كتب محمد حاتم

اتنين من عوالم مختلفة.. ولو شوفت الاتنين في الشارع ماشيين مع بعض.. هتحس إنك جليتش من جليتشات الحياة.. شعبان عبد الرحيم وبوب ديلان.. اتنين مفيش حاجة بتربطهم ببعض.. لا شكل ولا زمن ولا مكان.. ومن بيئتين مختلفين ثقافيًا واجتماعيًا.. بس الحقيقة إن الاتنين فيه حاجة بتربطهم ببعض.. وهي إنهم غنوا عن الحاجات والقضايا اللي تهمهم بجد مش اللي بتجيب فلوس أو بتنجح عشان كده اسمهم هيفضل موجود دايمًا وصعب يتنسي… وهنا هنقولكم الرابط العجيب بين شعبان عبد الرحيم وبوب ديلان.

البداية

الاتنين بدايتهم كانت اللي بيتقال عليها بداية “عصامية” وماحدش ساعدهم وكانوا معتمدين بس على مزيكتهم وعلى نفسهم.

فهتلاقي شعبان عبد الرحيم بدأ كموجي.. راجل على قد حاله.. وبداياته كانت إنه بيغني في الأفراح لحد ما اشتهر وبقى شعبولا بلحنه المشهور

أما بوب ديلان.. فهو هرب من بيت أهله مش معاه غير جيتاره وبيدور على مكان يغني فيه.. زي ما بيقول Pete Singer في تقديمته ليه فيغني Mr.Tambourine Man

المزيكا

الاتنين قدموا لينا مزيكا جديدة.. بغض النظر بتعجبك ولا لأ.. فمن ألحان وصوت شعبان عبد الرحيم اللي بقت ماركة مسجلة.. لكلمات بوب ديلان اللي خلته ياخد نوبل في الأدب في 2016.. ماحدش يقدر ينكر إنهم كانوا مختلفين

اللي عايز أقوله قبل الفلوس

الاتنين غنوا للحاجات اللي بتهمهم وبتهم الناس اللي بيسمعوهم وتحس إنهم شافوا في الدنيا كتير فحبوا يقولوا للناس ملخص تجاربهم وخبراتهم زي مثلًا:

هبطل السجاير

Subterranean Homesick Blues

حتى أغاني الفراق كانت عندهم مختلفة فهتلاقي بوب ديلان بيقول
I wish that for just one time you can stand in my shoes you will know how a drag it is to see you

أو زي ما شعبولا لخصها في جملة واحدة “أنا اتخنقت منك”

ضد العنصرية والتفرقة

شعبان وبوب كانوا ضد أي تفرقة عنصرية أو اجتماعية.. فشعبان عبد الرحيم أدى لينا نصيحة من ذهب.. واللي هي “فيها إيه لو واحد ونغير الأسامى؟”

وبوب ديلان عمل أغنية عن واحد اسمه hurricane اتحبس ظلم في قضية قتل بسبب لون بشرته.

ضد الحرب والقتل

الاتنين موقفهم كان واضح من الحروب والعنف.. فعم شعبان هاجم بكل صراحة أمريكا وإسرائيل وقال انهم سبب خراب العالم.. وبوب ديلان هاجم كل من ليهم يد في الحروب وكان دايمًا ضد الحروب اللي بتدخلها أمريكا زي حرب فيتنام اللي انضم للمظاهرات اللي كانت ضدها.

الفن بتاعهم بيعبر عنهم

الاتنين كان أهم حاجة عندهم إن فنهم يعبر عنهم.. فماكنش هدفهم الأول هو إرضاء النقاد أو الذوق العام اللي ماشي.. فهتلاقي شعبان عبد الرحيم بيقول “معرفش اغني فافي ولا اقول ميرسي ونو”

وبوب ديلان اللي قرر إنه يطلع يشتم أغاني الـ folk  لما زهق منها ومن ضغط الجمهور عليه.. وعمل أغنية Maggie’s Farm واللي شبه فيها النوع ده بالمزرعة اللي بيتفرض عليها فيها رأي معين وقال إن ده بيقتل شخصية الفنان ويقرر إنه مش هيغنيه تاني.

أما في الحب.. فالاتنين بيحبوا ومش يتكسفوا يقولوا إنهم اتجرحوا

وحتى برة الفن.. الاتنين فيهم صفات من بعض في الحياة.. فشعبان عبد الرحيم دايمًا شايل مطوة علشان لو حصل أي نوش.. ومابيهموش حد

أما بوب ديلان فمابيخافش حتى لو اتهدد بالقتل

وعلشان كده هتلاقي دايمًا الفن بيجمع أكتر ما بيفرق.. لما بيكون فن حقيقي.. وده اللي خلى اتنين مايعرفوش بعض يجيلهم نفس الأفكار.. كل واحد بطريقته وعلى حسب ثقافته.