لانس.. الحصان الأسود اللي قلب موازين الدوري الفرنسي
في موسم ناس كتير كانت متخيلة إنه هيعدي عادي ومن غير مفاجآت كبيرة .. طلع نادي نادي لانس وقال لأ .. إحنا هنا عشان ننافس بجد مش عشان نكمل عدد.. والفريق اللي كان أقصى طموحه مركز أوروبي بقى فجأة بيزاحم على الصدارة وداخل في سباق مباشر مع باريس سان جيرمان اللي مسيطر على البطولة بقاله سنين طويلة.
بعد 22 جولة لانس بقى متصدر بفارق نقطة بس .. والأرقام بتقول إن الحكاية مش صدفة ولا فورمة مؤقتة .. ده فريق شكله ناوي يرجع لقب الدوري اللي غايب عنه من 29 سنة.. والسؤال بقى .. هل دي موجة حماس وهتعدي .. ولا إحنا قدام لحظة تاريخية ممكن تنهي هيمنة باريس؟
من فريق تايه لمنافس مرعب
لو رجعنا بالذاكرة شوية هنلاقي إن لانس مش من أندية الصف الأول تاريخيًا .. عنده لقب دوري واحد بس موسم 1997-1998 وبعدها سنين طويلة ما بين هبوط وصعود وصراع على البقاء.
الفريق قضى فترة مش قليلة في الدرجة التانية .. لحد موسم 2019-2020 لما الدنيا اتقلبت بسبب كورونا .. وقتها رابطة الدوري الفرنسي قررت إنهاء الموسم بدري .. ولانس كان في المركز التاني في الدرجة التانية .. وده خلاه يصعد رسميًا للدوري الممتاز في أبريل 2020.
الرجوع ماكانش مجرد مشاركة والسلام .. موسم 2020-2021 خلصه في المركز السابع وسط منافسة شرسة .. ودي كانت رسالة واضحة إن الفريق جاي بخطة مش مجرد ضيف شرف.
إدارة بعقل مش بفلوس
لانس مش مملوك لملياردير بيصرف من غير حساب .. لكن بيتدار بعقلية اقتصادية هادئة تحت قيادة جوزيف أوجورليان
الإدارة اشتغلت على الاستقرار المالي قبل أي حاجة .. وده ظهر بوضوح في قرار شراء ملعب النادي سنة 2025 بعد ما كان مستأجره سنين طويلة .. الصفقة كانت بحوالي 27 مليون يورو .. خطوة بتدي حرية استثمار أكبر بعيد عن الضغوط
الفكرة كلها كانت تخطيط طويل المدى .. بيع لاعبين في الوقت المناسب .. وشراء عناصر تناسب طريقة اللعب مش أسماء رنانة وخلاص
من 2020 لحد موسم 2025-2026 الفريق ما خرجش بره أول 10 مراكز في جدول الدوري .. وده أكبر دليل إن اللي بيحصل نتيجة شغل منظم مش ضربة حظ
شطارة في سوق الانتقالات
بين 2021 و2025 لانس صرف حوالي 122 مليون يورو على صفقات مدروسة .. وباع لاعبين بأكتر من 256 مليون يورو.. يعني صافي ربح حوالي 134 مليون يورو .. رقم ضخم بالنسبة لنادي مش من كبار أوروبا.. والسر كان في اختيار لاعبين يناسبوا المنظومة .. مش لاعبين يعيشوا على مجد فردي.
المدرب اللي عمل الفارق
المدير الفني بيير ساج هو العقل اللي ورا التحول ده .. رغم إن خبرته التدريبية مش طويلة قوي لكنه قدر يخلق فريق منظم بيعرف إمتى يضغط وإمتى يهدى اللعب.
أسلوبه قائم على دفاع متماسك .. ضغط معتدل .. واستغلال ذكي للهجمات المرتدة .. طريقة شبه اللي قدمها موناكو موسم 2016-17 أو مونبلييه موسم 2011-12 لما كسروا احتكار الكبار.. والثقة اللي اداها للاعبين خلت الفريق يلعب بشخصية .. ومبقاش يخاف من أي اسم قدامه.
توليفة لاعيبة بتكمل بعض
وسط الملعب فيه أدريان توماسون اللي بيدير الرتم وبيصنع فرص كتير .. ومعاه مامادو سانجاري اللي بيدي توازن بدني وتكتيكي مهم.. وقدام فيه ويسلي سعيد اللي شايل مسؤولية التهديف .. ومعاه أودسون إدوارد بحركته الذكية جوه المنطقة.
وفي صيف 2025 انضم فلوريان توفين بطل العالم 2018 .. إضافة خبرة كبيرة خصوصًا في المباريات اللي بتتحسم على تفاصيل صغيرة.. يعني دفاعيًا فيه مالانج سار ومعاه مجموعة عناصر مستقرة .. بالإضافة لوجود الظهير الدولي السعودي سعود عبد الحميد اللي بيضيف سرعة وحيوية على الطرف.
هل فعلاً النهاية بدأت؟
التاريخ بيقول إن الدوري الفرنسي مش دايمًا بيمشي بسيناريو واحد.. وموناكو عملها قبل كده .. ومونبلييه قلب الطاولة قبلهم .. ودلوقتي لانس بيحاول يكتب اسمه في نفس الصفحة.
والقصة مش بس سباق نقاط .. دي قصة مشروع بيكبر خطوة خطوة .. وفريق أثبت إن الإدارة الصح والتخطيط الطويل يقدروا يقفوا قدام القوة المالية الضخمة.. الأيام الجاية هتقول إذا كان لانس مجرد مفاجأة حلوة .. ولا بداية عصر جديد في فرنسا.
