حكاية المزارع الفيتنامي اللي مانمش بقاله 62 سنة
اليومين اللي فاتوا انتشرت أخبار عن مزارع فيتنامي اسمه “تاي نجوك” مانمش من 62 سنة وماعندوش مشكلة صحية واحدة.. فهنحكيلك قصته:
إمتى بدأت حالة الأرق معاه؟
الموضوع بدأ من سنة 1962 لما جاتله حمى شديدة في العشرينات وقت حرب فيتنام، وبعد ما خف لقى إنه مابقاش عارف ينام، ولحد دلوقتي وهو عنده 81 سنة عينه ماغمضتش ليلة واحدة
طب هل جرب أي طرق لمقاومة الأرق. وإيه نتيجتها؟
جرب “نجوك” طرق كتير عشان يعرف ينام، زي الأدوية والأعشاب بس برضه مابينامش وكل أهله وجيرانه بيقولوا إنه ماشافوهوش بيغفل حتى طول السنين دي
رأي الطب في حالة “نجوك” إيه؟
المزارع ده راح لدكاترة كتير ودوروا على أي مشكلة صحية خطيرة بيواجهها لكنهم لقوا إن ضغط دمه وقلبه ودماغه كلهم طبيعيين في معجزة طبية مش لاقيين لها تفسير؛ لأن الأبحاث الطبية كلها بتقول إن الإنسان مايقدرش يعيش كل المدة دي من غير نوم ومايحصلوش أي تدهور سواء جسديًا أو حتى ذهنيًا، قلة النوم بتأثر على جهاز المناعة وبتزيد من فرص الإصابة بالعدوى الفيروسية وبتقلل من سرعة الشفاء منها، فالراجل اللي قاعد في أدغال فيتنام اتحدى الطب والدوا
هل “نجوك” بينام بس من ورا الناس؟
في سنة 2023 صانع محتوى أمريكي اسمه “درو بينسكي” بيوثق رحلاته في أماكن مختلفة بيسافرها على صفحته، زار “نجوك” في بيته وقعد معاه ليلة كاملة ولقاه نشيط بيزرع وبيطبخ وبيدخن كتير حوالي 70 سيجارة، ورغم كده لا بيكون نعسان ولا مرهق.. هو بيسترخي ساعة ولا ساعتين بس مش بينام النوم اللي نعرفه
طب أومال إيه التفسير لحالته؟
فيه مجموعة من الدكاترة بيفسروا حالة الأرق دي بإنها مرتبطة باضطراب ما بعد الصدمة؛ لأنه كان محارب في حرب فيتنام اللي استمرت من سنة 1955 لـ 1975، والطب بيقول إن مشاكل النوم من أشهر العلامات اللي بتظهر بعد الصدمات الكبيرة وإن أكتر من 99% من اللي عاشوا صدمات كبيرة بيعانوا من مشاكل في النوم سواء صعوبة بدء النوم أو حتى الأرق
وعلى الرغم إن الطب ما قدرش يحدد المدة اللي الحالة الصحية بتدهور بعدها لكن أطول فترة عاشها إنسان من غير نوم كانت 11 يوم و25 دقيقة، وبتظهر بعدها علامات تدهور زي ضعف الذاكرة والبصر والهلوسة وبطل قصتنا اتغلب على كل ده ربنا يديله الصحة
