إبراهيم حمدتو بطل تنس الطاولة.. من دمياط لليابان!
في بارالمبياد طوكيو 2020 العالم كله انبهر بوجود لاعب تينس طاولة بيلعب تنس بفمه.. وهو البطل المصري “إبراهيم حمدتو” وخلال المشاركتين اللي شارك فيهم إبراهيم حمدتو في الألعاب البارالمبية أثبت للعالم إنه رمز للتحدي والقوة فعلا.
إبراهيم حمدتو لاعب تنس طاولة بارالمبي مصري عنده 48 سنة، فقد ايده الاتنين وتم بترهم بعد تعرضه لحادثة قطار لما كان عمره 10 سنين وقال في تقارير صحفية إنه في 17 ديسمبر 1983 كان راكب القطار من دمياط الساعة 7 الصبح وكان طفل صغير 10 سنين راكب القطار وواقف على باب القطار وكل اللي رايح واللي جاي بيخبط فيه لحد ما وقع من القطار بين الرصيف والقطار نفسه.
لكن من صغره كان بيحب الرياضة أصلا وبعد الحادثة كمان بدأ يروح مراكز الشباب في دمياط بسبب حبه لكرة القدم وتنس الطاولة وكان فيه من الناس اللي حواليه بيدعمه ومنهم اللي كان شايف إنه مايقدرش يعمل كده، واختار إنه يبدأ ممارسة كرة القدم.. ورغم إصابته حاول إنه يتحداها بس للأسف ماكنش ينفع يلعب كرة القدم من غير ما يستخدم دراعه، لإنه لما كان بيلعب كرة مع صحابة ولو حد زقه بيقع وبيروح متعور، ولما حد كان بيقوله بطل كان بيرد ويقوله إنه عايز يطلع اللي جواه في أي حاجة رياضية يعني.
وقعد في مركز شباب فترة وحصل قدامه موقف خلاف على “بونت” بين 2 بيلعبوا تنس طاولة فهو قال إن الـ”بونت” ده من حق واحد فيهم فرد عليه الشخص التاني وقاله “خليك في حاجة تقدر تعملها”، وكانت الكلمة دي تحدي بالنسبة له، وبدأ يحاول يمسك المضرب بكذا طريقة في الأول حاول يحطه تحت باطه وفشل بعد كده قدر يمسك المضرب ببوقه لحد ما قدر يحرك الكرة لحد ما حس إن الكرة سهلة بالنسبة له، فكان بليل لما مركز الشباب يفضى كان يجيب الطاولة يحطها جنب الحائط ويتدرب مع نفسه على الحائط في مركز الشباب لمدة سنة وكانت أول مباراة له مع الشخص اللي قاله الجملة السيئة دي واللي غيرت حياته وطريقه.
إبراهيم حمدتو قبل الحادثة كان بيشتغل نجار في دمياط وكان أكبر طموحه قبل الحادثة إنه يبقى عنده ورشة نجارة وعمره ما تخيل اللي حصل في حياته ده كله.. خصوصًا إنه حصل على ذهبية بطولة أفريقيا في تنس الطاولة سنة 1991، وأسس جمعية للمعاقين حركيًا في دمياط في 2010، وفي سنة 2011 حصل على فضية أفريقيا، وفي سنة 2015 حصل على جايزة محمد بن راشد للإبداع الرياضي.
وفي سنة 2016 مثل مصر في ألومبياد ريو، وسنة 2017 كرمه الرئيس السيسي في مؤتمر شباب العالم، وفي 2021 اتأهل لألومبياد طوكيو 2020 واللي أبهر العالم كله فيها وفي مهارته إنه يمسك المضرب ببوقه.
وبسبب أداءه المشرف في ألومبياد طوكيو 2020 وتسليط الضوء عليه عالميًا اللجنة اليابانية المنظمة لألعاب طوكيو البارالمبية خلدت مشاركته عن طريق تحويل شخصيته لمقطع فيديو قصير “أنمي” وظهر في الفيديو ده وهو بيعلب كرة الطاولة بطريقته الفريدة جنب “سوميتي” واللي هي الدُمية الرسمية اللي بتمثل ألعاب أصحاب الهمم في اليابان.
المصري إبراهيم حمدتو يظهر في مقطع ترويجي للعبة تنس الطاولة في دورة الألعاب البارالمبية #طوكيو2020
— اليابان بالعربي🇯🇵#طوكيو2020🗼 (@nippon_ar) August 25, 2021
وقالت مجلة يابانية إنهم بيحترموا مجهود إبراهيم حمدتو وعزيمته بالرغم من التحديات وهتفضل اللحظة دي في ذاكرتهم وذاكرة العالم للأبد، وإنهم بيأملوا إنه يلهم الأجيال في الدول العربية للمشاركة في الألعاب وإنهم يمثلوا بلدهم.
ده غير كمان إن الصربي أسطورة التنس “نوفاك ديوكوفيتش” المصنف الأول عالميًا في تنس الطاولة نشر فيديو لـ ” إبراهيم حمدتو” على حسابه على انستجرام وكتب عليه “رائع.. أنا في حالة ذهول” وأشاد بيه وبأداءه وقال إن أبهر العالم خلال مشاركته التانية على التوالي في الألعاب البارالمبية في طوكيو وده من خلال إصراره إنه يمسك المضرب بفمه بالرغم من إنه فقد إيده الاتنين.
