نادي جلوكال الفني: مراجعة فيلم “Amadeus” الراقصون على السلالم “الميديوكرز”
تحب توصل لقمة مجدك وانت عايش وتشوفه وهو بيختفي ويتنسي قدامك؟
ولا ماتلحقش تشوف مجدك هيوصل لفين لدرجة إنه يكمل ويوصل لـ قرون بعد موتك؟
ده الفرق بين الشخصيتين في فيلم Amadeus موزارت “Mozart” و ساليري “Salieri”
الفيلم بيبدأ بمشهد في الشارع في زمن القرن الـ 18 وصوت شخص بيقول سامحني يا موزارت وبننتقل لواحد بيحاول الانتحار والخدم بيحاولوا يلحقوه وهم بيجروا بيه في التلج والعاصفة الثلجية اللي كانت شغالة بيعدّوا على قصر طالع منه موسيقى موزارت والناس جوا بترقص على ألحانه
بعدها بيروح زي مصحة لأي واحد مش عارفين يعالجوه عشان مكانش لسه الطب النفسي اتعرف أوي كان كله بيبقى تحت تشخيص واحد وكله ملوش علاج فـ بيتساب في المكان ده مع الكل لحد ما يموت.
بيظهرلنا ساليري بعد ما أنقذوه وهو في أوضة في المصحة وبيلعب بيانو ودخل عليه قسيس بيحاول يساعده ويوعظه فساليري سأله انت اتعلمت مزيكا؟ إجابته كانت آه
فلعب على البيانو لحن هو كان مؤلفه فالقسيس ماعرفهوش.
عزف حاجة تانية برضه ماعرفهاش فضل يعزف في مقطوعاته وبرضه القسيس ميعرفش ولا واحدة منهم وساليري قاله إزاي دول من أشهر المقطوعات اللي ألفتهم!
آخر ما يأس قاله أكيد هتعرف المقطوعة دي وبدأ يعزفها ولقى القسيس بيغنيها معاه وكملها حتى بعد ما وقف وقاله اه عارفها طبعاً دي عظيمة فساليري قاله دي لموزارت
ساليري شخص أرستقراطي وصل إنه بيعزف للعائلات المالكة وبيعلم بناتهم وأولادهم ومكنش هيقدر يوصل لكده إلا إذا كان شاطر فعلًا
ساليري كان بيسمع دايماً عن موزارت وإزاي ألحانه عبقرية وعظيمة وكان عايز يقابله لحد ما في يوم قابله فعلاً واتفاجئ انه إزاي شخص فعلاً موهوب لكن بيفتقر لأي أخلاق أو عادات كانت بتتعامل بيها الطبقة دي دايمًا وإنه مبذر مابيعملش حساب أي حاجة أهم حاجة عنده أنه يتبسط.
وفي أول لقاء ساليري كان بيعزف مقطوعة جديدة لسه بيألفها للإمبراطور ودخل موزارت وكان أول مرة يقابلهم فالإمبراطور حب يختبره فطلب من ساليري يديله الورق عشان يعزف اللي لسه مألفه.
موزارت قاله لأ شكراً اتسجّل في دماغي وفعلاً عزفه وكله اتْفاجئ بل قال ناقصها حاجة وفعلاً عدل عليها وبقت أحسن ومن وقتها ساليري حس بالإهانة لكنه معملش حاجة.
مع اختلاطه أكتر بموزارت ابتدى يكتشف مدى عبقرية موزارت ومقطوعاته اللي موزارت نفسه مش عارف إنها عظيمة للدرجادي
وحس بالغيرة إزاي حد زي ده يمتلك الموهبة دي كان بيتعذب لأنه هو أكتر واحد عارف شغله عظيم لأي درجة لأنه عارف استخدم إيه بس لما بيجي يجرب أنه يعمل حاجة زيه مابيعرفش خالص مهما حاول فبقى بيحضر كل أوبرا ليه متخفي وإعادتها مش عارف إزاي ممكن حد يعمل حاجة زي دي وبقى كل هدفه إزاي يدمره بأي طريقة.
ممكن ساعات تفهم شعور ساليري إنك شاطر في شغلك وكله يشهد لك بده لكن بتشوف حاجة انت عارف بتتعمل إزاي بس بتسأل نفسك ليه انا معملتش حاجة زي دي؟ ليه مفكرتش فيها؟
لكن تعالى نتخيل بدل ما ساليري خصص وقته وحياته إنه يدمر موزارت وماعرفش وفي الآخر شاف مجد موزارت وصل لأبعد شيء ممكن حتى بعد موته لكنه عاش وشاف كل حاجة وصلها بتختفي من قدامه حتى هو نفسه.
لو كان حاول يتعلم من موزارت ويحاول ينافسه كان ممكن مجد ساليري يوصل لفين؟.. لازم تفتكر دايمًا إن الرقص على السلم لفترة طويلة مش هيوصلك لحاجة
وإنك تحاول تطلع السلم مهما كان السلم طويل وصعب.
