فيه مدعكة جوا.. الصوت اللي في دماغك بيقدمك ولا بيرجعك لوره؟

آخر الليل دماغك بتستلمك تفكير في كل تصرف عملته وبتبدأ تشوف غلطاتك وتجلد نفسك عليها.. لو فاكر إنك كده مراقب نفسك وواعي ليها فانت محتاج تكمل الموضوع ده للآخر!

مبدأيًا إيه الفرق بين الوعي بالذات Self awareness ونقد الذات Self Criticism ؟

• الوعي بالذات – Self Awareness: حسب موقع Positive Psychology وموقع VeryWell Mind هو إنك فاهم ومتقبل أفكارك وصفاتك من غير ما تحكم عليها، فمثلًا لو انت شخص عصبي وخلقك ضيق بتعرف ده وبتبدأ تتقبله وتشتغل إنك تغيره بس من غير ما تتعصب إنك عصبي 

• النقد الذاتي – Self Criticism: حسب موقع ThriveWorks وموقع Psychology Today فهو تقييم نفسك بقسوة حسب توقعات الناس اللي بتحطها على تصرفاتك وإنجازاتك؛ فمثلًا لو بتحاول تطور شوية من نفسك في الشغل، مهما تعمل بتقف لنفسك على الواحدة وبتجلدها لأنك خايف تقع من نظر المعايير اللي حاططهالك مديرك

ليه بتنتقد نفسك من غير ما تحس؟

• التربية: في الطفولة بتتعلم نقد الذات بطريقتين: إما بتلاحظ الناس اللي بتحبهم والقريبين ليك بينتقدوا نفسهم أو لو بتتعرض انت لنقد مستمر منهم وبيقارنوك باللي حواليك كتير
•  المجتمع: وضغوطاته اللي بيحطها عليك بتأثر على نظرتك عن الانجارات وبتخليك مثالي بشكل غير واقعي؛ فبتحكم على نفسك بمعاييرهم مش معاييرك
• الصدمات: بتأثر على استيعابك للرسايل السلبية عنك وده بيخلي فيه صوت زنان بينقدك على أي تصرف بتعمله 
• فاكر النقد حافز: عشان تنجز وتعمل أحسن ما عندك سواء كنت بتعمل ده بوعي أو لأ.. خاصة لما بتسمع قصص الناجحين اللي بتبدأ بنقدهم لنفسهم وبعدها بيوصلوا.. فبتربط نجاحك بالنقد والقسوة وإن من غيرهم هتكون كسول ومش هتوصل لحاجة 
• فاكره تواضع: فعشان مش عايز تبان متكبر بتقعد تقلل من نفسك وتنتقدها؛ فبيفضل التصرف ده ملازمك طول حياتك

إزاي تحول نقد الذات لوعي بالذات؟ 

وعشان نقد الذات بيقلل من ثقتك بنفسك وبيرفع مستوى القلق والإكتئاب.. دي شوية نصايح عشان تحول نقد الذات ده لتصرف إيجابي أكتر وهو الوعي بالذات.. حسب موقع Psychology Today وموقع Mind Space:

• اعرف سبب النقد: لما بتعرف صوت جلد الذات ده جاي منين وبدأ إمتى هتكون كده بتحط إيدك على سبب المشكلة

• • اعرف مشاعر النقد: يعني بتنتقد نفسك وبتجلدها عشان خايف ولا مكسوف ولا قلقان.. ومن هنا بتبدأ توعى لنفسك ومشاعرها؛ عشان لما تعرف المشاعر اللي وره النقد هتحدد ليه  
  • خليك حيادي: يعني بص على تصرفاتك من غير ما تيجي على نفسك ولا تطبل ليها برضه.. شوف الواقع زي ما هو بالظبط
  • خد بالك من اللهجة اللي بتكلم بيها نفسك: وأول ما تحس إن طريقة الكلام مع نفسك مابقتش أحسن حاجة ، خد بالك وافرد ضهرك شوية 

• اهدى على نفسك شوية: وماتقفش على نفسك بالمرصاد على كل حركة.. وافتكر الجهد اللي بتعمله لكل هدف عايز تحققه.. ولو مثلًا حاسس إنك عكيت في حاجة افتكر إن ده صوتك انت وإن أكيد فيه ناس عجبها اللي عملته

وفي الآخر ماتقفش لنفسك على الواحدة وتجلد ذاتك على كل حاجة بتعملها.. وانزل بسقف توقعات تحت شوية خليها في المعقول منه عشان ماتلومش نفسك بعدها!