دراسة جديدة.. معدتك بتزودلك مشاعر القلق والتوتر والاكتئاب

سألت نفسك قبل كده ليه لما بتكون داخل على حاجة مهمة زي امتحان أو انترفيو بتحس بألم في معدتك وتوتر مفاجئ؟ اللي بيحصل مش صدفة..

في دراسة اتعملت على”243″ شخص في جامعة “آرهوس” الدنماركية.. اكتشف الباحثين فيها ن فيه علاقة قوية بين إيقاع المعدة وصحتنا النفسية

الدراسة اللي اتنشرت في مجلة “Nature Mental Health” قالت إن المعدة عندها جهاز عصبي خاص بيها بيولد إشارات كهربائية منتظمة “حوالي 3 نبضات في الدقيقة” وده بيخليها دايمًا في حالة نشاط حتى وهي فاضية

وفي نفس الوقت دماغك كمان بتبعت موجات كهربائية مختلفة زي “ألفا” و“بيتا” و“دلتا” حسب حالتك النفسية والجسدية

العلماء لاحظوا إن عند بعض الناس الموجات دي في الدماغ بتمشي على نفس الإيقاع بتاع المعدة.. وده بيسموه “تزامن المعدة والدماغ”

في الطبيعي.. التناغم ده بيكون مرن وبيساعد الجسم والدماغ يشتغلوا بانسجام
لكن لما بيزيد أكتر من اللازم -زي في فترات القلق أو الاكتئاب- بيبدأ الدماغ والمعدة “يتحكموا في بعض” بشكل مبالغ فيه

يعني لو معدتك أصدرت إشارة توتر بسيطة.. الدماغ يستقبلها كأنها حالة طوارئ ج.. فتوترك يزيد وتحس بألم جسدي أو قلق من غير سبب واضح

أما لما تكون في حالة هدوء واتزان التزامن بين المعدة والدماغ بيبقى متوازن أكتر.. وكل واحد فيهم بيعرف إمتى يسمع للتاني وإمتى يفصل

طب تعمل إيه عشان تتغلب على نوبات التوتر والقلق دي؟

1- التنفس العميق: بيساعد على تهدئة العصب الحائر “vagus nerve” اللي هو وسيط بين المعدة والدماغ.. وده بيرجع الإيقاع بينهم للتوازن المطلوب 

2- تنظيم الأكل: لما بتأكل بهدوء وتمضغ كويس ده بيساعد المعدة إنها تبعت إشارات أمان للدماغ بدل إشارات القلق 

3- قوم اتحرك: أي حركة أو رياضة بسيطة زي المشي لمدة حتى لو قليلة بتساعد الجهاز العصبي المتحكم في المعدة إنه يقلل تزامن التوتر 

4- ماتفكرش في الألم: ;كتير من الناس لما بيدأ يحس بألم في معدته بيبدأ يتوتر أكتر وده بيوصل إشارات تزود القلق في الدماغ أكتر