أكيد في وقت من الأوقات قابلت حد بيتلعثم في الكلام أو يعني بـ “يتهته” زي ما احنا بنقول.

إيه هو التلعثم؟

التلعثم هو اضطراب في النطق وبيبقى فيه الشخص عارف هو عايز يقول إيه بالظبط لكن بيحصل فقدان متقطع للتحكم في الكلام وعلشان كده الكلام بيطلع مقطع.. وهي مالهاش سبب واحد فبيكون منها أسباب جينية وأسباب بيئية زي نشأة الطفل وكمان اختلافات دقيقة أوي في الشبكات العصبية المسئولة عن النطق لكن لحد دلوقتي ماقدروش يفصلوا الأسباب المختلفة دي عن بعض.. ودايمًا بتظهر في سن مبكر إلا لو كانت بسبب حالة صحية جديدة.

التلعثم عند الأطفال

التأتأة أو التلعثم عند الأطفال بيحصل ما بين سن 2 و5 سنين وده بيكون بسبب تأخر النطق واللغة عند الطفل عن مستوى اللي عايز يقوله.. يعني ببساطة دماغ الطفل بتكون عايزة تعبر وتقول حاجات لكن تطور اللغة عنده لسة ماكملش.. فعلشان كده بيحصل تلعثم أو إعادة كلمات كذا مرة أو تقطيع الكلام.

مش كل الأطفال بيحصل معاهم ده.. لكنه حاجة طبيعية والطفل بيتعمل الكلام.. وبالذات لما بيكون لسة بيتعلم كلمات جديدة وأول مرة يقولها.. لكن دي شوية حاجات لو حصلت فوقتها الطفل بيكون محتاج متابعة:

• لو التلعثم بدأ بعد سن 3 سنين ونص
• لو فضلت موجودة لأكثر من سنة
• لو حسيت إن الطفل بيتوتر أو بيبذل مجهود بدني عند الكلام
• لو التلعثم بقى يزيد مع الوقت
• لو بدأ يتجنب الكلام أو يقول إن الكلام صعب عليه
• لو فيه تاريخ عائلي لحد كبير بيتلعثم في الكلام

في الحالات دي الأهل بيكونوا محتاجين يروحوا لحد متخصص في التخاطب.. لكن برضه فيه حاجات يقدروا يعملوها في البيت تساعدوا بيها الطفل زي:

• التكلم مع الطفل بهدوء وماتستعجلوش وإن يبقى فيه توقف متكرر أثناء الكلام
• تقليل عدد الأسألة اللي بتسألها للطفل وقت ما هو بيتكلم.. لأن الأطفال بتتكلم بحرية أكتر وهم بيعبروا عن أفكارهم مش بيجاوبوا اسألة
• استخدام تعابير الوجه والجسد علشان تبين ليه إنك مهتم باللي بيقوله أكتر من طريقة كلامه
• تخصيص وقت في اليوم للطفل بإنك تسمعه وتسيبه يتكلم براحته