التفسير العلمي ورا “خيرًا تعمل شرًا تلقى”

أوقات بنساعد حد ونفتكر إننا كده هنآمن شره ونضمن وِدادُه لكن نتفاجئ ويحصل العكس تمامًا.. ويترد علينا بأذى وسوء بدل مايترد علينا بحب وامتنان.. طب ليه بيحصل كده؟

دي مش مجرد ندالة أو نكران جميل الموضوع ممكن يكون له أبعاد نفسية أعمق من كده تعالى نتعرف عليها..

العطاء بدون حدود كتير

بيكون واحد من الأسباب الأولى لأن الإنسان لما يدي عمال على بطال الناس بيتعودوا إن ده الطبيعي ويبدأوا يشوفوا عطائك وتواجدك حق مكتسب وواجب عليك مش كرم ولا حسن منك.. ولما هتبطل تعمل كده هينقلبوا عليك وده اللي اسمه Expectation Shift يعني تحول كامل في مسار توقعاتهم تجاهك.. فيبطلوا يشوفوا تضحياتك وبالنسبالهم تبقى العادي منك

غالبًا بقوا يشوفوك أحسن منهم

 وده اسمه علميًا Threatening Ego Response يعني ردة فعل نفسية لما يحس إنك أقوى.. النوع ده من الناس بيحب يعيش طول الوقت في دور المحتاج فـ لما انت بتساعدهم مابيبقاش مرتاح لأنه بيبدأ يحس إنك أحسن منه وده اللي بيهز صورته عن نفسه وبالنسباله إنه يأذيك ده دفاع عن صورته اللي إحسانك كشف تشووهها

في ناس عقلهم بيربط الطيبة بالضعف

فيشوفوا الإنسان اللي بيتصرف بطيبة إنسان ضعيف وهدف سهل بالنسبالهم..مش بيخافوا ولا يحترموا إلا الشخص اللي بيفتري عليهم وده علميًا اسمه Dominance Bais يعني الشخص اللي بيميل لاحترام الطرف اللي بيتحكم فيهم

التصرفات الطيبة بتكشف عيوبهم

لما بتعامل النوع ده بلطف وهو يواجه حقيقة إنه مش بيعاملك بنفس الطريقة بيتخلق عنده تناقض داخلي يخليه يقرر يأذيك أو يهرب بدل مايعترف إنه مقصر 

في النهاية الناس دي عملت كده عشان هما الناس الغلط اللي قدمتلهم اهتمامك أو إحسانك مش عشان انت غلطان إنك أحسنت أو تعاملت بأصل طيب.. ممكن يأذوك لأن أفعالك الطيبة كشفت حقيقتهم اللي ماواجهوش نفسهم بيها.. أو لأنهم في الأصل ناس مؤذية وأنانية وماعندهمش نضج كافي يخليهم يستقبلوا عطائك بامتنان مش باستغلال.. والأسهل عليهم بدل مايصلحوا من نفسهم إنهم يهاجموا الشخص اللي فضح حقيقتهم.. ماتغيرش نفسك لو قابلت في حياتك الناس دي لكن المهم إنك تتعلم إزاي تحط لعطائك حدود