إيه حكاية أول جامعة في مصر وبدأت إزاي؟
الدراسة بدأت والجامعات دخلت خلاص.. بس زمان الجامعات شكلها كان مختلف عن دلوقتي.. فتعالى نحكيلك عن بداية الجامعات في العالم وكمان في مصر
إيه أول جامعة في العالم؟
حسب موسوعة جينيس للأرقام القياسية أقدم جامعة في العالم هي جامعة “القرويين” ومكانها المغرب وبالظبط في مدينة “فاس”.. الجامعة دي كانت عبارة عن مسجد كبير مصنوع من الطوب والرمل الأصفر.. واللي أسستها ست اسمها “فاطمة بنت محمد الفهرية”.. والروايات بتقول إنها ورثت فلوس كتيرة جدًا بعد وفاة أختها وجوزها وروايات تانية بتقول إنها ورثت برضه بس من أبوها واختها.. بس بعيدًا عن الشخص اللي ورثت منه الفلوس كان قرارها إنها تستثمر الفلوس دي في إنها تبني بيهم جامعة سنة 859 م
سبب تسمية الجامعة بـ “القرويين”
مدينة “فاس” اللي الجامعة فيها.. كانت مقسومة لمدينتين في عهد إدريس التاني حسب دراسة للكاتب عبد الهادي التازي.. مدينة الأندلس ودي عاش فيها لاجئين كتير ومدينة تانية سكنها القيروانيين نسبة للـ “القيروان” في تونس.. بس اتخفف الاسم وبقى”القرويين” عشان تبقى أسهل في النطق
إيه أقسام الدراسة فيها؟ وإمتى بقت جامعة رسميًا؟
“فاطمة الفهرية” بنت المسجد ده عشان توفر للقيراونيين مكان يتعلموا فيه جنب العبادة.. وعشان المسجد بيجمع الناس فمن هنا جيه اسم “الجامعة”.. إنه المكان اللي بيتجمع فيه الناس عشان يتعلموا حاجة.. فكانوا بيدرسوا علوم الدين والطبيعة والبلاغة والمنطق والفلك والتاريخ والكيمياء والموسيقى يعني كل الكليات الموجودة دلوقتي.. بس كل ده وهي تحت اسم جامع “القرويين”.. لكن في سنة 877 ميلاديًا الاسم اتحول لجامعة “القرويين”
طب عندنا في مصر.. الجامعات بدأت إزاي؟
- الموضوع بدأ من عند عند أحمد باشا المنشاوي وده كان عضو في أول مجلس نيابي في مصر.. كان عاوز يعمل جامعة على حسابه.. بس مات قبل ما ينفذها لكن الفكرة مامتش وناس كتير اهتموا بيها وعملوا اكتتابات في الجرايد بس برضه الموضوع ماكملش.. بس زعماء مصريين تانيين اهتموا بالفكرة زي محمد عبده ومصطفى كامل ومحمد فريد وقاسم أمين وسعد زغلول في بداية القرن العشرين لكن الاحتلال البريطاني رفض الفكرة عشان مكنش عايز الثقافة تنتشر بين المصريين ويرفضوا الاحتلال ويطالبوا بالتحرير
- بس مصطفى كامل عمل اكتتاب عام لصالح تأسيس الجامعة ونشره سنة 1906 وشجع المصريين لحد ما التبرعات وصلت لـ 4400 جنيه.. وفعلًا تم افتتاح الجامعة بشكل رسمي يوم 21 ديسمبر 1908 في عهد الخديوي عباس حلمي التاني
- اسم الجامعة في الأول كان الجامعة المصرية وبعد كده بقى جامعة فؤاد الأول سنة 1940 وبعد ثورة 23 يوليو 1952 اتغير الاسم لـ “جامعة القاهرة” وهو الاسم اللي تعرفه دلوقتي
محطات في تاريخ جامعة القاهرة
- بدأت المحاضرات في نفس يوم الافتتاح بس ماكنش فيه مقر دايم للمحاضرات وكانت بتتعمل في قاعات متفرقة بيعلنوا عنها قبلها لحد ما الجامعة خدت مكان في سراي الخواجة نستور جناكليس_ واللي حاليًا بقت موجودة فيه الجامعة الأمريكية_ بس خلال فترة الحرب العالمية الأولى مبنى الجامعة اتنقل لسراي محمد صدقي في ميدان الأزهار عشان يوفروا فلوس لأنها كانت فترة مالية صعبة
- بدأت جامعة القاهرة تنقل الطلاب المتفوقين زي طه حسين لجامعات أوروبية عشان ياخدوا الدكتوراة ويرجعوا يدرسوا للطلاب علوم حديثة
- ضمت الجامعة مدرسة الحقوق والطب والآداب وده حصل في سنة 1923 وخلوا كلية الآداب هي مركز الجامعة.. وفي سنة 1925 ضموا كلية العلوم والصيدلة
- وفي سنة 1928 بقى لجامعة القاهرة مقر ثابت_ اللي انت تعرفه دلوقتي_ وهو الأرض اللي اتبرعت بيها الأميرة فاطمة بنت الخديوي إسماعيل للحكومة
جامعات بعد جامعة القاهرة
وبعد تأسيس جامعة القاهرة اتبنت جامعات تانية زي جامعة الإسكندرية سنة 1942م واللي كان اسمها “جامعة فاروق الأول”.. وبعدها جامعة عين شمس في العباسية سنة 1950 اللي كان اسمها “جامعة إبراهيم باشا الكبير”
وبكده عرفت إيه اللي وصلك لمحاضرات 8 الصبح والتكليفات الجماعية.. حاول تنبسط بأيام الجامعة وتجرب فيها حاجات مختلفة عشان تعرف نفسك أكتر وكمان تكون صداقات جديدة!
