الـ saved posts تراكمت عليك؟ يبقى انت مريض اكتناز رقمي!
أوقات كده بتفتكر إن كان فيه فيديو حلو كنت عايز تشوفه.. أو معلومة كنت عايز تقرأها لما عدت قدامك.. فتاخد بعضك وتروح للـ saved posts وهناك تلاقي نفسك في مغارة من الحاجات اللي عملت ليها save ومارجعتش ليها.. ده بقى اسمه الاكتناز الرقمي أو الـ Digital hoarding.
يطلع إيه الاكتناز الرقمي أو Digital hoarding ده؟
إنك بتحب تعمل save لبوستات وفيديوز أو حتى إيميلات ممكن ماتكونش مهمة وانت مش عارف هتعمل بيهم إيه.. بس انت حاسس إنهم هيفيدوك في يوم من الأيام.
طب ليه بتعمل كده؟
عشان مساحة الموبايل اللي بتصوت من الصور اللي متأكد إنها في يوم من الأيام هتنفعك.. والفيديوهات اللي في الـ Saved ومش هتعرف توصلها.. هنقولك أبعاد الاكتناز الرقمي ده وأسبابه:
- الخوف من خسارة المعلومات (Fear of loss of information): إحساسك اللي بيقولك إنك هتتحط في موقف وهتبقى محتاج البوست ده ومش هتلاقيه هو اللي بيخليك تحتفظ بيه احتياطي بدل ما تتسوح
- الإشباع الفوري: لما بتجمع بوستات بتحس بالأمان كأنك أنجزت.. فتحويش البوستات دي بيديك شعور وهمي بالراحة والسيطرة
- التعلق العاطفي (Emotional attachment): كل فيديو بتشوفه أو صورة مش عايز تمسحها حسستك بشعور معين فبتبقى عايز تحتفظ بالشعور ده للأبد.. فحفظ البوستات دي بتكون زي ذاكرة للمشاعر بس على السوشيال ميديا
- أبو بلاش كتر منه: انت مابتدفعش فلوس لما بتـ Save أي بوست.. فبتـ Save براحتك بقى محدش هيقولك هات فلوس
- إرهاق اتخاذ القرار (Decision fatigue): بتشوف بوستات كتير أوي منها المهم ومنها اللي لأ.. فبتكسل تاخد قرار تحتفظ بأنهي وأنهي لأ وبترميهم كلهم على الـ Save.. فده بيخلي عندك كومة بوستات عاملة كركبة مخلياك أصلًا مش عارف توصل للبوستات المهمة فعلًا.. وكل ما تكتر البوستات بتتجنب أكتر إنك تاخد قرار تصفية البوستس دي
- العبء المعرفي الزيادة عن اللزوم (Cognitive Overload): الموضوع بيبدأ بإنك عايز تتعلم كتير وتاخد شوية خبرات مختلفة بس فكل ما تقابلك معلومة تعملها save
- السهولة: تصميم الأبليكيشنز سهل عشان يخليك تحوش أكبر قدر من البوستات.. وبما إنك بتشوف بوستات كتيرة من نفس النوع اللي بيعجبك وزرار الحفظ موجود قدامك فإنك تاخد القرار ده بيكون سهل شويتين.
- الدوبامين: بيزيد وقت الاحتفاظ بالمحتوى وده بيحسسك بالمكافأة الفورية والراحة.. على العكس لو عملت unsaved للمحتوى اللي انت محوشه بتلاقي إن الدوبامين قل.. فالمكافأة بتيجي من جمع المحتوى مش من استهلاكه فعلًا
ليه الاكتناز الرقمي غلط؟
- الإنتاجية بتقل: عشان عقبال ما توصل لبوست أو فيديو محتاجه ضروري.. هتاخد وقت كتير فبتتعطل وطاقتك هتروح وانت بتدور
- التوتر والقلق: البوستات اللي محوشها ومش عارف كل حاجة فيهم بتاعة إيه وتايه وسطها دي هتخليك متوتر ومش عارف انت فين وسط كل ده
- المساحة: لو انت مسجل صور أو فايلات على الاب توب أو الموبايل مش عارف تعمل بيها إيه بس أكيد هتحتاجها.. الحاجات دي كلها هتخلي الجهاز يستغيث ويبقى بطئ
- العبء المعرفي اللي اتكلمنا عنه بيزود الضغط على الذاكرة العاملة.. عشان الدماغ مابتتجاهلش الكركبة وبتحاول تنظم وتصنف كمية المعلومات دي فالتركيز والتخطيط بيقلوا
- كل بوست بتفكر في مسحه أو الاحتفاظ بيه بيحتاج قرار إدراكي وواعي منك.. وده بيستنزف من طاقة عقلك بسرعة وبالتالي قدرتك على اتخاذ القرارات في حياتك بشكل عام
طب والعمل؟
-
- خصص ساعة أو ساعتين في اليوم تتخلص فيها من البوستات/ الصور اللي مالهاش لازمة
- طريقة 1-2-3: احتفظ بأهم 3 بوستات حسب الأولوية.. راجع البوستات دي كل شهرين.. وامسح بوست واحد في كل مرة بتبص فيها على الحاجات الـ Saved
- حاول تعيد ترتيب الأولويات وتستبدلها بأفكار موزونة أكتر.. عشان أكيد مش هتحتاج الخمسين بوست اللي عملتلهم save في اليوم
- لو حتى عايز تعمل save.. خصص فولدر باسم لكل البوستات اللي شبه بعضها.. فمثلًا لو هتعمل save لفيديو عن تطوير شغلك فسمي الفولدر باسم الشغل.. ولو هتحتفظ بفيديو عن الصحة النفسية سمي بالاسم ده بحيث ماتتعبش وانت بتدور على البوست
- صحصح لنفسك وانت على السوشيال ميديا.. بمعنى إن تخلي عندك انتقاء لكل حاجة بتعدي عليك في التايم لاين خاصة وانت بتعمل Save
وفي الآخر لو ماعرفتش ترتب أوضتك زي ما مامتك اتنبح صوتها معاك.. حاول ترتب البوستات اللي ولعت في الـ Saved!
