ليه لاعيبة الجولف وكرة السلة من أغنى رياضيين العالم؟
كل سنة لما بتطلع قوائم أغنى الرياضيين في العالم ناس كتير بتتفاجئ إن الصدارة مش دايمًا لنجوم كرة القدم رغم إنها اللعبة الأشهر والأكثر جماهيرية.. والمفاجأة الحقيقية إن لاعيبة الجولف وكرة السلة دايمًا موجودين في القمة وبيحققوا أرقام خيالية والسر هنا مش في عدد المتفرجين ولا في شهرة اللعبة نفسها قد ما هو في الصناعة الاقتصادية اللي واقفة ورا الرياضة وطريقة إدارة اللاعب لاسمه وفلوسه وشهرته.
إيه السبب ؟
تقارير فوربس الأخيرة وضحت إن دخول قائمة أغنى خمسين رياضي في العالم بقى محتاج أرقام ضخمة جدًا واللافت إن لاعيبة السلة تحديدًا ليهم حضور قوي وعددهم كبير مقارنة بأي رياضة تانية وده بيعكس قد إيه دوري الـNBA بقى قوة اقتصادية هائلة مش مجرد بطولة رياضية.. وأسماء زي ليبرون جيمس وستيفن كيري بقوا علامات تجارية عالمية مش بس لاعيبة كرة سلة وده مخلي دخلهم السنوي يوصل لمئات ملايين الدولارات من مصادر مختلفة.
لعبة اللاعب الواحد
الجولف من أكتر الرياضات اللي بتكافئ اللاعب مباشرة ومفيش فريق بياخد جزء من الشهرة ولا نادي بياخد نسبة من النجاح واللاعب هو النجم الوحيد وهو المنتج الأساسي وأي بطولة يكسبها بتترجم فورًا لفلوس في حسابه وأي عقد رعاية بيبقى مرتبط باسمه هو مش باسم فريق وعشان كده بنشوف لاعيبة زي جون رام وسكوتي شيفلر بيحققوا أرقام مالية ضخمة في مواسم قصيرة نسبيًا.
البراند الشخصي أهم
في الجولف تحديدًا البراند الشخصي ممكن يكون أغلى من أي لقب وتايجر وودز مثلًا حتى بعد ما قل ظهوره في البطولات لسه اسمه بيجيب ملايين من الرعايات والعقود طويلة المدى وده لأن الشركات بتراهن على الاسم مش على عدد المباريات واللاعب اللي يعرف يبني صورة قوية لنفسه يفضل بيكسب حتى بعد ما يقل عطاؤه داخل الملعب.
عمر أطول وفلوس أكتر
من مميزات الجولف إن العمر التسويقي للاعب طويل جدًا واللاعب ممكن يفضل نجم لسنين طويلة حتى بعد سن الأربعين والاعتزال هنا مش نهاية بل أحيانًا بيكون بداية مرحلة جديدة من الظهور الإعلامي والشغل التجاري وده بيخلي الاستثمار في لاعب الجولف آمن ومغري للشركات على المدى الطويل.
كرة السلة.. ماكينة فلوس
كرة السلة وبالأخص دوري الـNBA مثال واضح على الرياضة كصناعة وعقود البث التلفزيوني بمليارات والسوق الأمريكي يعتبر الأكبر إعلانيًا في العالم واللاعب النجم في الـNBA مش بس بيكسب من راتبه لكنه بيكسب من الرعايات والمشاريع والاستثمارات ونجم واحد ممكن يغير قيمة نادي بالكامل وده بيخلي الأندية مستعدة تدفع أرقام تاريخية.
اللاعب.. نجم بره وجوه
في كرة السلة اللاعب هو محور كل حاجة صورته بتتباع وقميصه بيتباع واسمه بيتحول لمشروع تجاري.. ليبرون جيمس مثال حي على لاعب قدر يحول نفسه لإمبراطورية استثمارية في الإعلام والتكنولوجيا والإنتاج الفني ونفس الكلام ينطبق على ستيفن كيري وغيره من النجوم اللي بقوا رجال أعمال بقدر ما هم لاعيبة.
ليه بيتفوقوا على لاعيبة الكرة ؟
لعبة كرة القدم رغم شعبيتها الضخمة إلا إنها لعبة جماعية والفلوس فيها بتتوزع بين النادي واللاعب والوكلاء وعدد قليل بس اللي بيقدر يوصل لقمة الدخل على العكس في السلة والجولف عدد أكبر من النجوم بيبقوا في نفس المستوى المالي لأن اللاعب هو المركز الأساسي للمنظومة كلها.
الخلاصة اللي عايزين نقولها بناءً على اللي قصادنا إن الجولف وكرة السلة مش مجرد رياضات للمشاهدة لكن صناعات اقتصادية عملاقة والعقود الضخمة والرعايات والاستثمارات والبراند الشخصي كلها عوامل بتخلي لاعيبة الجولف والسلة دايمًا في صدارة قوائم أغنى الرياضيين في العالم والموضوع في الآخر مش شعبية لعبة قد ما هو ذكاء في السوق وقدرة اللاعب إنه يحول اسمه لقيمة مستمرة تكسب حتى وهو بعيد عن الملعب.
