إيه هو تطبيق الذكاء الاصطناعي ” Chat Gpt” الروبوت اللي بيرد عليك زي البشر!
من حوالي أيام أو أسابيع تحديدًا في آخر 2022 انتشر تطبيق اسمه “Chat GPT” وهو عبارة عن روبوت للشات وده عن طريق الـ AI أو الذكاء الاصطناعي، والتطبيق ده أي حد يقدر يتكلم أو يشات معاه كأنه بيتكلم مع شخص عادي وتقدر تسأل التطبيق وهيرد عليك بإجابات واقعية ومنطقية.
عدد مستخدمين البرنامج أو الروبوت ده وصلت لـ 2 مليون مستخدم في الوقت القصير ده، وده اللي خلى السوشيال ميديا تتكلم عليه.. لكن الغريب بالنسبة لنا مش رقم المستخدمين، الغريب هو إزاي بيشتغل برنامج الت Chat Gpt
انتشر مؤخرا سكرين شوتس لناس بيتكلموا مع الروبوت بعد ما بيسألوه عن فوازير مصرية مثلا زي أم محمد عندها 4 أولاد ابنها الرابع اسمه إيه وهكذا ولكن للأسف الروبوت مابيقدرش يرد عليهم.. وناس تانية اتكلمت عن إن البرنامج ده هيخلي كذا مهنة تختفي زي وظائف الـ Social media والـ Web developers وده كله خلى الناس تخاف من التطور اللي وصل له العالم وتسأل إيه حكاية البرنامج ده وعشان كده هنقولك إيه حكايته:
تطبيق الذكاء الاصطناعي Chat GPT هو تطبيق من إنتاج شركة “OpenAI” اللي اتأسست سنة 2015 في ولاية سان فرانسيسكو في أمريكا وكانت ميزانيتها في الأول بحوالي مليار دولار، والشركة دي كانت بالتعاون بين المدير التنفيذي سام آلتمان وإيلون ماسك، لكن إيلون ماسك خرج منها في 2018 وده أول ما التطبيق بدأ ينتشر بشكل واسع على تويتر.
تطبيق Chat GPT هو عبارة عن برنامج روبوت بيشتغل على الهواتف الذكية وبيستعمل الذكاء الاصطناعي عشان يتكلم ويشات ويرد على أسئلة المستخدمين بشكل طبيعي جدا كأن الشخص اللي المستخدم بيتكلم معاه بني أدم طبيعي ومش روبوت ولا حاجة.. طيب إزاي بيعمل ده؟
تطبيق Chat GPT وهو عبارة عن نظام ذكاء صناعي اتدرب عشان يتوقع الكلمة الجاية في جملة ما وده عن طريق إن تم تزويده بكميات كبيرة من الجمل اللي الموجودة على الإنترنت وتم تزويده كمان بكمية كبيرة وضخمة من المعلومات المتاحة على الإنترنت، وبالرغم من إنه بيرد ردود دقيقة في بعض الأوقات إلا إنه لسه بيقدم معلومات غلط ومش حقيقية وأوقات بيعرض محتوى مسيئ أو متحيز، وده لإن السبب الأساسي من اختراعه هو تقديم حلول ونصايح زي ما قالت الشركة اللي صنعت للتطبيق.
View this post on Instagram
اما بالنسبة للهدف منه هو إن يكون فيه حوار سهل مع الذكاء الاصطناعي ويبقى شبه كلام البشر مع بعض، والتطبيق مالوش شخصية أو طريقة كلام مميزة هو بيجمع معلومات من مصادر كتير في وقت قليل جدا وبيجمع معلومات تانية من كلامه مع البشر اللي بيعتبر بشكل ما تدريب له وطريقة لجمع المعلومات وبيرد بيها على أسئلة أشخاص تانية.
تطبيق Chat GPT كمان بيقدر يشرح مصطلحات ومفاهيم علمية معقدة بطريقة مبسطة لأي عمر حتى لو لطفل صغير، وبيقدر كمان يرد ويجاوب على الأسئلة التحليلية اللي نهاياتها مفتوحة اللي بتكون غالبًا في واجبات المدرسة، وفيه بعض المستخدمين طلبوا منه إنه يكتب مقالات للدراسة عن مواضيع محددة وعمل كده فعلا، ومش بس كده ده كمان يقدر يعمل أفكار من البداية ويعمل استراتيجيات للشغل ودراسات جدوى ويقترح عليك هدايا لأعياد الميلاد ويكتبلك موضوعات للمواقع أو المدونات ويقولك على خطط للإجازات ويكتب تغريدات ويعملك جدول تمارين ودايت وغيره طبعا وده زي ما قال موقع “نيويورك تايمز”.
View this post on Instagram
الفرق بين Chat GPT و Google هو إن جوجل يقدر يفتحلك أي موقع على الإنترنت بيتكلم أو يضيف لك معلومة عن الأحداث اللي بتحصل حالًا، لكن “شات جي بي تي” كل معلوماته مقتصرة على الحاجات اللي اتعلمها وعرفها قبل سنة 2021 وده ساعات بيخلي إجاباته قديمه.. وعشان كده حذر المدير التنفيذي سام آلتمان في تويت له على تويتر وقال إنه غلط تعتمد عليه في أي حاجة مهمة في الوقت ده.
وقال كمان موقع “نيويورك تايمز” إن الروبوت بيشكل تهديد على موقع جوجل لإن مع محركات البحث التقليدية هيتم استبدالها كده بروبوتات المحادثة وبكده شركة جوجل هتواجه تهديد بالنسبة لأعمال البحث اللي بتتم عليه.
ومسؤولين شركة جوجل شايفين كمان إن Chat GPT بيمثل تهديد لوجود الشركة أصلا، والرئيس التنفيذي سوندار بيتشاي بدأ في سحب المشاريع الحالية عشان يركز على إنهم يبنوا منتجات ذكاء اصطناعي.
وفي النهاية لسه خدمات شركة “OpenAI” وتطبيق ” Chat GPT” ماوصلوش كل الدول العربية ولا مصر ولكن لما يوصلوا كل اللي عليك إنك تعمل حساب وهتبدأ في استخدامه الروبوت عادي جدا واللي هو مجانًا لحد دلوقتي.
