هي الغيرة ممكن تتحول لدافع للجريمة؟ وإيه نوع الغيرة المطلوبة والغيرة الغلط؟

معظمنا بيغير بشكل عام على أشياء أو أشخاص في حياتنا بس فيه ناس بتظهر ده وبشكل كبير وناس تانية لأ.. وناس بتسيطر على الموضوع وعلى أفعالها وناس مابتقدرش.. فهل الغيرة ممكن تتحول دافع لتصرف كارثي كبير؟ وإيه هو نوع الغيرة المطلوب والنوع الغلط واللي مش مطلوب؟

حسب ncbi وحسب OxfordAcademic

1- هل الغيرة ممكن تتحول دافعًا للجريمة؟

حسب الدراسات النفسية والجنائية اللي بتربط الغير بالجريمة أكتر نوع غيرة بيسبب جريمة هو اسمه “جرائم الشغف – Crimes of passion” وكمان فيه الغيرة المرضية أو الوسواسية:

• أول حالة عندنا هي الغيرة المرضية “Psychotic Jealousy” ودي الشخص بيكون فيها عنده هلاوس وبيراقب ويفتش ويحقق كمان وبيتخيل خيانة مش موجودة والدراسات بتقول النوع ده مرتبط بعنف خطير 
• تاني حالة لو الغيرة أصبحت تملك هنا الشخص بيعتبر شريكه ملكه وأي تهديد في العلاقة بيحولها لانتقام وأبحاث كتير بتقول إن النوع ده أكتر ارتكابًا لجرائم الشريك
• لو الغيرة معاها اضطرابات نفسية زي الفصام أو اضطرابات شخصية ولو مفيش محاولة كمان لعلاج الأمراض دى
• كمان لو الغيرة اتجمعت مع عوامل مساعدة زي العنف الأسري أو تعاطي المخدرات أو الغضب العالي والاندفاع.. كل ده بيرفع احتمالية تحول الغيرة لعنف
• لو الغيرة بقت وسواس يومي أو الشخص بدأ يشوف إن العنف مبرر للخيانة 

2- الغيرة المطلوبة أو المحمودة “Healthy Jealousy”

ودي غيرة مش معتدلة بس ساعات بتكون أساس لحماية العلاقة زي إنك تخاف لو شريكك قرب لحد تاني بس المهم إن مفيش هوس بالموضوع

ساعات بتكون مطلوبة بدافع إيجابي للتحفيز أو العمل على العلاقة أو عشان الطرفين يقربوا من بعض 

وأهم نقطة بخصوصها إنها لا تؤدي إلى العنف

3- الغيرة التملكية “Possessive Jealousy”:

وده نوع أقوى من الغيرة بيكون فيه رغبة لتملك الشخص وممكن يكون متطور ويتحول لسلوك عدواني لو مفيش ضبط أو تحكم في الموضوع

4- الغيرة التفاعلية “Reactive Jealousy”:

ودي بتكون رد فعل على تهديد حقيقي زي الخيانة أو التلميح إن فيه طرف تالت وده أكيد طبيعي ولكن لو رد الفعل شديد ممكن يعمل مشاكل كبيرة

5- الغيرة الوسواسية “Obsessional Jealousy”:

نوع الغيرة ده بيكون مرضي جدًا بيكون فيه الشخص مهووس بفكرة الغيرة نفسها أو الفعل.. بيفكر فيها وبيفضل يراقب شريكه ودايمًا عنده شكوك وفيه دراسات ربطت الموضوع ده بالعنف اللفظي والجسدي

طب ليه ممكن بعض أنواع الغيرة تتحول لجريمة؟

• اضطرابات نفسية: زي الفصام أو الغيرة النفسية (psychotic jealousy) زي اللي بيحصل في بعض الحالات الجنائية
• المشكلات الشخصية: قلة الثقة بالنفس.. جروح نرجسية (نرجسية النفس أو الإيجو العالي).. الشعور بالإهانة وقت تهديد “العلاقة” أو “الأمان العاطفي”
• العوامل البيئية: الخلافات المستمرة.. الصراع مع الشريك.. أو محركات زي المواد المخدرة بشكل عام.. بعض الدراسات تربط بينها وبين الغيرة السلبية والعنف ضد الشريك 
• العوامل الثقافية: بعض الثقافات تعتبر الغيرة علامة على الحب أو التملك.. واللي ممكن يبرر سلوكًا عدوانيًا عندي البعض في إطار “حماية الشريك” والتربية طبعًا بيكون ليها عوامل وحاجات تانية لما بتلاقيها في طفولتك  ونشأتك بتفرق كتير كعامل أو جزء 

في النهاية الغيرة شعور إنساني طبيعي بيحصل لكن لما بيتجاوز الحدود ويبقى شك أو تملك أو هوس بيفقد معناه الإنساني والطبيعي.. وبتبقى زي بنزين أو قنبلة موقوتة ممكن تنفجر في أي وقت.. وعشان كده محتاج تكون أهدى وأفضل في التعامل مع الموضوع عشان مايتحولش لكارثة أو جريمة ويفضل في الإطار المحبوب والمقبول.