لاعيبة كورة نجوميتهم انتهت على سرير العناية
في عالم الكورة الهتاف ممكن يقلب صمت.. والنجومية ممكن تتحول في لحظة لمعركة حياة أو موت.. لاعبين كانوا ماليين الملاعب فرح.. وفجأة اختفوا عن الصورة ودخلوا الغيبوبة.
البداية من فهد المولد اللي عمره ما كان اسم عادي عند جمهور الكورة السعودية.. لاعب سريع وجريء وصاحب بصمة واضحة مع اتحاد جدة والمنتخب السعودي عمومًا بس فجأة اسمه اتقال في خبر مؤلم بيتكرر: “فهد المولد في غيبوبة”.
أكتر من سنة وهو بعيد عن الملاعب والجمهور.. داخل صراع مع الإصابة والغيبوبة.. وسط قلق كبير ودعوات ما بتوقفش وشائعات بتطلع وتختفي.. وحقيقة واحدة ثابتة: اللاعب لسه بيقاوم.
حادث غيّر كل حاجة
قبل الحكاية ما تاخد السكة المؤلمة.. كان فهد واحد من أبرز نجوم جيله.. فهد اتولد سنة 1994 وظهر بدري مع اتحاد جدة وبعدها الشباب.. وكان عنصر أساسي مع المنتخب في بطولات كتير أهمها كأس العالم 2018.
في سبتمبر 2024.. وهو في إجازة بدبي اتعرض لسقوط مفاجئ من شباك سكنه والصدمة كانت كبيرة والإصابة خطيرة ونقلوه المستشفى وهو في حالة حرجة ودخل العناية المركزة وبعدها الغيبوبة.
التحقيقات والأخبار وقتها قالت إن اللي حصل حادث عرضي وطلع إشاعات بس الجهات الرسمية نفت أي شبهة جنائية.
غموض.. وانتظار طويل
من أول يوم والمعلومات الطبية كانت قليلة جدًا.. والأسرة اختارت الخصوصية.. واللي معروف إن حالته استقرت نسبيًا وخرج من مرحلة الخطر المباشر.. لكن الغيبوبة مستمرة.
وعلى مدار الشهور.. أخبار عن تحسن بسيط أو استقرار.. من غير تفاصيل واضحة والأصعب كان الشائعات المتكررة عن وفاته.. أكتر من مرة الأسرة اضطرت تنفي. موقف فتح باب كبير للكلام عن أخلاقيات السوشيال ميديا.. وإن إشاعة واحدة ممكن تزود وجع ناس أصلًا مكسورة.
مش حكاية فردية
قصة فهد المولد موجعة.. لكنها مش الوحيدة. تاريخ الكورة مليان لاعبين دخلوا الغيبوبة أو إصابات غيرت مصيرهم للأبد.
يعني مثلًا على سبيل الذكر وليس الحصر في 2017 عبد الحق نوري لاعب أياكس سقط في ماتش ودي بسبب أزمة قلبية مفاجئة والنتيجة كانت تلف شديد في المخ.
ونوري فاق بعد فترة.. لكنه فقد القدرة على ممارسة الكورة وقصته بقت رمز إنسانية في أوروبا.. وأياكس فضل داعم له ماديًا ومعنويًا سنين طويلة.
39 سنة بين الحياة والموت
واحدة من أقسى قصص الكورة.. وهو المدافع الفرنسي جان بيير آدامز دخل عملية بسيطة سنة 1982.. خطأ طبي دخله غيبوبة استمرت 39 سنة.
وزوجته فضلت جنبه طول السنين دي لحد ما توفى سنة 2021. قصة صعبة بتفكرنا إن الغلطة الطبية تمنها ممكن يكون عمر كامل.
حلم انتهى بدري
الإنجليزي بيلي فيجار.. مهاجم صاعد في أكاديمية أرسنال وفي سبتمبر 2025 اتعرض لإصابة دماغية خطيرة في ماتش.. دخل غيبوبة صناعية في محاولة لإنقاذه ورغم كل المحاولات.. توفى بعد أيام عن عمر 21 سنة. خبر صادم هزّ الوسط الكروي الإنجليزي.
نهاية مأساوية
الحارس سيرهي بيرخون لاعب سيسكا موسكو.. اصطدم بمهاجم منافس سنة 2001 حصله نزيف دماغي شديد وغيبوبة.. وبعد 9 أيام توفى وكمان ناديه قرر يسحب رقم قميصه تكريمًا ليه.. والواقعة فضلت علامة سودا في تاريخ اللعبة.
اصطدام خلص كل حاجة
اللاعب الكرواتي هرفوي كوستيتش اصطدم بالحائط جنب الملعب سنة 2008 ودخل عملية جراحية.. وبعدها غيبوبة وحالته ساءت بسرعة.. وأعلن الأطباء وفاته دماغيًا.
وفي النهاية القصص دي بتفكرنا إن ورا النجومية في بشر.. ورا الهتاف في وجع.. وإن اللاعب اللي بنشوفه بيلعب 90 دقيقة ممكن في لحظة يبقى بيحارب علشان يعيش.. وفهد المولد ولسه قصته مفتوحة.. بين أمل الإفاقة ودعوات جمهور ما نسيهوش.. والكورة مهما كانت جميلة أحيانًا بتبقى قاسية جدًا.
