مش بس الأمراض.. إيه عدوى المشاعر وإزاي تحمي نفسك منها؟
لما صاحبك يكلمك يحكيلك مشكلة ويفضفض شويتين وتقفلوا.. بتحس بعدها إنك مخنوق وزعلان رغم إنها مشكلته مش مشكلتك وكأنك اتعديت منه.. وده اللي هنكلمك عنه هو عدوى المشاعر/ Emotional Contagion وهنقولك إزاي تتعاطف مع اللي قدامك من غير ما يأثر على سلامك النفسي حسب موقع Positive Psychology وPsychology Today وVeryWell Mind
إيه عدوى المشاعر/ Emotional Contagion؟
مصطلح بيوصف طريقة انتشار مشاعر اللي قدامك السلبية أو الإيجابية ليك من غير ما تحس.. وده بيحصل إما بطرق غير لفظية زي تعابير وشه ولغة جسمه ونبرة صوته أو بطرق سلوكية ولفظية.. فممكن لو اللي قدامك كان بيشكتي من حال الدنيا تلاقي نفسك بقيت مضايق ومش مرتاح.. وعشان دي حاجة بتحصل بشكل غير واعي فكل ما تفهم أكتر عنها هتعرف تحمي نفسك من اللي قدامك وفي نفس الوقت تتعاطف معاه
إيه بيخلي عدوى المشاعر دي تحصل؟
- طبيعتنا: إحنا بطبعنا كائنات اجتماعية بنتفاعل مع كل حاجة موجودة في المكان اللي حوالينا فسلوكنا ومشاعرنا بتتأثر
- الملاحظة: أي طفل بيراقب اللي حواليه بيعمل إيه وبيقلده.. وأه انت كبرت بس لسه الملاحظة موجودة فيك.. فلما بتراقب وصف الشخص اللي قدامك لمشاعره بيخلي عقلك يسجلها ويتأثر بيها بعدين
- عوامل البيئة: مش لازم تتأثر بمشاعر شخص.. انت ممكن تتأثر بالبيئة اللي حواليك.. بمعنى إن لو أوضتك متروقة بتحس بسلام وهدوء عكس لو حواليك دوشة هتضايق وتبقى غضبان.. وكمان الأفلام فلما بتشوف فيلم كوميدي بتلاقي مودك حلو
- مشاعرك ليها دور: بيبقى سهل إنك تتأثر بمشاعر اللي قدامك السلبية خاصة لو انت أوريدي مودك مش أحسن حاجة
- قلة النوم والأكل والتوتر بتزود تأثرك بالمشاعر الخارجية لأنك مرهق في الأصل
- الخلايا العصبية: فيه نظام في جسمك اسمه the mirror neuron system بيشتغل زي المراية بالظبط.. فالخلايا العصبية في الدماغ بتبدأ تعمل نفس اللي بيعمل الشخص اللي قدامه
- مدى قرب الأشخاص: كل ما كان الأشخاص قريبين ليك كل ما سهل تتأثر بيهم.. فبتفرح لو شوفت أخوك أو صاحبك فرحان.. ومش بس القرب العاطفي لأ.. كمان القرب في المكان فمثلًا لو زميلك في الشغل متحمس دايمًا في الشغل تلاقي نفسك من غير ما تحس عندك طاقة رهيبة تنتج يومها
إزاي تتعاطف مع اللي قدامك من غير ما يأثر على سلامك النفسي؟
- راقب نفسك: وشوف انت حاسس بإيه لما سمعت فضفضة اللي قدامك واكتب ده في ورقة واعرف إيه أكتر حاجة ضايقتك عشان تفهم نفسك أكتر
- اعمل حدود: لو حاسس إن معندكش طاقة تسمع حد عبر عن ده وماتخافش تقول “لأ”.. واعرف هل انت الشخص المناسب اللي هتعرف تدي للي قدامك المساعدة في حالته ولا لأ
-
- خصص وقت لنفسك: عشان تفهم فيه مشاعر المضايقة أو الحزن أو الغضب.. ولما تفرغها أول بأول هتلاقي نفسك مرتاح وانت بتسمع اللي قدامك
- فرق بين التعاطف والشفقة: لأن الشفقة بتخليك تتأثر بكل اللي بيتحكيلك وكأنك انت اللي بتعيشه.. لكن التعاطف هو إن متفهم اللي قدامك بيعيشه بس من غير ما تغرق معاه
- خليك واضح: خاصة مع الناس القريبين منك واسألهم لو هما بيبالغوا في الكآبة والموضوع أبسط من كده ولا لأ؟ ولو بيبالغوا اطلب منهم يتكلموا عن الواقع زي ما هو من غير أي إضافات ومبالغة
- ابعد نفسك: لو مش قادر تستحمل الوضع.. وماتروحش الأماكن اللي فيها الناس اللي عارف إنهم متشائمين وبيعقدوا الدنيا.. وحاوط نفسك بالناس الصح
وفي كل الأحوال طبيعي إن كل حد بيمر بفترة ممكن تكون صعبة فطبيعي يحس بالحزن ورد فعلك الطبيعي إنك تدعمه.. بس اللي مش طبيعي إنك تفتكر إن سعادته هي مسؤوليتك
