بمناسبة يومه العالمي.. إيه هو التلعثم “التأتأة” وأسبابه وطرق علاجه؟
النهاردة يوم التوعية بالتلعثم أو التأتأة واللي -حسب موقع الطبي- موجودة عند حوالي 5% من الأطفال اللي عمرهم بين 2 – 6 سنوات وبيعانوا منها لفترة ممكن تبقى أسابيع أو سنين، وبالنسبة لعدد 1% من الأطفال، التلعثم مبيروحش، وممكن يزيد كمان.
التلعثم في الكلام هو نوع من أنواع اضطرابات النطق اللي بتمنع الشخص إنه يتكلم بطلاقة. والشخص اللي بيتلعثم بيبقى عارف هو عايز يقول إيه بس بيلاقي صعوبة إنه يقوله، فممكن يكرر أو يطوّل في كلمة أو حرف أو صوت، أو ممكن يبطل كلام عشان وصل لكلمة أو حرف مش عارف ينطقه.
وحسب موقع WebTeb بتكون أشهر أعراضه:
- تكرار نطق شوية كلمات أو حروف
- التردد قبل النطق والكلام
- فواصل زمنية بين الكلمة والكلمة
- التوقف فجأة عن الكلام قبل ما الكلمة تخلص
- مط شوية كلمات أو الشخص ياخج وقت طويل نسبيا في نطق الكلمة
- صعوبة نطق شوية كلمات أو جمل
- توتر أو تشنج ملحوظ في ملامح الوش أو النص العلوي من الجسم عند محاولة نطق كلمة أو تكوين جملة
- استبدال كلمات معينة بكلمات تانية
- تجنب نطق كلمات معينة
- إعادة ترتيب الكلمات في الجمل بطريقة غريبة
وطبعا كل ده بيؤدي إن الشخص بيكون عنده قلق وتوتر وعصبية وخجل وبيقلل ثقته بنفسه.
وحسب موقع MayoClinic اللجوء لطبيب التخاطب أو أخصائي أمراض اللغة بيكون في شوية حالات:
- لو التلعثم زاد أكتر من 6 شهور
- لو بيتكرر بشكل ملحوظ أو مستمر طول الوقت
- بيحصل معاه شد عضلات أو معاناة بشكل واضح في الكلام
- لو بتأثر بشكل واضح على التواصل الفعال في المدرسة أو الشغل
- لو بيسبب قلق أو اكتئاب أو مشاكل عاطفية أو نفسية
أما بالنسبة لأسباب التلعثم، فلسه لحد دلوقتي مفيش سبب واضح ليها بس أغلب الباحثين قالوا إن السبب بيرجع لعدة عوامل:
- الجينات الوراثية
- إضطرابات النمو والنطق
- تشوهات في القدرة على التحكم في حركات الكلام
- الجلطات أو إصابات الدماغ ممكن تتسبب في بطء الكلام أو تكراره
وأخيرا بالنسبة للعلاج، فبعد تشخيص الحالة من أخصائي نطق أو دكتور تخاطب، دي بتكون أبرز الحلول العلاجية:
- تمارين التحكم بالتنفس
- علاج تعديل التلعثم عن طريق تدريب المصاب على تقليل الجهد المبذول في محاولة النطق
- العلاج باستخدام بعض الأجهزة الإلكترونية، فبيتم استخدام سماعة خاصة عشان تساعد المصاب إنه يسمع صدى صوته وقت النطق وده بيخليه يحس إنه بيكلم شخص تاني، والتقنية دي أحيانا بتساعد على العلاج
- وفيه بعض العلاجات التانية زي: علاجات النطق – العلاج المعرفي السلوكي – العلاج النفسي
