من زمن الديناصورات.. تفاصيل اكتشاف نوع جديد من التماسيـح في الصحراء الغربيـة

النهاردة يوم الاتنين 27 أكتوبر، موقع جامعة المنصورة  نزل بيان بيعلن فيه عن نجاح فريق مركز الحفريات الفقارية بالجامعة في اكتشاف نوع جديد من التماسيح القديمة بيرجع لعصر الديناصورات.. هنقولك تفاصيله وأهميته!

تفاصيل الاكتشاف

• الفريق اكتشف نوع جديد من التماسيح اسمه “تمساح الوادي- واديسوكس كسّابي (Wadisuchus kassabi) ” وبيعتبر أقدم عائلة من التماسيح البحرية اللي عاشت من حوالي 80 سنة في فترة الديناصورات

• بالنسبة لاسمه فهو بيتقسم لـ 3 أجزاء: “وادي” وده عشان تم اكتشافه في محافظة الوادي الجديد بالصحراء الغربية، والجزء التاني “سوكس” فهو مشتق من اسم الإله المصري القديم “سوبك” إله القوة والخصوبة برأس تمساح، والجزء الأخير “كسابي” عشان يخلد ذكرى العالم المصري الراحل أحمد كساب اللي كان رائد كبير في الجيولوجيا وعلم الحفريات في مصر وساعد أجيال كتيرة من الباحثين

• طول التمساح بيتراوح بين 3.5 و4 أمتار، وعنده خطم (الجزء البارز من وش الحيوان اللي بيضم الأنف والفم والفك) طويل جدًا وأسنان حادة

•  بيختلف عن باقي الأنواع من التماسيح بإن عنده 4 أسنان أمامية بدل من 5، وفتحات أنف موجودة فوق الخطم عشان تساعده على التنفس من سطح الماء، وتجويف عميق عند التقاء الفكين

• الفريق اكتشف حفريات التمساح في واحتي الخارجة وباريس، وبقايا التمساح شملت أجزاء من جماجم وأنوف كتيرة في مراحل عمرية مختلفة، وده اللي خلى العلماء يفهموا تطور النوع ده من التماسيح

• النوع ده من التماسيح عاش على السواحل والبحار الضحلة عكس التماسيح الحالية اللي بتعيش في المستنقعات والأنهار، ده غير أسنانه الحادة اللي ساعدته يعيش في فترة الديناصورات

أهمية الاكتشاف

• اكتشاف النوع ده من التماسيح بيعرفنا الحياة في العصور القديمة وده لأنه كشف عن أقدم عائلة من الديرصوريدات (Dyrosauridae) وهو النوع اللي نجا من انقراض الديناصورات وده اللي خلى النوع ده من التماسيح  يعرفنا تطور الزواحف القديمة لأنه شهد على مرحلة الانتقال الفارقة في تاريخ الحياة على الأرض

•  الدكتورة سارة صابر، المعيدة بجامعة أسيوط وعضوة الفريق البحثي والمؤلفة الرئيسية للدراسة قالت إن الخصائص التشريحية المميزة للتمساح ده وفرتلهم رؤى جديدة عن كيفية تطور الزواحف مع البيئات البحرية بعد الانقراضات الكبيرة
  واستخدامهم تقنيات التصوير المقطعي ثلاثي الأبعاد خلاهم يعرفوا تفاصيل تشريحية دقيقة، وده وفرلهم صورة أوضح للتركيب الداخلي للنوع ده من التماسيح

• بلال سالم، طالب دكتوراه بجامعة أوهايو وأستاذ مساعد بجامعة بنها وعضو الفريق البحثي، قال إن أن الدراسة خلتهم يعيدوا رسم خريطة تطور الزواحف عالميًا بعد ما عرفتهم عن الدور المحوري لأفريقيا، وخاصة الصحراء الغربية المصرية في نشأة وتطور النوع ده من التماسيح البحرية

• نتائج التحليل التطوري وضحت إن تنوع الفصيلة دي من التماسيح بدأ في أفريقيا، وده بيوضح أهمية التراث الجيولوجي المصري في فهم تاريخ الكائنات الحية على كوكب الأرض

• الدكتور هشام سلام أستاذ الحفريات الفقارية ومؤسس مركز MUVP واللي قاد فريق الباحثين قال إن أهمية الاكتشاف مش بس في إنهم لقوا فصل جديد هيضيفوه لتاريخ التماسيح القديمة ولكن كمان في تسليط الضوء على الكنوز العلمية المستخبية في الصحراء الغربية المصرية