مايكل كاريك.. نجم التفاصيل اللي بقى مدرب المرحلة الصعبة
“مايكل كاريك كان لاعب مميز ويقدر كمان يبقى مدرب كبير جدًا مفيش حاجة مستحيلة قدام الشخص ده بالنسبة لي.. أنا فخور إني لعبت وهو معايا في الملعب وكمان وهو موجود معانا كمدرب على دكة البدلاء”.. اللي فات ده كانت كلمات للبرتغالي كريستيانو رونالدو زميل مايكل كاريك في اليونايتد في 2021 قبل رحيله للنصر السعودي.
كلمات كانت بمثابة نبوءة من رونالدو لكاريك اللي كان مدربه ساعتها وكان مدرب مؤقت للشياطين بعد إقالة أوليه جونار سولشاير عشان تتحقق من تاني في 2026 لما مسك كاريك من أيام اليونايتد بعد إقالة روبن أموريم وكسب أول ماتشين زي الفترة الأولى بالظبط ظهر فيها اليونايتد بشكل متغير تمامًا.
دايمًا بننبهر باللي صوته عالي اللي بيصرخ على الخط أو اللي بيحب الكاميرات بس الحقيقة إن في نوع تاني من القادة أهدى و بيشتغل في صمت وبيسيب بصمته من غير ما يفرض نفسه.. مايكل كاريك واحد من النوع ده.
من أول ما لبس قميص مانشستر يونايتد لاعب لحد ما رجع النهارده مدرب للفريق.. كاريك عمره ما كان نجم العناوين لكنه كان دايمًا نجم التفاصيل ولاعب فاهم ومدرب أقرب للإنسان منه للتكتيك.
كاريك اللاعب
مايكل كاريك لما بدأ مع وست هام وبعدها توتنهام مكنش اللاعب اللي يخطف العين بسرعة لا مراوغات زيادة ولا اندفاع مبالغ فيه لكنه كان دايمًا اللاعب اللي يخلي اللي حواليه أحسن.
ولما انتقل لمانشستر يونايتد سنة 2006 كتير شككوا فيه.. جمهور متعود على سكولز وروبي كين وبعدين ييجي لاعب هادي كده؟.. بس بعد شوية الكل فهم إن كاريك هو العقل الهادي اللي الفريق محتاجه.
والسير أليكس فيرجسون نفسه قال عنه في أكتر من مناسبة إن كاريك من أكتر اللاعبين ذكاءً اللي اشتغل معاهم.. وإنه لاعب “بيشوف الملعب كله”.. وده مش كلام بيتقال لأي حد.
وفي 2014 ثناء فيرجسون موقفش عند كدة لكنه قال في حواره تلفزيوني قبل كده قال: “أعتقد أن مايكل كاريك هو أفضل لاعب وسط إنجليزي.. أفضل لاعب إنجليزي في اللعبة”.
وحتى تييري هنري اللي واجهه سنين في البريميرليج.. وقال مرة إن كاريك لاعب “مستهان بيه جدًا” وإن وجوده في أي فريق بيخلي اللعب أهدى وأنضف.
وصفه جاري نيفيل زميله وقائد اليونايتد بأنه يمنح الفريق السيطرة والهدوء مثل عزف البيانو في الملعب في إشارة لتأثيره الكبير رغم أسلوبه الهادئ.
إنسان قبل ما يكون لاعب
اللي يعرف كاريك كويس يعرف إنه عمره ما كان بتاع مشاكل ولا نجومية فارغة.. زملاؤه في مانشستر يونايتد كانوا دايمًا بيتكلموا عنه باعتباره اللاعب اللي يسمع أكتر ما يتكلم بس لما يتكلم الكل يسمع.
واين روني قال قبل كده إن كاريك كان من أكتر الناس اللي بتدي ثقة للاعبين الصغيرين وإنه كان دايمًا موجود يدعم من غير ما يحسسك إنه أعلى منك.
وده جانب إنساني مهم جدًا.. كاريك كان دايمًا بيشوف اللاعب اللي جنبه كشريك مش منافس.
وبول بوجبا لاعب اليونايتد السابق قال عن كاريك: “كاريك يساعدني كثيرًا بعد التدريب كان يقول لي: انظر.. يمكنك التفوّق على أي أحد.”
وبعيد عن المباريات كاريك دايمًا قريب من أكاديمية النادي.. بيحضر ماتشات الشباب و بيتكلم مع اللاعبين الصغيرين وبيتعامل مع الأهالي ببساطة.
فالتقارير الإنجليزية بتقول إن وجوده حسّن العلاقة بين الفريق الأول والأكاديمية، وده مهم جدًا لنادي بحجم مانشستر يونايتد.
وكاريك الإنسان حول دة في أول خطواته التدريبية بعد لما بدأ مع اليونايتد وقدر يطبق هدوءه دة في مشواره كمدرب.
خطوة منطقية جدًا
بعد ما اعتزل في 2018 انتقال كاريك للتدريب كان شبه طبيعي.. دخل الجهاز الفني لليونايتد اشتغل مع مورينيو وبعده سولشاير واتعلم من مدرستين مختلفتين جدًا.
لكن اللي ميّزه في الفترة دي إنه مكنش مجرد مساعد بينفذ تعليمات. لاعبين كتير قالوا إن كاريك كان حلقة الوصل بينهم وبين المدرب الشخص اللي بيفهم ضغط اللبس الأحمر وبيعرف يتعامل مع نفسية لاعب في نادٍ بحجم مانشستر يونايتد.
لما مسك الفريق مؤقتًا سنة 2021 كاريك بان عليه الهدوء غير الطبيعي لا وعود لا كلام كبير بس دايمًا جملة واحدة بتتكرر: خلّينا نركّز في المباراة اللي جاية.
وهو نفسه قال وقتها:المسؤولية في مانشستر يونايتد مش سهلة بس أنا مؤمن إن الهدوء هو أهم حاجة في اللحظات دي.
وده يشرح شخصيته جدًا.. كاريك مش بيحب الفوضى ولا بيشتغل تحت ضغط الإعلام.. هو بيشتغل بالعقل.
ومن أهم الحاجات اللي بتميز كاريك كمدرب إنه مش شايف اللاعب آلة وقال في حوار مع الاتحاد الإنجليزي بوضوح:“مفيش طريقة واحدة تمشي على كل اللاعبين.. لازم تفهم كل لاعب لوحده.”
الجملة دي لوحدها تلخص فلسفته هو مش مدرب بيصرخ 90 دقيقة ولا بيفرض سيستم غصب.. هو مدرب بيحاول يوصل للاعب نفسيًا قبل ما يوصل له تكتيكيًا.
وده ظهر بوضوح في تعامل اللاعبين معاه.. في أكتر من تقرير إن لاعبي اليونايتد حسوا بارتياح أكبر وتواصل أحسن وحتى التدريبات بقت أقصر بس أكتر تركيزًا.
