ويلهيك عن المذاكرة.. فخليك مع الناس اللي عندها نفس أهدافك وبتفكر زيك عشان هتشجعوا بعض تنجحوا سوا

وعامة يعني فاهمين إن طعم اللهو حلو بس  صناعة المجد أحلى بكتير.. وماتجرب تصبر يا أخي انت خسران إيه!