نفسك في عزوة.. خد بالك سكة الانتماء دي آخرها وحش!

وانت بتبدأ تخرج للعالم الأكبر بعد الدراسة بتبقى متلغبط ومش عارف تحدد شخصيتك.. وده بيخوفك أكيد.. وحقك طبعًا لأن كلنا بندور على الأمان.. وعشان تحس بده.. كل ما بتلاقي حاجة شبهك ما بتصدق وتجري تقول خلاص أنا لقيت نفسي وبنتمي لده.. بس هو انت فعلًا بتنتمي لده ولا انت صنفت نفسك وخلاص بسرعة عشان تطمن؟ كمل وهنقولك!

• ليه الانتماء مهم لينا؟ وليه بنحب نحس بيه؟

1- الأمان العاطفي: لما بتحس إن ليك ناس شبهك تقدر تهرب لهم كل ما الدنيا تضيق عليك.. بتحس إنك مش لوحدك وإن فيه حد هيقومك أول ما تقع

2- الوحدة خطيرة: وعكس طبيعة البشر.. وعشان كده التواصل والانتماء بيساعدك تـ survive في الدنيا.. وزي ما بنقول القُفة اللي ليها ودنين يشيلوها اتنين

3- القبول: لما بتكون عندك لمتك اللي بتعتبرها زي أهلك بالظبط بتحس إنك مقبول ومتقدر زي ما انت بعيوبك قبل مميزاتك.. والقبول غير المشروط ده بيزود ثقتك بنفسك 

4- تكوين الهوية: إحساسك بإنك جزء من شئ أكبر بيدي معنى لحياتك

5- فايدة بيولوجية: الانتماء بيخلينا نحس بمشاعر حلوة زي الحب ونتصرف تصرفات صحية زي الضحك والحضن.. والحاجات دي بتزود إفراز هرمون الأوكسيتوسين وده معروف بهرمون الترابط وهو عبارة عن مهدئ طبيعي بيقلل معدل ضربات القلب وبيخفف استجابة الجسم للخوف 

• الأمان فين في الدنيا؟

هرم ماسلو للاحتياجات حدد شوية حاجات لما بتتحقق الواحد بيبقى مرتاح في الدنيا.. وقسمها حسب أهميتها من تحت لفوق لـ 5 مستويات: الأكل والنوم.. الفلوس والصحة.. الانتماء والحب.. التقدير وبعد كده تحقيق الذات.. ولما تيجي تبص للهرم هتلاقي إن بمجرد ما بتحقق أول مستويين بتبدأ تدور على التقدير والأمان اللي بييجي من الانتماء وإحساس إن حواليك عزوة تطمن.. فالانتماء بشكل كبير بيكون هويتك وبيوفرلك المساحة المناسبة اللي بيها توصل لقمة الهرم

• طب هو إيه الفرق بين التصنيف [Categorization] والانتماء؟ 

التصنيف هي طريقة عشان تكتسب من خلالها شعور مؤقت وسريع بالهوية والسيطرة.. وبييجي من حاجات سطحية أوي زي إنك بتصنف نفسك إنك بتحب الأندرجراوند عشان بس سمعت أغنية بالصدفة فحبيتها لكن مش بتحب النوع ده كله من الأغاني.. أو حتى بتصنف غيرك مثلًا بإنه طيب أو شرير طول ما انت ماشي

• والفرق إن الانتماء هو شعور عميق وحقيقي بتاخد وقت طويل عشان تكونه مع اللي حواليك وانت متقبل اختلافكم عن بعض.. أما التصنيف هو إنك بتعمل لنفسك وللي حواليك هوية زائفة من غير ما تتعب في بنائها وبشكل سطحي وسريع عشان تسكت خوفك من التوهان

وفي الآخر خليك عارف إن قيمتك مش بتاخدها من شوية قوالب جاهزة بتحط نفسك فيها وتقول خلاص دي شخصيتي.. وخد وقتك عادي في الدنيا عشان تعرف حقيقة نفسك فعلًا لأن لما هتعمل ده ساعتها هتحس بالانتماء الحقيقي لنفسك وهتعرف تحس بالانتماء للي حواليك