إيه الفرق بين الحب الحقيقي اللي بيعيش يا حبيبي والحب المزيف!

كلنا بلا استثناء عارفين أغنية محمد فؤاد الحب الحقيقي ويمكن فيه مننا حافظها وغناها كتير كمان.. محمد فؤاد قال في الأغنية دي إن الحب الحقيقي بيعيش يا حبيبي وبيعلمنا نسامح وينسينى امبارح وبيعلمنا نفكر دايما في أيامنا اللي جايه وإنه مرار الأيام وإلى أخر الأغنية وكل التأكيدات اللي فيها.. بس يمكن كتير منها وقع في فخ إنه ماحفظش كلمات الأغنية دي أو نسي يطبقها على أرض الواقع فدخل علاقات ماكنش فيها للأسف حب حقيقي وكان موهوم إنه حب بجد بس اكتشف إنه ماكنش حقيقي ولا حاجة بعد فوات الأوان وده طبعا عقابًأ له إنه ينسى أغنية الفنان محمد فؤاد.

لو وقعت في الفخ ده مرة وحاسس إنك حرمت ومش عايز تدخل أي علاقة تاني قبل ما تبقى متأكد إنك بتحب الشخص ده بجد وهو كمان بيحبك حب حقيقي مش بتكدبوا على بعض أو متعلقين بس ببعض أو موهومين إنه حب أصلا.. خلينا نقولك شوية علامات يفرقولك بين الحب الحقيقي والحب المزيف حسب ما قال موقع “inspiring tips” وموقع “marriage means more”:

1- الحب الحقيقي هو التضحية أما الحب المزيف هو مصدر قلق لوحده:

فكر كده هل شريكك بيفكر فيك قبل ما ياخد أي قرار حتى لو كان صغير زي لو خارجين في مكان معين هل بتحب المكان ده؟ هل بتحب الأكل بتاعه؟ الحب الحقيقي بيدور عن التضحيات والقرارات المتبادلة أما الحب المزيف فعكس ده كل طرف بيفكر في نفسه بكل أنانية حتى لو كان قرارت الشخص هتنعكس على شريكه بالسلب.

2- الحب الحقيقي مبني على الصراحة أما المزيف بيستخبى في الكدب:

هتعرف لو كان حب حقيقي لما تلاقوا بعضكوا بتشجعوا بعض على الصراحة حتى لو كانت الحقيقة هتبقى حاجة صعبة عليكوا، لكن الشفافية في العلاقات بتشيل كل الشكوك وانعدام الأمان والمخاوف.. أما الحب المزيف فبيكون مبني على أسس مش ثابتة زي الكذب.

3- الحب الحقيقي عبارة عن تعاطف وطيبة أما المزيف فبيكون قاسي:

الحب الحقيقي بيخلي الناس تبقى بتراعي بعض وبتخاف على بعض وبتتعاطف مع بعض أما الحب المزيف بيبقى كله ألم وقسوة ومليان معاملة سيئة بتشوف نفسك ماتستحقهاش.

4- الحب الحقيقي كله صبر أما المزيف فكله غضب:

الحب الحقيقي بيخلي الطرفين يستحملوا بعض ويسامحوا بعض، وده طبعا مش معناه إنك تعمل اللي أنت عايزة في شريكك من غير ما تحترمه عشان يصبر عليك لكن معناه إنه يصبر على عيوبك ويحاول يصلحها معاك.. أما الحب المزيف فأصلا الشريكين اللي بيكونوا فيه ماعندهمش صبر يسامحوا بعض وكمان ممكن يقولوا لبعض كلام جارح محدش يستحمله.

5- الحب الحقيقي مبني على التواضع أما المزيف مبنى على الغرور:

الأشخاص اللي بيحبوا بعض بجد مش مهتمين مين يطلع غلطان ومين كسبان عادي بيعترفوا بغلطاتهم وبيتحملوا مسؤولية الغلط كمان، أما الحب المزيف فهو كله غرور وحب للنفس بيكون فيه الطرفين بيرموا الغلط على بعض وبيتباهوا إنهم مش غلطانين.

6- الحب الحقيقي بيبقى فيه امتنان لكن المزيف فيه غيرة:

اللي بيحب حد بيقدر وجوده في حياته وبيبقى ممتن لوجوده وبيقدر اللي بياخده منك سواء كان كبير أو صغير لكن المزيف كله غيره فهتلاقي الطرف التاني بيقلل من وجودك ومابيقدرش هداياك وبيحس إنه تعيس ومش محظوظ وبيغير من الناس اللي في علاقات تانية.

7- الحب الحقيقي بيحسسك بالرضا والكمال أما المزيف فارغ:

الحب الحقيقي بيخليك تحس بالكمال إما المزيف فبيحسسك بالفراغ حتى لو كنت أنت وشريكك مقضيين كل ثانية مع بعض.

8- الحب الحقيقي احترام اما الحب المزيف أمر واقع:

اللي بيحبوا بعض بجد بيحترموا كل حاجة مرتبطة بشريكهم سواء أحلامهم أو آرائهم أو قراراتهم.. أما المزيفين بياخدوا شريكهم أمر مسلم بيه وساعات الغرور بياخدهم إنهم يسخروا من شريكهم ومايحترمش بيحب إيه أو بيكره إيه وده طبعا بتبقى علامة غير صحية في العلاقة بتكون واضحة وصريحة.

9- الحب الحقيقي بيقدملك الحماية أما المزيف فهو اللي بيأذيك:

لو فاكر إن الحب الحقيقي مش مؤلم فدي مش حقيقة.. الحب الحقيقي بيخلي الناس تدخل مناقشات مؤلمة فعلا ومع ذلك ده بيكون بهدف حماية العلاقة لمدى أطول وعشان مستقبلهم.. أما الحب المزيف فهو مفيهوش أصلا مناقشات صادقة وعميقة ممكن تضايق أي حد بس هو نفسه هيدمرك.

10- الحب الحقيقي تواصل أما المزيف تصحيح:

بتشوف كتير اتنين مرتبطين بيبقى حد فيهم بيتكلم وتلاقي التاني بيكمله الجملة وساعتها بتفضل تفكر ده بيحصل إزاي بس هو مابيكونش أكتر من إنهم مركزين مع بعض ومن كتر ما بيتناقشوا وبيسمعوا بعض كويس حتى لو الموضوع مش مهم.. لكن العلاقات المزيفة بتكون قايمة على عدم الاهتمام والتجاهل وهتلاقي إنهم بيصلحوا لبعض الكلام والأفكار عشان يحسوا بالتفوق على بعض. 

العلاقات واحدة من أحلى التفاصيل في حياتنا اللي ماينفعش نتعامل معاها بعدم اهتمام.. عشان كده ماتسبش نفسك تطول في علاقة حاسس إنها بتأذيك أو ماتبقاش حقيقية فعلا حتى لو خدت منك سنين ومجهود كتير وده لإنك تستحق تحب وتتحب بصدق وحب حقيقي على رأي الفنان محمد فؤاد.